რამდენიმე წელია, რაც ლანჩხუთში, ჟორდანიას ქუჩა, რომელიც ქვეყნის ერთ-ერთი მთავარი სატრანსპორტო ხაზიცაა, მერიის ზედამხედველობის სამსახურის არა ერთი მცდელობის მიუხედავად, გარემოვაჭრეებითაა გადატვირთული.
ქალაქის ცენტრში, რამდენიმე ადგილზე სახელდახელოდაა მოწყობილი პატარ-პატარა ღია ტიპის დახლები, სადაც წელიწადის ნებისმიერ დროს ერთმანეთის გვერდიგვერდ ხილი, ბოსტნეული, რძის ნაწარმი, ტანსაცმელი და სხვა ათასი წვრილმანი იყიდება.
ლანჩხუთისთვის უცხო არც ყოველგვარი სანიტარული ნორმების უგულებელყოფით, პირდაპირ გზის სავალ ნაწილზე დაწყობილი საკვები პროდუქტებია.
როგორც ირკვევა, ბაზარში დახლებთან დგომას მოვაჭრეები ღია ცის ქვეშ ვაჭრობას ამჯობინებენ. როგორც თავად ამბობენ, ამის მიზეზი ბაზრებში მყიდველის ნაკლებობაა.
“კარგი ცხოვრების გამო არ ვდგავართ ქუჩაში. არც ჩვენ გვიხარია წვიმასა და ქარში ღია ცის ქვეშ დგომა, მაგრამ სხვა გამოსავალი რომ არაა?! ამ გზით ვშოულობთ ლუკმა-პურის ფულს და მიგვაქვს სახლში ბავშვებისთვის. ზოგს ადრე ბაზარში გვქონდა დახლი დაქირავებული და იქ ვვაჭრობდით, მაგრამ იმის გამო, რომ იქ არავინ შემოდიოდა და პროდუქტი გვილპებოდა, იძულებული გავხდით, სხვებივით გარეთ გამოვსულიყავით და აქ გვევაჭრა”, _ ამბობენ გარემოვაჭრეები, რომელთა რიცხვს დრო და დრო სხვადასხვა სოფლიდან, საკუთარი პროდუქტის გასაყიდად ჩამოსული გლეხობა ემატება, რომლებიც ხალხის ინტენსიური მოძრაობის გამო, ძირითადად, არჩევანს ყოფილი უნივერმაღის მიმდებარე ტერიტორიაზე აკეთებენ.
მთავარი მიზეზი, რის გამოც ლანჩხუთელი მომხმარებლები გარემოვაჭრის სასარგებლოდ აკეთებენ არჩევანს, ბაზართან შედარებით დაბალი ფასებია.
“რა თქმა უნდა, გადამწყვეტი მნიშვნელობა ფასს აქვს, მით უმეტეს, რომ ხარისხი ყველგან ერთი და იგივეა. საკუთარი თვალით მინახავს, თან არა ერთხელ, როგორ იყიდა ბაზარში მოვაჭრემ პროდუქტი გარეთ და მერე საკუთარ დახლზე დადო გასაყიდად. რა თქმა უნდა, ფასიც მეტი დაადო”, _ ამბობს ლანჩხუთელი მომხმარებელი.
ამ მხრივ, განსაკუთრებით რთული მდგომარეობა ყოფილ სასტუმროსა და საცხოვრებელ კორპუსებს შორის არსებულ მოედანზეა, სადაც ტერიტორიის ნაწილი გარემოვაჭრეებს უკავიათ. აქ იბარებენ თხილს, იყიდება ხილი, ბოსტნეული, მარცვლეული. აქვეა რამდენიმე მსხვილი სავაჭრო ობიექტი, ავტოსადგური, ტაქსების გაჩერება და საცურაო აუზი, რომლის მიმდებარედ, შშმ პირებისა და მოზარდებისთვის განკუთვნილი ტრენაჟორებით მოწყობილი პატარა მოედანია.
“არა ერთი წელია ასეთ დღეში ვართ. ისეა ეს ტერიტორია გადატვირთული, რომ ფეხის თავისუფლად გადადგმის საშუალება არაა. ავტომობილები, ლამის, კიბეებზე ადიან. ზოგჯერ ამ უზომოდ გადატვირთულ ტერიტორიაზე, ზოგი ვაიმძღოლი მაინც ახერხებს მაღალი სიჩქარით მოძრაობას. საკმაოდ სახიფათოა აქ გავლა. თავად გარემოვაჭრეებს შორისაც ხშირია ჩხუბი და დაპირისპირება წინა პლანზე დგომისთვის.
ერთხელ და სამუდამოდ უნდა მოგვარდეს ეს პრობლემა და განიტვირთოს ეს ტერიტორია, სანამ რამე უბედურება მომხდარა”, _ ამბობენ სხვადასხვა ობიექტების მეპატრონეები, რომლებიც აღნიშნულ ტერიტორიაზე არსებული ქაოსური მდგომარეობის მოწესრიგებას ითხოვენ.
“გურია ნიუსი” კომენტარისთვის მერის პირველ მოადგილეს გოგი ფაცურიას დაუკავშირდა, რომელიც შესაბამისი სამსახურების ხელმძღვანელებთან ერთად, აღნიშნულ საკითხზე სამსჯელოდ რამდენიმე თვის წინ პირადად შეხვდა აქაურ მეწარმეებს.
ფაცურიას თქმით, პროექტი, რომელიც ამ ტერიტორიის კეთილმოწყობას ისახავს მიზნად, უკვე მზადაა, ალტერნატიული ფართიც უკვე გამონახულია და დიდი ალბათობით მოკლე ხანში გახდება შესაძლებელი მისი გახორციელება:
“პროექტი, რომლის მიხედვითაც ქალაქის ეს ცენტრალური ნაწილი უნდა კეთილმოეწყოს, უკვე მზადაა და ახლა შესაბამისი თანხის მოძიება ხდება. ამ პროექტის მიხედვით, გარემოვაჭრეები და თხილის ჩამბარებლები საცურაო აუზის უკანა ტერიტორიაზე და მის მიმდებარედ გადავლენ, აქვე გაკეთდება სოფლებისკენ მიმავალი მიკროავტობუსების სადგომიც. მოკლედ, ყოფილი სასტუმროს წინ მდებარე მოედანი განიტვირთება და კეთილმოეწყობა”, _ ამბობს ფაცურია.
