მიწის რეგისტრაციის რეფორმა 2016 წლის აგვისტოში შევიდა ძალაში, რის შემდეგაც, საჯარო რეესტრის მონაცემებით, უწყებას უკვე 600 000-ზე მეტმა მოქალაქემ მიმართა.
რა არის მიწის რეგისტრაციის რეფორმის მიზანი, ყველაზე მეტად რა პრობლემებს აწყდებოდა მოსახლეობა მიწის საკუთრებაში დარეგისტრირებისას და აწყდება დღესაც_ამ საკითხებზე „გურია ნიუსს“ საჯარო რეესტრის ეროვნული სააგენტოს თავმჯდომარე, პაპუნა უგრეხელიძე ესაუბრა.
„2016 წლის პირველ აგვისტოს ძალაში შევიდა კანონი, რომლითაც დაიწყო მიწის რეგისტრაციის სახელმწიფო რეფორმა. ჩვენ მიზნად ვისახავდით გაგვემარტივებინა ყველა პროცედურა, რომელსაც ჩვენი მოქალაქეები სასოფლო-სამეურნეო მიწის რეგისტრაციის პროცესში აწყდებოდნენ. ეს იყო ბიუროკრატიული, ფინანსური, სამართლებრივი ბარიერები. ეს დაკავშირებული იყო დროსთან და საფასურთან. 2016 წლის 1 აგვისტოდან ჩვენ გავხდით ე.წ. პროაქტიული სააგენტო,რაც გულისხმობს, რომ ვართ მოქალაქის ადვოკატი, იმ წუთიდან, როდესაც ის მოგვმართავს. ვიწყებთ ყველა იმ საჭირო პროცედურას, დოკუმენტაციის მოძიებას, რომელიც გვჭირდება, რომ მოქალაქეს დავურეგისტრიროთ საკუთრების უფლება სასოფლო მიწებზე“,_ამბობს უგრეხელიძე.
როგორც ცნობილია, მიწის რეფორმა 1990-იან წლებშიც მიმდინარეობდა, როდესაც სახელმწიფო მოქალაქეებს მიწას უნაწილებდა, თუმცა, როგორც საჯარო რეესტრის ეროვნული სააგენტოს თავმჯდომარე ამბობს აზომვით ნახაზში არსებული უზუსტობა ხშირად ხდებოდა მიწის რეგისტრაციის ხელისშემშლელი ფაქტორი.
„1992-1999 წლებში მიმდინარეობდა მიწის რეფორმა, როდესაც სახელმწიფო ანაწილებდა მიწას საქართველოს მოქალაქეებზე და გასცემდა შესაბამის დოკუმენტაციას. აღნიშნული დოკუმენტაცია ხშირად ხარვეზიანი იყო და ხელს უშლიდა რეგისტრაციის პროცესის მოქალაქის სასიკეთოდ დასრულებას. იმ რეფორმის მეშვეობით კი, რაც 2016 წლის აგვისტოდან მიმდინარეობს ვცადეთ ყველა ბარიერი მოგვეხსნა და მოგვენახა ალტერნატიული გზები. თუ არ არსებობს დოკუმენტი არის საშუალება მივმართოთ აღიარებით კომისიებს, რომლებიც მუნიციპალიტეტებთან მუშაობენ. ასევე იმ დოკუმენტების მიმართ, რომლებსაც გარკვეული ხარვეზები აქვს, გვაქვს ლოიალური მიდგომა“, _ ამბობს საჯარო რეესტრის ეროვნული სააგენტოს თავმჯდომარე.
პაპუნა უგრეხელიძეს თქმითვე, საჯარო რეესტრში მიწის რეგიტრაციის რეფორმის ამოქმედებიდან დღემდე ყოველდღიურად დაახლოებით 1 400 უფლება რეგისტრირდება საჯარო რეესტრის ეროვნულ სააგენტოში.
„დღეისათვის გვაქვს კარგი მაჩვენებელი რეფორმისა. მოგვმართა ნახევარ მილიონზე მეტმა, დაახლოებით 600 000-მა მოქალაქემ, აქედან 306 000 რეგისტრაცია წარმატებით დასრულდა წელიწადსა და 2 თვეში, რაც საკმაოდ მაღალი მაჩვენებელია და მეტია იმ მაჩვენებელზე, რაც არსებობდა რეფორმის დაწყებამდე. ყოველდღიურად დაახლოებით 1 400 უფლება რეგისტრირდება საჯარო რეესტრის ეროვნულ სააგენტოში ამ რეფორმის ფარგლებში. მომართვიანობის 5-ჯერ გაზრდილი მაჩვენებლის შედეგად, ვფიქრობ, რომ საზოგადოება გაცნობიერებულია. ვერანაირი სარეკლამო კამპანია ვერ მოიყვანს მოქალაქეებს თუ ისინი გაცნობიერებულები არ არინ და რეალურად გამარტივებულ პროცესს ვერ ხედავენ,“_ამბობს ის.
როგორც საჯარო რეესტრის ეროვნული სააგენტოს თავმჯდომარე „გურია ნიუსთან“ საუბარში აღნიშნავს, მიწის რეგისტრაციის რეფორმა 2018 წლის 1 ივლისამდე გაგრძელდება.
„მიწის რეგისტრაციის რეფორმა გრძელდება 2018 წლის 1 ივლისამდე, თუმცა ჩვენ უკვე გვაქვს მონახაზი რა მიმართულებით შეიძლება დაგვჭირდეს ცვლილებები, ნასწავლი გაკვეთილების გამოყენება, იმისათვის რომ რეფორმა გავაგრძელოთ, მოქალაქეებს შევუმსუბუქოთ მიწის რეგისტრაციის პროცესი და მივაღწიოთ მიზანს, 100%-იან რეგისტრაციას“, _ ამბობს უგრეხელიძე.
