გურიის სამივე მუნიციპალიტეტში ავტომობილების სწრაფი მოძრაობა გასაკვირი არავისთვის არის.
მიუხედავად იმისა, რომ როგორც პოლიციის სამმართველოს, ასევე საპატრულო პოლიციის ეკიპაჟები მუდმივად პატრულირებენ, მძღოლების უმრავლესობა გადაჭარბებული სიჩქარით მოძრაობას არჩევს და ამის გამო ხშირია ავტოავარიების შემთხვევები.
დაკვირვება ცხადჰყოფს, რომ მაღალი სისწრაფით განსაკუთრებით ახალგაზრდები დადიან, რომელთა უმეტესობას არც ე. წ. “ზებრა” გადასასვლელი აფერხებთ და არც საგზაო ნიშნები.
მოსახლეობა, დიდი ხანია ამ პრობლემის მოგვარებას ითხოვს და აღნიშნავს, რომ შინაგან საქმეთა სამინისტრომ და ადგილობრივმა ხელისუფლებამ ზომები უნდა მიიღოს.
გასული წლის დეკემბერში, ჩოხატაურის მუნიციპალიტეტის მერმა, ირაკლი კუჭავამ, საკრებულოს სხდომაზე განაცხადა, რომ მუნიციპალიტეტის ტერიტორიაზე 4 ვიდეოკამერა დამონტაჟდებოდა.
მისივე თქმით, ორი კამერა დუმბაძის ქუჩაზე განთავსდებოდა, ერთი _ ბახმაროს დამაკავშირებელ გზაზე, ე. წ. “აკაციების ტერიტორიაზე”, ერთი კი _ საკათედრო ტაძართან.
თუმცა, ამ განცხადების გაკეთებიდან 9 თვეა გასული და ჩოხატაურში არც ერთი კამერა არაა დამონტაჟებული.
ჩოხატაურის მუნიციპალიტეტის მერიის შესყიდვების სამსახურის უფროსის ბაჩი გოგიბერიძის თქმით, ამის მიზეზი ის კომპანიაა, რომელმაც ტენდერი მოიგო:
“კამერების შეძენასთან დაკავშირებით, შინაგან საქმეთა სამინისტრომ ჩაატარა რამდენიმე მუნიციპალიტეტის ერთობლივი ტენდერი, რომელიც უცხოურმა კომპანიამ მოიგო. ველოდებოდით კამერების შემოტანას და დამონტაჟებას. თუმცა, 24 აგვისტოს კომპანიამ წერილით მოგვმართა, რომელშიც აღნიშნულია, რომ ფორსმაჟორული მდგომარეობა ჰქონდათ და ითხოვეს დროის გაგრძელება.
კომპანიის მიერ დასახელებული მიზეზები არ მივიღეთ ფორს-მაჟორად და იგი ჯარიმებზე გავუშვით”, _ აღნიშნა ჩვენთან საუბრისას გოგიბერიძემ.
როგორც აღმოჩნდა, მსგავსი სიტუაციაა ოზურგეთისა და ლანჩხუთის მუნიციპალიტეტებშიც _ კამერები არსად დაუმონტაჟებიათ.
“გურია ნიუსმა” გაარკვია, რომ ტენდერში, კომპანია “მერთსათ ელექთრონიქ მუჰენდისლიქ ინშაათ თურიზმ ვე სანაი თიჯარეთ”-ის საქართველოს წარმომადგენლობას აქვს მოგებული.
ამ კომპანიამ არა მარტო გურიაში, არამედ საქართველოს ყველა მუნიციპალიტეტში უნდა დაამონტაჟოს გარე ხედვის კამერები და ამაში 1 456 741 ლარს იღებს.
კომპანიის მენეჯერი ეკატერინე ნეფარიძე ამბობს, რომ კამერები უკვე ჩამოტანილია:
“პრობლემა შეგვექმნა. გვქონდა მხოლოდ სამდღიანი გადაცილება მიწოდებაზე. კამერები უკვე საწყობშია. რაც შეეხება მონტაჟს, მთელი ქვეყნის მასშტაბით ეს პროცესი 13 აპრილამდე უნდა დასრულდეს. ჩვენ უკვე გავაგზავნეთ წერილი შინაგან საქმეთა სამინისტროში და ველოდებით გეგმას, რომლის მიხედვითაც დაიწყება კამერების დამონტაჟება. ამ დროისთვის, არ ვიცით, რა და როგორ იქნება, რომელ მუნიციპალიტეტში დამონტაჟდება პირველად. ეს შინაგან საქმეთა სამინისტროზეა დამოკიდებული”, _ გვითხრა ნეფარიძემ.
შინაგან საქმეთა სამინისტროს პრესსამსახურის ხელმძღვანელის სოფო მდინარაძის ინფორმაციით, უწყებას ტენდერში გამარჯვებული კომპანიისთვის დეტალური გეგმა აქვს გადაგზავნილი:
“გურიაში კამერების მონტაჟი მალე უნდა დაიწყოს. ოზურგეთში 42 კამერა მონტაჟდება და დასრულების ვადა 1 ნოემბერია. ლანჩხუთში 9 კამერა 1 იანვრამდე უნდა დამონტაჟდეს. ასევე, 1 იანვრამდე უნდა დამონტაჟდეს ჩოხატაურში 4 კამერა”, _ აღნიშნა ჩვენთან საუბრისას მდინარაძემ.
