საპატრიარქოსა და საზოგადოების ნაწილის მწვავე პროტესტის მიუხედავად, პარლამენტი მარიხუანის კულტივაციასთან დაკავშირებული კანონპროექტის განხილვას ორ თვეში დაუბრუნდება.
მაღალჩინოსნები, რომლებიც აღნიშნული კანონპროექტის დაკანონებას ლობირებენ, საზოგადოებას არწმუნებენ, რომ კანონპროექტის მიღება საფრთხეებს არ შექმნის.
საზოგადოებრივი მღელვარების ფონზე, მაგალითად, შს მინისტრმა, გიორგი გახარიამ განაცხადა, რომ შს სამინისტრო ეფექტური კონტროლის განხორციელებას შეძლებს.
ამ და სხვა დაპირების მიუხედავად, გაურკვეველია, როგორ შეძლებს შს სამინისტრო ეფექტური კონტროლი გაუწიოს ნარკოტიკებისგან მომდინარე საფრთხეებს მაშინ, როცა, მაგალითად, ამავე უწყების თანამშრომელს, ცენტრალური კრიმინალური პოლიციის დეპარტამენტის ნარკოტიკების უკანონო ბრუნვის წინააღმდეგ ბრძოლის მთავარი სამმართველოს განყოფილების უფროსის მოადგილეს, გოგა გელაშვილს ნარკოტიკების შემოტანაში ედება ბრალი (გენერალური ინსპექციის თანამშრომლებმა აღნიშნული პიროვნება მიმდინარე წლის 26 მაისს დააკავეს. მის მიერ ჩადენილი დანაშაული 15-დან 20 წლამდე ან უვადო თავისუფლების აღკვეთას ითვალისწინებს).
პარლამენტში კანონპროექტის მიღებას დეპუტატთა ნაწილი ეწინააღმდეგება, ნაწილი კი მხარს უჭერს.
სადავო კანონპროექტზე ,,გურია ნიუსი“ პარლამენტის თავმჯდომარის მოადგილეს, ,,ქართული ოცნების“ დეპუტატ გია ვოლსკის ესაუბრა.
_ ბატონო გია, მარიხუანის კულტივაციის შესახებ კანონპროექტის მიღების შემთხვევაში, როგორ აპირებს ხელისუფლება გააკონტროლოს ნარკოტიკებთან დაკავშირებულ საფრთხეები მაშინ, როცა ამ საქმიანობით ის პირები აღმოჩდნენ დაკავებულნი, რომლებსაც ნარკოტიკებთან ბრძოლა ევალებათ?
_ ვფიქრობ, ამ შეკითხვას გააჩნია მკაფიო პასუხი, თუმცა თვითონ შეკითხვის რაკურსი არ არის ობიექტური. თუ ეს ადამიანი ჩართული იყო ამ უბედურებაში, ესე იგი, შს სამინისტროს რომ დაემალა, უფრო კარგი იქნებოდა?
რასაკვირველია, შს სამინისტროს ანგარიშზე არ არის მარტო ამ პიროვნების დაკავება.
ბოლო მონაცემების თანახმად, საკმაოდ გაძლიერებულია ანტინარკოტიკული საქმიანობა, მაგრამ მექანიზმები, რომლებსაც შს სამინისტრო გვთავაზობს და გვეუბნება, რომ საფრთხეების დაცვასთან დაკავშირებით იქნება სრული გარანტია, მხოლოდ ზედაპირული განცხადებებია.
ამ პოლიტიკის განხორციელების მექანიზმები საკმაოდ დეფიციტური გახდა. ამის თაობაზე შს მინისტრს უფრო დეტალურად უნდა ესაუბრა.
_ ხელისუფლების წარმომადგენლები აცხადებენ, რომ საზოგადოებამ, მათ შორის, სასულიერო პირებმა აღნიშნული კანონპროექტის შინაარსი კარგად ვერ გაიგეს. როგორ აპირებთ, საპატრიარქო, რომელიც კანონპროექტის ლობირების გამო, ხელისუფლებას დაუპირისპირდა, დააჯეროთ ამ კანონპროექტის ეფექტიანობაში?
_ დრამატიზება იმისა, რომ საპატრიარქო დაუპირისპირდა ხელისუფლებას, რეალურად არის ტრენდი, რომელსაც პოლიტიკური სპეკულაციის სუნი ასდის.
_ მაშინ, როცა საზოგადოებამ კანონპროექტის შინაარსის შესახებ შეიტყო, საპატრიარქო პროტესტის ნიშნად მსვლელობით საკრებულოსკენ გამოემართა, ეს არ იყო წინააღმდეგობის გამოხატულება?
_ თქვენ ისევ თქვენს ხაზს აგრძელებთ. ვამბობ, რომ არა მარტო საპატრიარქო, არამედ საზოგადოების გარკვეული ნაწილის აზრიც უნდა გავითვალისწინოთ. მე ეკლესიის მრევლი ვარ და ჩემთვის უმნიშვნელო არ არის საპატრიარქოს პოზიცია.
_ რაც შეეხება კანონპროექტზე მუშაობის შეჩერებას, რატომ გადადო პარლამენტმა მარიხუანის განხილვა ორი თვით? აღნიშნული ხომ არ უკავშირდება მოახლოებულ არჩევნებს?
_ განხილვის გადადება რომ თითქოს წინასაარჩევნო პერიოდთან არის დაკავშირებული, რასაკვირველია, აბსოლუტურად უსაფუძვლოა.
საერთოდ არ არსებობდა კომუნიკაცია საზოგადოების დაინტერესებულ ჯგუფებთან და ბევრი პოლიტიკოსიც ამ საკითხებში ბოლომდე არ იყო გარკვეული. მეორეც, რასაკვირველია, ამან ძალიან ნეგატიური რეაქცია გამოიწვია, რაც ცალკეული პოლიტიკური ჯგუფების სპეკულაციის საგნად გადაიქცა.
არ შეიძლება ზოგიერთი პოლიტიკური ჯგუფის შეძახილებით ან მკაცრი შეფასებების საფუძველზე ასე უთქმელად, დეტალური განხილვის გარეშე საკითხი დღის წესრიგიდან მოხსნა. გამოდის, რომ თავიდანვე ანტისახელმწიფოებრივი გადაწყვეტილების შემოტანა ჰქონდა განსაზღვრული მმართველ გუნდს, ამიტომ დროებით შეჩერდა ამ საკითხის განხილვა“, _ გვითხრა ვოლსკიმ.
საბოლოოდ, რა გადაწვეტილებას მიიღებს პარლამენტი კანაფის კულტივაციასთან დაკავშირებულ კანონპროექტზე, ჯერჯერობით, უცნობია.
