საქართველო ტურისტებისთვის მიმზიდველი ქვეყანაა თავისი ბუნებრივი რესურსებით და ღირშესანიშნაობებით, მაგრამ, რაც შეეხება ინფრასტრუქტურას, ამ მხრივ, ძალიან ბევრი გამოწვევა არსებობს. განსაკუთრებით სავალალო სიტუაციაა სატრანსპორტო ინფრასტრუქტურის მხრივ, სადაც უცხოელი ვიზიტორები გადაადგილდებიან მთელი ქვეყნის მასშტაბით და მათი თვალით დანახული რეალობა მრავლისმეტყველია.
განსაკუთრებით აქცენტს ვაკეთებთ სარკინიგზო ინფრასტრუქტურაზე, რომელიც, რბილად რომ ვთქვათ, კრიტიკას ვერ უძლებს. მართალია, თავად სარკინიგზო ხაზებს, ასე თუ ისე, ყურადღება არ აკლია, სამაგიეროდ, სამგზავრო გადაზიდვებისა თუ მომსახურების კუთხით, არაფერი კეთდება. ეს, უპირველესად, სადგურებისა თუ ბაქნების შესახებ ითქმის და ლანჩხუთის მუნიციპალიტეტის მაგალითზე, იქ კატასტროფული მდგომარეობაა.
მართალია, ბოლო წლებში საქართველოს რკინიგზას დიდად არ ულხინდა და წაგებაზე იყო წლების განმავლობაში, მაგრამ რუსეთ-უკრაინის ომის შემდგომ გადაზიდვებმა საკმაოდ იმატა და რკინიგზის მოგების წილმაც მკვეთრი ზრდა განიცადა. იმედია, ეს ფაქტორი რამენაირად შეცვლის სარკინიგზო ინფრასტრუქტურის იმ სავალალო მდგომარეობას, რომელიც არ შეშვენის იმ ქვეყანას, რომელსაც ტურისტული ამბიცია გააჩნია.
მართალია, დღესდღეობით, ლანჩხუთის მუნიციპალიტეტის ტერიტორიაზე არსებული სადგურები თუ ბაქნები მგზავრთა ნაკადის მისაღებად მხოლოდ ადგილობრივი მნიშვნელობის მქონე სარკინიგზო ტრანსპორტს ემსახურება, საუბარია ე. წ. “ელექტრიჩკებზე”, მაგრამ “შტადლერის” მატარებლების მიმოსვლისას თვალთახედვის არეში დარჩენილი განადგურებული ინფრასტრუქტურის ხილვა არასასიამოვნო ფაქტია.
ჯერ კიდევ აკაკი ჩხაიძის დროინდელ პერიოდში გვახსოვს არსებული სადგურების და ბაქნების სარეაბილიტაციო სამუშაოები, როცა, ასე თუ ისე, ვიზუალურად მისაღები იყო ყველაფერი, მაგრამ მას შემდეგ დიდი დრო გავიდა და აღდგენა კი არა, ყველა ინფრასტრუქტურის გაპარტახება მოესწრო ისე, რომ იქ უბრალოდ ყოფნაც კი საშიშია. განსაკუთრებით ბაქნებზე ითქმის ეს, სადაც ფაქტობრივად არც შენობა-ნაგებობა არსებობს და არც სხვა რამ, ბაქნის ტერიტორია კი ჯაგნარს მიაქვს.
საკმაოდ რთული სიტუაციაა ლანჩხუთის სადგურის ტერიტორიაზე, სადაც, როგორც მგზავრების მოსაცდელი დარბაზი, ასევე, სადგურის მიმდებარე ინფრასტრუქტურა, დაუყოვნებლივ აღდგენას მოითხოვს. სავალალო მდგომარეობაშია საპირფარეშო, სადაც ანტისანიტარიის პიკია.
ცალკე თემაა სუფსის რკინიგზის სადგური, სადაც ისედაც არ იყო სახარბიელო სიტუაცია და ამას დაემატა მის მიმდებარე ტერიტორიაზე წლების წინ აღებული სარკინიგზო ხიდის კონსტრუქციების დასაწყობება, რომელმაც აუტანელი ანტისანიტარია გამოიწვია. ადგილობრივთა თქმით, აქაურობა ქვეწარმავლების ბუდედ იქცა.
ზემოთ ნახსენები რეალობიდან გამომდინარე “გურია ნიუსი” დაინტერესდა, რა გეგმები აქვს საქართველოს რკინიგზას ლანჩხუთის მუნიციპალიტეტის ტერიტორიაზე არსებული სარკინიგზო ინფრასტრუქტურის მოწესრიგების კუთხით და ამის თაობაზე განმარტებებისთვის უწყების პიარს მიმართა. თუმცა, გაზეთის დაბეჭდვის მომენტამდე საქართველოს რკინიგზისგან პასუხი არ მიგვიღია, თუ რა გეგმები აქვს უწყებას ლანჩხუთის მუნიციპალიტეტში სარკინიგზო ინფრასტრუქტურის მოწესრიგების კუთხით.
ჩვენ ამ თემას ისევ მივუბრუნდებით.
ავტორი
