31 ოქტომბერს, მე-10 მოწვევის პარლამენტის ასარჩევად გურიაში ამომრჩეველთა აქტივობამ 60 პროცენტს გადააჭარბა. აქედან უმრავლესობამ ხმა მმართველი გუნდისა და მათი მაჟორიტარი დეპუტატობის კანდიდატის სასარგებლოდ მისცა.
“ოცნება” მხარდამჭერებს მადლობას უხდის, ოპოზიცია კი გაყალბებებზე საუბრობს. ოპოზიციური პარტიების განცხადებით, ისინი პარლამენტში არ შევლენ.
ზოგადად, საარჩევნო დღემ გურიაში მშვიდად ჩაიარა. ჩოხატაურის ზოგიერთ საარჩევნო უბანზე, ძალიან თუ არ დააკვირდებოდით, დღის მეორე ნახევარში საარჩევნო უბნებთან სიცოცხლის ნიშან-წყალიც არ ჩანდა. ჩვენი დაკვირვებით, წინა წლებისგან განსხვავებით, ჩოხატაურში არ შეინიშნებოდა მიკროავტობუსებით პოზიცია-ოპოზიციის მხრიდან ამომრჩეველთა მობილიზება.
საარჩევნო უბნები, ჩვეულებრივ, დილის 8 საათზე გაიხსნა და ჩოხატაურის საოლქო-საარჩევნო კომისიის თავმჯდომარის, თემურ კუტუბიძის ინფორმაციით, კენჭისყრის პროცედურა ყველა საარჩევნო უბანზე რეკომენდაციების სრული დაცვით დაიწყო.
საარჩევნო დღეს სულ რამდენიმე საჩივარი დაიწერა და როგორც “გურია ნიუსს” ინფორმაცია მიაწოდეს, მხოლოდ პროცედურულ დარღვევებთან დაკავშირებით.
საბოლოოდ, არჩევნები, ისევე, როგორც საქართველოს თითქმის ყველა საარჩევნო ოლქში, ჩოხატაურშიც “ქართული ოცნებისა” და მისი დეპუტატობის კანდიდატის უპირატესობით დასრულდა, რის გამოც, მუნიციპალიტეტის მერმა ირაკლი კუჭავამ ამომრჩევლებს მადლობა ფეისბუქის საკუთარი გვერდიდან გადაუხადა.
“ქართული ოცნება – 57,19%
ვასიკო ჩიგოგიძე – 66,21%
დიდი მადლობა ჩვენს ამომრჩეველს კიდევ ერთხელ ერთგულებისთვის.
მადლობა არჩევნებში მონაწილე ყველა მოქალაქეს”, _ წერს ირაკლი კუჭავა.
საკუთარ ამომრჩევლებს მადლობა გადაუხადა ვასილ ჩიგოგიძემაც:
“ჩემო გურულებო, გილოცავთ გამარჯვებას! მადლობას გიხდით გამოცხადებული ნდობისთვის და მხარდაჭერისთვის!
უდიდესს პასუხისმგებლობას ვგრძნობ და თქვენი მხრიდან უპირობო მხარდაჭერა მეტ სტიმულს მმატებს.
მომდევნო ოთხი წლის განმავლობაში გავახორციელებთ პრიორიტეტულ პროექტებს, რომლებიც უშუალოდ თითოეული თქვენგანის კეთილდღეობაზე აისახება, ერთად გავაგრძელებთ მუნიციპალიტეტების განვითარებას და მაქსიმალურს გავაკეთებთ მოსახლეობის პრობლემების მოსაგვარებლად.
ჩემთვის უმნიშვნელოვანესი იყო თქვენი გვერდში დგომა, რომელსაც საარჩევნო კამპანიის დროს ვგრძნობდი, მადლობა კიდევ ერთხელ ნდობისთვის. მადლობას ვუხდი ჩემს პოლიტიკურ გუნდს, “ქართულ ოცნებას” და რეგიონულ შტაბებს”, _ აღნიშნულია ვასილ ჩიგოგიძის ოფიციალურ ფეისბუქგვერდზე.
ჩიგოგიძემ გამარჯვება ოზურგეთის საარჩევნო შტაბის წევრებთან ერთად ტორტით და შამპანურითაც აღნიშნა.
ლანჩხუთის N61 საარჩევნო ოლქში, სადაც ცენტრალური საარჩევნო კომისიის მონაცემებით, 28 785 ამომრჩეველია რეგისტრირებული, არჩევნებზე მისულ ადამიანთა უმრავლესობამ ნდობა მმართველ გუნდსა და მათ მაჟორიტარი დეპუტატობის კანდიდატს გამოუცხადა.
აღმოჩნდა, რომ ლანჩხუთში მაჟორიტართან შედარებით ნაკლები მხარდაჭერა მიიღო “ქართულმა ოცნებამ”, პარტიისადმი ნდობა 56% -ით განისაზღვრა. მეორე ადგილზე “გაერთიანებული ოპოზიცია” გავიდა, როგორც პროპორციული, ისე მაჟორიტარული შედეგების მიხედვით. ლანჩხუთის საარჩევნო ოლქში, როგორც მანუჩარ კვირკველიამ, ისე მისმა მხარდამჭერმა პარტიამ ხმების 20-20% აიღო.
რაც შეეხება “ევროპულ საქართველოს”, რომელმაც საპრეზიდენტო არჩევნების პირველ ტურში ლანჩხუთში მეორე შედეგი აჩვენა, ახლანდელი მონაცემების მიხედვით, მესამე ადგილზე გადაინაცვლა. “ევროპელებს” ლანჩხუთში ამომრჩეველთა 6%-მა დაუჭირა მხარი, ხოლო მის მაჟორიტარი დეპუტატობის კანდიდატს, ხათუნა გოგორიშვილს 7%-მა.
აღმოჩნდა, რომ ლანჩხუთის მასშტაბით, თანაბარი შედეგი დადო “პატრიოტთა ალიანსმა” და “ლელომ” _ ამ პარტიებსა და მათ დეპუტატობის კანდიდატებს 3-3-პროცენტიანი მხარდაჭერა აქვთ.
რაც შეეხება უშუალოდ ლანჩხუთსა და მის სოფლებში საარჩევნო პროცესის მიმდინარეობას, 38-ე საარჩევნო უბანი დილის რვა საათისთვის სრულ მზადყოფნაში იყო პირველი ამომრჩევლის მისაღებად და რაიმე სახის ექსცესებსაც ადგილი არ ჰქონია.
დილით, საარჩევნო უბნებზე და გარე პერიმეტრზე არც ე. წ. მაკონტროლებელთა სიმრავლე შეიმჩნეოდა და არც ამომრჩეველთა აქტივობა. საარჩევნო უბნების შიგნითაც სრული სიმშვიდე სუფევდა. ფაქტია, რომ მშვიდი ვითარება საარჩევნო უბნებზე, მთელი საარჩევნო პროცესის განმავლობაში გაგრძელდა. საღამოს საათებში უბნებზე ამომრჩევლების რაოდენობამ შედარებით იმატა, ზოგან რიგში დგომაც კი დაჭირდა ამომრჩეველს.
ლანჩხუთში სერიოზული დარღვევები არ აღნიშნულა, თუმცა, რამდენიმე საჩივარი მაინც დაიწერა. მაგალითად, ოლქში არჩევნების დღეს მყოფმა ოპოზიციის წარმომადგენელმა ლადო აფხაზავამ თქვა, რომ მან ორი საჩივარი დაწერა. მისი თქმით, უბნებიდან მოტანილ დალუქული დოკუმენტაციის სპეცპაკეტებს, პირდაპირ ოლქის წინ გლეჯდნენ და ახალ პაკეტში ათავსებდნენ. სწორედ ამის თაობაზე მიმართა აფხაზავამ ოლქს საჩივრით. თუმცა, როგორც ოპოზიციაში ამბობდნენ, ამ საჩივრის შემდეგ მათ წარმომადგენელზე ზეწოლის მოხდენას ცდილობდნენ, რომ გამოეტანა ის საჩივარი, რომელიც ზემოთ ნახსენები დოკუმენტაციის თაობაზე დაწერა.
ამ ფაქტთან დაკავშირებით საოლქო კომისიამ განმარტა, რომ მათთვის უცნობი იყო, რა ხდებოდა შენობის მიღმა და ისინი იმ უფლება-მოვალეობის შესრულებით იყვნენ დაკავებულები, რაც კანონით აქვთ მინიჭებული.
“გურია ნიუსთან” საუბარში სხვადასხვა უბნის რამდენიმე ამომრჩეველმა აღნიშნა, რომ უბანზე შესვლამდე მათთვის არ მომხდარა შემოწმება, ჰქონდათ თუ არა მარკირება: “პირადობა ვაჩვენეთ და ჩვეულებრივ შეგვიშვეს. არავის შეუმოწმებია, გვქონდა თუ არა მარკირება. ბიულეტენი რომ მოგვცეს, მაშინ კი გაგვიკეთეს, მაგრამ მანამდე არავის არაფერი შეუმოწმებია _ არ დაუნათებიათ თითზე, როგორც წინა არჩევნებისას ხდებოდა”.
ოპოზიცია ლანჩხუთში თანხმდება, რომ ეს არ იყო სამართლიანი და დემოკრატიული არჩევნები.
მათი თქმით, ადგილი ჰქონდა ადმინისტრაციული რესურსის არამართლზომიერ გამოყენებას, მოსყიდვებს, დაშინებებს, კრიმინალური სამყაროს წარმომადგენელთა გამწესებას ამომრჩეველთა ნების გასაკონტროლებლად, რაც, ტრადიციულად, ჩვენში ჩატარებული არჩევნების თანამდევი ატრიბუტიკაა. ამასთან,მსგავსი სარღვევების შესახებ საჩივრები არ დაფიქსირებულა.
ლანჩხუთში არჩევნებზე მიღებული შედეგებით კმაყოფილია მმართველი გუნდი და მხარდამჭერებს მადლობას უცხადებს:
“ძვირფასო ლანჩხუთელო ამომრჩევლებო, ყველამ ვიცით, თუ რა პრინციპული მნიშვნელობის იყო 31 ოქტომბრის საპარლამენტო არჩევნები. თქვენი ერთი ხმაც კი გადამწყვეტი იყო ჩვენი გუნდის, “ქართული ოცნება დემოკრატიული საქართველოს” გასამარჯვებლად.
დიდ მადლობას ვუხდი თითოეულ თქვენგანს. მადლობას გიხდით ერთგულებისთვის, თანადგომისთვის, მხარდაჭერისთვის.
ჩვენ ერთად გავიმარჯვეთ, ეს ჩვენი ერთობლივი გამარჯვებაა საქართველოს წინსვლისა და კეთილდღეობისთვის”.
რაც შეეხება ოზურგეთს, ოზურგეთის მუნიციპალიტეტის სოფლები, ნასაკირალი და ჭანიეთი რთულ უბნებად მოიაზრებოდა და მოიაზრება იმ კუთხით, რომ აქ სახელისუფლებო პარტიას უმრავლესობა მხარს არ უჭერდა. ძირითადად, ყველა არჩევნებზე გამარჯვებულ პოზიციაზე რჩებოდა “ნაციონალური მოძრაობა”. გარდა ამისა, ყოველი არჩევნების წინ ვრცელდებოდა ინფორმაცია, რომ ამავე უბნებზე ადგილი ექნებოდა ექსცესებს, სხვადასხვა დაპირისპირებას და ასე შემდეგ. ასე იყო ამ საპარლამენტო არჩევნების დაწყებამდეც.
“გურია ნიუსი” არჩევნების მიმდინარეობას ზემოთ აღნიშნულ ორივე უბანზე აკვირდებოდა. დასაწყისიდანვე გამოიკვეთა, რომ არჩევნები ძალიან მშვიდ გარემოში მიმდინარეობდა.
სოფელ ნასაკირალში ორი საარჩევნო უბანი იყო გახსნილი. ორივეგან, როგორც აქ მოსულმა ამომრჩევლებმა, კომისიების წევრებმა თუ “ერთიანი ნაციონალური მოძრაობის” ერთ-ერთმა ადგილობრივმა ლიდერმა ბესო ქათამაძემ გვითხრეს, პროცესი ძალიან მშვიდად მიმდინარეობდა:
_ არანაირი ექსცესი არ ყოფილა. დილიდანვე აქ ვარ. სიწყნარეა, ხომ ხედავთ თქვენც, სიმშვიდეა და ხალხის აქტივობაც მაღალია, _ გვითხრა ენმ-ს რაიონული ორგანიზაციის ერთ-ერთმა ლიდერმა ბესო ქათამაძემ, რომელიც ნასაკირალის მკვიდრია. მან, ასევე, აღნიშნა, რომ ყოველთვის მომხრეა, არჩევნები მშვიდ, წყნარ გარემოში ჩატარდეს, ადამიანებს ჰქონდეთ იმის უფლება და საშუალება, თავიანთი არჩევანი გამოხატონ ზეწოლის გარეშე.
ნასაკირალის ამომრჩევლებმა, ახალგაზრდებმა, განსაკუთრებით აღნიშნეს საარჩევნო პროცესის მშვიდად მიმდინარეობის შესახებ და თქვეს, რომ მომხრე არიან მხოლოდ სტაბილურობის და სიმშვიდის.
ნასაკირალის ორივე უბანზე დილიდანვე შეიმჩნეოდა ამომრჩეველთა აქტიურობა. განსაკუთრებით, ჭარბობდნენ ახალგაზრდები. ჩვენ არა ერთ მათგანს გავესაუბრეთ:
ბექა აბულაძე, 25 წლის: “კი არის პანდემია, მაგრამ ეს არ გვბოჭავს, რომ ხმა მივცეთ სასურველ კანდიდატს. ყველაზე ძალიან კი მშვიდი გარემო მომწონს, რაც აქ დილიდანვე სუფევს. მივესალმები წყნარ გარემოს, სადაც შიში არ იქნება და ყველა უპრობლემოდ გამოხატავს თავის არჩევანს”.
ბესიკ აბულაძე, 23 წლის: “მთავარია, იყოს სიმშვიდე. ჯერჯერობით, ყველაფერი კარგად მიდის. დიდი სურვილი გვაქვს, დღის ბოლომდე ასე გაგრძელდეს და არჩევნები მშვიდობიანად დასრულდეს. მინდა ყველამ დაინახოს, რომ ჩვენ ვართ მშვიდობიანი არჩევნების მომხრე”.
დათო ქათამაძე, 21 წლის: “დილით ხმის მისაცემად მოვედი და უკვე დავაფიქსირე ჩემი პოზიცია. აქ შევჩერდი. ჩემს მეგობრებს შევუერთდი და ვდგავართ წყნარად უბანთან, ვსაუბრობთ. როგორც ჩემმა მეგობრებმა თქვეს, სიმშვიდეა მთავარი და ყველა ამ აზრზე ვართ _ წყნარად, ზეწოლის გარეშე დააფიქსიროს ყველამ თავისი პოზიცია”.
_ ძალიან მშვიდი გარემოა. ერთი ხმამაღალი სიტყვა არ თქმულა. დილიდანვე მაღალია აქტივობა. ვისურვებდი, ასე დასრულდეს დღევანდელი დღე, _ გვითხრა ნასაკირალის 59-ე უბნის კომისიის თავმჯდომარემ.
ასევე გვითხრეს, რომ ნასაკირალის ცენტრში შეინიშნებოდა სპორტული აღნაგობის პირების გადაადგილება. თუმცა, მათ “გურია ნიუსთან” საუბრისას აღნიშნეს, რომ ადგილობრივი ამომრჩევლები არიან და არც ფოტოგადაღებაზე უთქვამთ უარი…
საბოლოოდ, ნასაკირალის ნომერ 59-ე უბანზე, როგორც ბოლო წლების მანძილზე ხდებოდა, გამარჯვება “ნაციონალურმა მოძრაობამ” მოიპოვა, რომელმაც 360 ხმა მიიღო. “ქართულმა ოცნებამ” _ 263 , ხოლო “ევროპულმა საქართველომ” 54 ხმა მოიპოვა. რაც შეეხება მაჟორიტარ კანდიდატებს, აქ “ნაციონალური მოძრაობის” კანდიდატმა მანუჩარ კვირკველიამ 374 ხმა მიიღო, მმართველი პარტიის კანდიდატმა, ვასილ ჩიგოგიძემ _ 284 ხმა, ხოლო “ევროპული საქართველოს” კანდიდატმა ხათუნა გოგორიშვილმა _ 57 ხმა.
რაც შეეხება სოფელ ჭანიეთს, აქაც, ისევე როგორც ნასაკირალში, ბოლო წლებში განსაკუთრებით, ყოველთვის “ნაციონალურ მოძრაობას” ჰყავდა მეტი მხარდამჭერი. თუმცა, წინა საპარლამენტო არჩევნებზე “ქართულმა ოცნებამ” გაიმარჯვა.
ახლანდელი საპარლამენტო არჩევნების წინ, ვრცელდებოდა ინფორმაცია, რომ აქ ადგილი ექნებოდა ექსცესებს _ ეს პარლამენტის თავმჯდომარემაც კი გაახმოვანა.
როგორც ცნობილია, “ნაციონალური მოძრაობის” ოზურგეთელი ლიდერები _ ბესო ქათამაძე და დავით მჟავანაძე, ნასაკირალის და ჭანიეთის მკვიდრები არიან. მათ თავიანთ სოფლებში ბევრი ჰყავთ მხარდამჭერი, განსაკუთრებით, ახალგაზრდები.
2020 წლის საპარლამენტო არჩევნები ჭანიეთში მშვიდ გარემოში ჩატარდა და აქ გამარჯვება პარტია “ქართულმა ოცნებამ” (334 ხმა) და მისმა კანდიდატმა ვასილ ჩიგოგიძემ (327 ხმა) მოიპოვეს. პარტია “ნაციონალურმა მოძრაობამ” _ 153 ხმა, ხოლო მისმა კანდიდატმა მანუჩარ კვირკველიამ 148 ხმა მიიღეს.
როგორც ადგილობრივები აღნიშნავდნენ, არჩევნები ძალზე მშვიდ გარემოში ჩატარდა.
_ ნაკლებად გვახსოვს ასე ზედმიწევნით მშვიდი არჩევნები. აქტივობაც საკმაოდ მაღალი იყო. ჭანიეთის 53-ე უბანზე სულ რეგისტრირებულია 810 ამომრჩეველი და გამოცხადდა 559 ადამიანი, _ გვითხრა 53-ე უბნის საარჩევნო კომისიის მდივანმა თამარ ზაქრაძემ.
