სასმელი წყლის პრობლემა რომ ლანჩხუთის მუნიციპალიტეტისთვის აქტუალურია, ეს ახალი ამბავი არ არის. მაშინ, როცა ბუნებრივი რესურსებით და ადგილმდებარეობით, წესით, ეს პრობლემა არ უნდა არსებობდეს, მაინც არის ადგილები, სადაც წყალი, ფაქტობრივად, არ მიეწოდება მოსახლეობას. ამაზე საუბრობს ადგილობრივი მოსახლეობაც და მათი წარმომადგენლებიც ადგილობრივ წარმომადგენლობით ორგანოში.
საგულისხმოა, რომ ამ კუთხით წელს მნიშვნელოვანი პროექტი ხორციელდება ოთხ ტერიტორიულ ერთეულში, სადაც სასმელი წყლის პრობლემის მოსაგვარებლად გაერთიანებული წყალმომარაგების კომპანია ჩაერთო და ეს პირველი პრეცედენტია, როცა მოსახლეობას არატექნიკური, არამედ სასმელი წყლის მიღების საშუალება ექნება, თანაც გარანტიით, რომ წყალი აუცილებლად ექნება დასახლების ყველა მოსახლეს.
კერძოდ, პროექტის თანახმად, რომლის ღირებულებაც 21 000 000 ლარზე მეტს შეადგენს, ჯურუყვეთის (ბაღლეფი, ჯურუყვეთი, ეწერი), ღრმაღელის (ომფარეთი, წყალწმინდა, ღრმაღელე), აკეთის ( ქვემო აკეთი, გაგური, ჭანჭათი, ზემო აკეთი) ადმინისტრაციულ ერთეულებში და სოფელ წიაღობანში წყალმომარაგების სისტემების რეაბილიტაცია-მშენებლობის სამუშაოები უკვე აქტიურად მიმდინარეობს და პროექტის გახორციელების შედეგად, 7 ათასზე მეტ ადამიანს მოუგვარდება წყლის პრობლემა.
ამ ყველაფრის მიუხედავად, ლანჩხუთში არის დასახლებული პუნქტები, სადაც ეს პრობლემა ჯერაც აქტუალურია და მოსახლეობა მოგვარებას ითხოვს.
მაია კვარაცხელია: “ყველგან ვაკომენტარებ და პასუხს არავინ იძლევა. გრიგოლეთს როდის ექნება წყალი? თუ ისევ მარილიანი წყლის იმედზე ვიყოთ?!”
“ნიგვზიანი რატომ არაა ხსენებაში, წყალი არაა საჭირო ჩვენთან? როდის გვეღირსება წყალი?! რა დააშავა ამ სოფელმა _ არც გაზია და არც წყალი. დავიტანჯეთ ხალხი”, _ წყლის პრობლემის მოგვარებას ითხოვენ ნიგვზიანის მცხოვრებლებიც.
ლილი ფარსენაძე: “გვიმბალაურში კი დამყაყებული წყალი გვაქვს. ნაგავი მოდის ხოლმე წყალთან ერთად, დავავადდებით მალე ყველა. რამდენმა დატოვა სოფელი უწყლობის გამო. სოფელში პირიქით უნდა მიიზიდოთ ხალხი, მისცეთ ელემენტარული ცხოვრების შანსი”.
სწორედ ამ კუთხით არსებულ პრობლემაზე გააკეთა აქცენტი საკრებულოს ბოლო სხდომაზე დეპუტატთა ნაწილმაც.
“მისასალმებელია, რომ წყალმომარაგების კომპანია ლანჩხუთში სამუშაოებს ახორციელებს და ხომ არ იქნება უმჯობესი, სანამ ეს სამუშაოები დასრულდება, დროის მოგების მიზნით, დაპროექტება დავიწყოთ სხვა ადმინისტრაციულ ერთეულებში? მოგეხსენებათ, პროექტის მომზადებას დრო ჭირდება, მერე კი ექსპერტიზა უნდა გაიაროს, ამას კი დრო მიაქვს”, _ პრობლემაზე საუბრისას საკუთარი პოზიცია დააფიქსირა მმართველი გუნდის წევრმა საკრებულოში ზაზა წულაძემ.
ამის პასუხად წულაძეს კოლეგებმა განუმარტეს, რომ წყალმომარაგების კომპანია ტენდერს ერთიანად აცხადებს და წინასწარ თადარიგის დაჭერა არ გამოვა. მერმა ალექსანდრე სარიშვილმა კი, იდეის დონეზე მოიწონა დეპუტატის პოზიცია და იქვე განმარტა, რომ კომპანიასთან მიდის საუბარი, რომ უწყვეტ რეჟიმში, დამატებით კიდევ რამდენიმე სოფელში გახორციელდეს წყალმომარაგების პროექტი:
“იდეაში სწორია, რასაც ზაზა ამბობს და ვეთანხმები. დავიწყოთ იქედან, რომ მიმდინარე პროექტის გახორციელებით თითოეულ სოფელს ექნება 24-საათიანი წყალმომარაგება და პირველად მუნიციპალიტეტში მაღალი ხარისხის წყალი იქნება. ეს სამუშაოები სექტემბერში უნდა დასრულდეს, ნაწილი, შეიძლება _ უფრო ადრეც და უკვე აგვისტოდან მოხდეს ქსელში ჩართვა. მე მქონდა წყალმომარაგების კომპანიის ხელმძღვანელობასთან შეხვედრა და დავაყენე წინადადება, რომ არ მოხდეს შეჩერება და რამდენიმე სოფელი მიებას კიდევ. მაგალითად, სოფელ შუხუთის თემაა რეალური აკეთთან მიმართებაში. ვნახოთ, რას გვეტყვიან. მთავარია, რომ გაერთიანებული წყალმომარაგების კომპანია შემოვიდა. ივნისისთვის ველოდებით კომპანიის ხელმძღვანელობის ჩამოსვლას, დავსხდებით და ვისაუბრებთ. ქალაქში, გარკვეულ ადგილებში წყალგაყვანილობის სისტემებია შესაცვლელი და ამ კუთხით უნდა შესრულდეს სამუშაოები. გვინდა მეზობელი, ტრასისპირა სოფლების ჩართვაც ამ ქსელში, არის ამის რესურსი.
პროექტირება-მშენებლობას პირდაპირ კომპანია ახორციელებს. მთავარი, რაზეც ჩვენ ახლა ვმუშაობთ, არის ის, რომ 2024 წლისთვის რამდენიმე სოფელი იქნას ჩასმული”, _ განმარტა მერმა.
წყალწმინდის ადმინისტრაციული ერთეულის მაჟორიტარმა იკითხა, თუ როგორ გადაწყდება სოფელ ორმეთში წყლის პრობლემა, რაზეც მუნიციპალიტეტის პირველმა პირმა დააიმედა, რომ პირობა აუცილებლად შესრულდება და წყლის გარეშე დარჩენილ 80 ოჯახს წყალი აუცილებლად ექნება.
საკრებულოს თავმჯდომარის მოადგილემ, გიორგი ჩახვაძემ სოფელ გვიმბალაურის თემა წამოწია წინ და თქვა, რომ სოფლის დიდი ნაწილი წყლის გარეშეა დარჩენილი: “გადასარევია ტრასისპირა სოფლების პრობლემა თუ მოგვარდება, მაგრამ არც ის უნდა დაგვავიწყდეს, რომ გვიმბალაურში ტრასის იქეთ მცხოვრებ მოსახლეობას საერთოდ არ აქვს წყალი”.
როგორც ქალაქის მაჟორიტარის, კახა კვიტაიშვილის საუბრიდან გაირკვა, სასმელ წყალთან დაკავშირებული პრობლემა არც ქალაქშია ბოლომდე მოგვარებული. კერძოდ, საუბარია აგარაკის უბანში, კუპრეიშვილის ქუჩის რამდენიმე მცხოვრებზე, რომლებიც, რატომღაც, თავის დროზე, როცა ქალაქის წყალმომარაგების სისტემა გამოიცვალა, ოფსაიდში დარჩნენ და დღემდე ითხოვენ წყალმომარაგების საერთო ქსელში ჩართვას. კვიტაიშვილის პასუხად ლანჩხუთის მერმა განმარტა, რომ ეს პრობლემა მალე მოგვარდება და წყალმომარაგების კომპანია ქალაქს სრულად დაფარავს.
ავტორი
