გიორგი კვირიკაშვილის გადადგომის შემდეგ, დღის წესრიგში ახალი პრემიერის კანდიდატურა დადგა.
როგორც “გურია ნიუსს“ წყარომ აცნობა, ახალ პრემიერს პირადად ბიძინა ივანიშვილი შეარჩევს და დღეს დაგეგმილი საპარლამენტო უმრავლესობის სხდომა ერთგვარი ფორმალობა იქნება.
წყაროს ინფორმაციითვე, პრემიერის პოსტზე პარტია “ქართული ოცნების” თავმჯდომარე სამ კანდიდატურას განიხილავს _ ფინანსთა მინისტრს მამუკა ბახტაძეს; რეგიონული განვითარებისა და ინფრასტრუქტურის მინისტრს მაია ცქიტიშვილს და შინაგან საქმეთა მინისტრს გიორგი გახარიას.
„გურია ნიუსი“ იმის შესახებ, ვინ შეიძლება იყოს გიორგი კვირიკაშვილის ღირსეული შემცვლელი, პოლიტოლოგ სოსო ცინცაძეს ესაუბრა.
ცინცაძის თქმით, ოფიციალური ვერსიით კვირიკაშვილი ეკონომიკურ სიდუხჭირეს გადაჰყვა, მაგრამ ეს იქნება დროებითი ორთქლის გამოშვება, რადგან ხალხის უკმაყოფილების მუხტი არ შემცირდება
როგორც პოლიტილოგი ჩვენთან საუბარში ამბობს, რეგიონული განვითარებისა და ინფრასტრუქტური მინისტრს მაია ცქიტიშვილის პრემიერ-მინისტრად დანიშვნა საქართველოსთვის კიდევ ერთი წინ გადადგმული ნაბიჯი იქნება ევროპასთან დასახლოებლად.
„ერთ-ერთი კანდიდატი ქალბატონია და ეს პლიუსია გენდერული თვალსაზრისით, საქართველოს ისტორიაში პრემიერ-მინისტრი ქალი ჯერ არ ყოფილა. ევროპაში კი ქალები პრემიერ-მინისტრები და პრეზიდენტები უცხო არ არის. თუ ის პრემიერი გახდება შესაძლოა აღქმული იქნეს, როგორც ევროპისკენ გადადგმული კიდევ ერთი ნაბიჯი. მით უმეტეს, რომ მას ყველა აქებს და როგორც ამბობენ ივანიშვილიც დადებითი განწყობით გამოირჩევა მის მიმართ“,_ამბობს ცინცაძე.
პოლიტილოგის თქმით, შინაგან საქმეთა მინისტრს, გიორგი გახარიას დადებითი აქტივი აქვს და პრემიერად არჩევის შემთხვევაში არავის გაახსენდება, რომ სადღაც მიტინგზე მის გადადგომას ითხოვდნენ.
„დადებითი აქტივი გააჩნია დღევანდელ შინაგან საქმეთა მინისტრს, რომელმაც ამ კრიზისის პერიოდში, აქციების დროს სიმტკიცე გამოავლინა მისი წინამორდებისგან განსხვავებით. როცა ასეთი სერიოზული ცვლილებები ხდება, არავის გაახსენდება, რომ სადღაც მიტინგზე მის გადადგომას მოითხოვდნენ. გააჩნია კიდევ ვის გაიყოლებს კვირიკაშვილი. ამაზე ბევრი იქნება დამოკიდებული, რადგან გახარიაზე მეტად წულუკიანის გადაყენებას ითხოვდნენ“,_ამბობს ცინცაძე.
რაც შეეხება პრემიერობის კიდევ ერთ კანდიდატს, ფინანსთა მინისტრ მამუკა ბახტაძეს, პოლიტოლოგი თვლის, რომ მას დღემდე თავი არაფრით გამოუჩენია, თუმცა, არაფერს გამორიცხავს.
„მესამე კანდიდატურა ფინანსთა მინისტრია, რომელსაც თავი ჯერ არაფრით გამოუჩენია. ჩვენთან საკადრო სელექცია არ წარმოებს პირადი ღირსებების გამო, აქ უკვე 20 წელზე მთავარი პირადი ერთგულების პრინციპია. ჯერ ჩვენთან საქართველოში არ ჩამოყალიბებულა ცივილიზებული მექანიზმი საკადრო სელექციის. ამიტომ ვინ შეიძლება იყოს, ვინ შეიძლება არ იყოს საუბარი ძნელია“,_ამბობს ცინცაძე.
