რუსეთში საკონსტიტუციო რეფორმებს, რომლის მიხედვითაც, პრეზიდენტ ვლადიმერ პუტინს ძალაუფლების შენარჩუნება 2036 წლამდე შეეძლება, მხარი ამომრჩეველთა 77.9%-მა დაუჭირა, 21.3 % კი წინააღმდეგი წავიდა.
BBC-ის ინფორმაციით, აღნიშნული ცვლილება იმ პერიოდს რა დროის განმავლობაშიც პუტინი პრეზიდენტია გაანულებს და მას კიდევ 6 წლის ვადით შეეძლება პრეზიდენტის პოსტის დაკავება.
კენჭისყრის შედეგებს ოპოზიციის ლიდერები გმობენ და ამბობენ,რომ ამის მიზანია პუტინის „მუდმივი პრეზიდენტობა“. აღსანიშნავია ის ფაქტიც, რომ შედეგების დამოუკიდებელი დათვლა არ გახორციელებულა, ხოლო ახალი კონსტიტუციის ასლები გამოჩნდა წიგნების მაღაზიებში.
კრემლის მთავარი კრიტიკოსი ალექსეი ნავალნი შედეგებს უწოდებს ”დიდ სიცრუეს” და ამბობს, რომ არ ასახავს რეალურ საზოგადოებრივ აზრს.
ცნობისთვის, პუტინს საპრეზიდენტო ვადა 2024 წელს ეწურება.
როგორც ცოტა ხნის წინ, რუსეთის 67 წლის პრეზიდენტმა განაცხადა, ის მზადაა კიდევ ერთხელ იყაროს კენჭი, თუმცა ამისთვის კონსტიტუციური შესაძლებლობაა საჭირო.
ის უკვე 20 წელია რაც რუსეთის ხელისუფლებაშია როგორც პრეზიდენტი ან პრემიერი.
გავრცელებული ინფორმაციით, აქტივობამ 65% შეადგინა. მხარდაჭერის ყველაზე მაღალი დონე – 90% -ზე მეტი – იყო ყირიმში, რომლის ანექსიაც რუსეთმა 2014 წელს გაახორციელა, ასევე ჩრდილოეთ კავკასიაში ჩეჩნეთში და ციმბირში.
ნიუ – იორკში, რუსეთის საკონსულოში 816-მა ადამიანმა მისცა ხმა, საიდანაც 505-მა უარი თქვა რეფორმებზე, ხოლო 310-მა მხარი დაუჭირა. კენჭისყრის მეორე უბანი, სადაც უმრავლესობა წინააღმდეგი იყო, იყო ნენეტი, რუსეთის შორეულ არქტიკაში.
რეფორმები მოიცავს ერთსქესიანთა ქორწინების აკრძალვას – ქორწინების განსაზღვრით, როგორც ქალსა და მამაკაცს შორის კავშირის, – ასევე მითითებას რუსეთის წინაპრების „ღმერთისადმი რწმენის“ შესახებ.
ინტერფაქსის ინფორმაციით, კენჭისყრის დასრულებამდე, შინაგან საქმეთა სამინისტრომ განაცხადა, რომ არანაირი დარღვევა არ მომხდარა, რაც გავლენას მოახდენს შედეგზე, თუმცა, დამოუკიდებელმა დამკვირვებელმა გოლოსმა განაცხადა, რომ მან მიიღო დაახლოებით 2,100 მოხსენება შესაძლო დარღვევების შესახებ.
საკონსტიტუციო ცვლილებების რამდენიმე ასეულმა მოწინააღმდეგემ მოსკოვში და სანკტ-პეტერბურგში საპროტესტო აქცია გამართა.
საბოლოო შედეგები აჩვენებს, რომ 65% -მა ხმა მისცა მოსკოვში ჩატარებულ რეფორმებს, ხოლო 77,6% სანკტ – პეტერბურგში.
რუსეთის პრეზიდენტი და მისი მომხრეები აცხადებენ, რომ მთლიანობაში, 200 – ზე მეტი ცვლილებაა საჭირო ეროვნული სტაბილურობის უზრუნველსაყოფად.
აღნიშნული ცვლილებები სამ კატეგორიად იყოფა: ეს არის კონსერვატიული იდეოლოგია, სოციალური კეთილდღეობა და ინსტიტუციები.
