ლანჩხუთის მუნიციპალიტეტის გამგეობის სოციალური სამსახურის წინადადებით, სოციალურ პროგრამაში ცვლილებები შევიდა. საკითხი სოციალური სამსახურის უფროსმა, თამარ ფირცხალაიშვილმა წარმოადგინა. ცვლილება კი ეხებოდა სამკურნალო და საოპერაციო ხარჯების დახმარების პროგრამას, რომლითაც სარგებლობა დღეიდან, ლანჩხუთის მუნიციპალიტეტში რეგისტრირებულ მოქალაქეს შეუძლია.
აღნიშნულ ცვლილებას წინ გამგეობის აუდიტის დასკვნა უძღოდა. სამსახურმა სახალხო დამცველის აპარატიდან გადმოგზავნილი, მოქალაქე თამარ ჭეიშვილის განცხადება შეისწავლა, რომელიც მისი, ამჟამად გარდაცვლილი დის, მადონა ჭეიშვილის სამკურნალო-საოპერაციო თანხით დახმარების საკითხს ეხებოდა _ რამდენიმე თვის წინ ჭეიშვილს გამგეობის სოციალურმა სამსახურმა იმ მოტივით, რომ იგი არ იყო ლანჩხუთის მუნიციპალიტეტის მცხოვრები, დაფინანსებაზე უარი უთხრა.
„განკარგულება „ლანჩხუთის მუნიციპალიტეტის სოციალური პროგრამების დამტკიცების შესახებ“ სრულად ვერ ითვალისწინებს რაიონში რეგისტრირებულ და დროებით საცხოვრებლად სხვა რეგიონში მყოფი პირების მოთხოვნებს. ისინი ახალ საცხოვრებელ ადგილზე ვერ იღებენ ამ დახმარებას, რადგან რეგისტრაციის ადგილი ლანჩხუთის რაიონია.
მიზანშეწონილად მიგვაჩნია, სოციალურმა სამსახურმა დაუყოვნებლივ მოამზადოს პაკეტი განკარგულებაში ცვლილების შესატანად, რომელშიც სრულყოფილად იქნება ასახული ლანჩხუთის მუნიციპალიტეტის მცხოვრებთა ინტერესები“, _ წერია აუდიტის დასკვნაში.
სწორედ აუდიტის ამ დასკვნიდან გამომდინარე, გამგეობის სოციალურმა სამსახურმა სოციალურ პროგრამაში ცვლილებები შეიტანა.
„სამკურნალო და საოპერაციო თანხებით დახმარების პროგრამაში მთლიანი ტექსტიდან ამოღებულია სიტყვა „მცხოვრები“ და მითითებულია „რეგისტრირებული“, _ თქვა საკრებულოში საკითხის განხილვისას თამარ ფირცხალაიშვილმა, რამაც დეპუტატებს შორის აზრთა სხვადასხვაობა წარმოშვა.
ეთიკის კომისიის თავმჯდომარის, რომან ბიწაძის მოსაზრებით, ეს სოციალურ პროგრამაში ამ ცვლილების გახორციელება კარგია, თუმცა, მთელი რიგი შენიშვნები არსებობს, ზოგადად, პროგრამასთან დაკავშირებით. ცვლილება მისაღებია ყოფილი გამგებლის, გია გოგუაძისთვის, თუმცა, ეჭვი აქვს, რომ ცვლილება ამომრჩეველზეა მორგებული.
„ძალიან საინტერესოა, ეს პროგრამა ამომრჩეველზეა მორგებული თუ მოსახლეობაზე“, _ იკითხა გოგუაძემ და პასუხად ფირცხალაიშვილისგან მიიღო, რომ პროგრამა მოსახლეობაზეა მორგებული.
პროგრამაში გასახორციელებელ ცვლილებას არ დაეთანხმა ლესის მაჟორიტარი დეპუტატი, ელისო ჭიჭინაძე.
„არიან ადამიანები, რომლებიც რამდენიმე ათეული წელია ლანჩხუთში ცხოვრობენ, მაგრამ რეგისტრირებული სხვაგან არიან. გამოდის, რომ ეს კატეგორია დახმარების გარეშე დარჩება, რაც ძალიან ცუდია. ჩემს სოფელში ასეთი ძალიან ბევრია“, _ აღნიშნა ჭიჭინაძემ.
იმ მოტივით, რომ თბილისსა და სხვა მუნიციპალიტეტებში დახმარების გაცემისას რეგისტრაციის ადგილს აქვს მნიშვნელობა, საკრებულოს წევრთა უმეტესობისთვის პროგრამაში შესატანი ცვლილება მისაღები დარჩა.
