„ლევან მურუსიძეები და ჩინჩალაძეები არიან ადამიანები, რომლებიც „ნაციონალური მოძრაობის“ რეჟიმის ერთ-ერთი მთავარი ინსტრუმენტები და კუბლაშვილების მარიონეტები იყვნენ. ამ ადამიანებს არც განათლება აქვთ, არც კვალიფიკაცია და არც პოლიტიკური გონიერება. დამოუკიდებლობის ხარისხით კი ნულზე ქვემოთ იმყოფებიან“, _ აღნიშნა „გურია ნიუსთან“ პოლიტიკის ექსპერტმა ვახტანგ მაისაიამ.
მისივე თქმით, ირაკლი კობახიძის მიერ ინიცირებული კანონპროექტის დაკანონება, „ქართული ოცნების“ პოლიტიკურ კრახს გამოიწვევს.
_ ბატონო ვახტანგ, სამოქალაქო სექტორის მწვავე კრიტიკის მიუხედავად, „ქართული ოცნება“ ირაკლი კობახიძის მიერ ინიცირებულ კანონპროექტს, რომელიც უზენაესი სასამართლოს მოსამართლეების არჩევის პროცედურებს შეეხება, სრულ მხარდაჭერას უცხადებს. როგორ ფიქრობთ, აღნიშნული ინიციატივა სასამართლო სისტემის მიმართ ნდობის ამაღლებას ემსახურება?
_ირაკლი კობახიძის მიერ ინიცირებული კანონპროექტის დაკანონება „ქართული ოცნების“ პოლიტიკურ კრახს გამოიწვევს. სასამართლო სისტემაში არსებულმა კლანმა მართლმსაჯულება პოლიტიკურ არენად გადააქცია. ლევან მურუსიძეები და ჩინჩალაძეები არიან ადამიანები, რომლებიც „ნაციონალური მოძრაობის“ რეჟიმის ერთ-ერთი მთავარი ინსტრუმენტები და კუბლაშვილების მარიონეტები იყვნენ. ამ ადამიანებს არც განათლება აქვთ, არც კვალიფიკაცია და არც პოლიტიკური გონიერება. დამოუკიდებლობის ხარისხით კი ნულზე ქვემოთ იმყოფებიან. ფაქტობრივად, სასამართლოს დე ფაქტო კლანმა შექმნა პარტია, რომელსაც პარლამენტში ლობისტები ჰყავს ზარდიაშვილებისა და მათიკაშვილების სახით. როგორც ჩანს, მორჩილი მარიონეტები „ქართულ ოცნებასაც“ დასჭირდება, რაც მათივე პოლიტიკურ მომავალზე ცუდად აისახება.
_ პარლამენტის თავმჯდომარე, რომელიც საზოგადოებაში, მის მიერ გაკეთებული განცხადებების გამო, კარგი რეპუტაციით ვერ სარგებლობს და რომელსაც სასამართლო სისტემაში არსებული კლანის ლობირებაში სდებენ ბრალს, სასამართლო სისტემასთან დაკავშირებით საკუთარ პოზიციებს ახმოვანებს, თუ ბიძინა ივანიშვილის დაკვეთებს ასრულებს?
_ირაკლი კობახიძე, რომელიც ე.წ ზარდიაშვილების კლანს შეეკრა, ჩანს, რომ საკუთარ თამაშს თამაშობს. სასამართლო სისტემასთან დაკავშირებით მისი და ბიძინა ივანიშვილის მოსაზრებები ერთმანეთს ემთხვევა, ამიტომ ნაკლებად სავარაუდოა, რომ ის პირდაპირ „ქართული ოცნების“ თავმჯდომარის დაკვეთებს ასრულებდეს. კობახიძე რამდენად ძლიერი პარლამენტის თავმჯდომარეა, ამაზე კომენტარის გაკეთებაც ზედმეტია, რადგან ცხადია, რომ ის არაფრის მაქნისი პოლიტიკოსია. სასურველი იქნებოდა, პარლამენტის თავმჯდომარის იმპიჩმენტი დღის წესრიგში დამდგარიყო, რაც დღევანდელ ვითარებაში გამორიცხულია.
_იმ ფონზე, როცა მმართველ პარტიაში დეპუტატთა მოსაზრებები ერთმანეთს უფრო და უფრო სცილდება, 2020 წლის საპარლამენტო არჩევნებში მივიღებთ ისეთ კონფიგურაციას, სადაც „ქართული ოცნება“ პარლამენტში წარმოდგენილი უმცირესობით იქნება?
_ “ქართული ოცნება“ სერიოზული გამოწვევების წინაშე დგას. 2020 წლის საპარლამენტო არჩევნების შემდეგ მოქმედი მმართველი პარტია საკანონმდებლო ორგანოში უმრავლესობით წარმოდგენილი აღარ იქნება, რაც კარგია. „ქართული ოცნების“ უმრავლესობამ ისიც ვერ შეძლო, რომ პოსტიდან ზვიად კვაჭანტირაძე გადაეყენებინა, რაც გუნდში არსებულ რთულ ვითარებაზე მეტყველებს. 2020 წლის პარლამენტი საკმაოდ ჭრელი და ოდიოზური იქნება. საქართველო „ქართული ოცნების“ ერთპარტიული მმართველობისგან დაიღალა და აუცილებელია, რომ მმართველ პარტიას საპარლამენტო არჩევნების შემდეგ ხელისუფლების მართვაზე მონოპოლია აღარ ჰქონდეს და ქვეყანა ერთპარტიული მმართველობისგან გათავისუფლდეს. ამჟამად „ქართლი ოცნება“ ცდილობს, როგორმე პარლამენტი 2020 წლის არჩევნებამდე მიიყვანოს. ქვეყანაში ვადამდელი არჩევნების ჩატარება ისეთ პოლიტიკურ გარემოში, სადაც ძლიერი პარტიები არ ჩანან, კრიზისის გამომწვევი იქნება.
_ „ნაციონალური მოძრაობა“, რომლის მხარდამჭერთა რაოდენობა „ქართული ოცნების“ მმართველობის პირობებში გაზრდილია, 2020 წლის საპარლამენტო არჩევნებში ხმათა მაღალი რაოდენობის მოგროვებას შეძლებს?
_ „ნაციონალურ მოძრაობაში“ საკმაოდ სერიოზული რღვევა და კრიზისია. არჩევნებში თუ როგორ გადანაწილდება მათი ხმები, მიმდინარე პროცესები გვიჩვენებს. 2020 წლამდე ახალი პარტიების გამოჩენის შემთხვევაში, შესაძლოა, „ნაციონალური მოძრაობა“ ბორდს მიღმა დარჩეს და „მოქალაქეთა კავშირის“ ბედი გაიზიაროს.
_საქართველოს პრეზიდენტი სალომე ზურაბიშვილი მიიჩნევს, რომ 2008 წლის აგვისტოს ომის შემდეგ საქართველოსა და რუსეთს შორის შექმნილი ჟენევის საერთაშორისო მოლაპარაკებების ფორმატი, რომელიც 2008 წლის 12 აგვისტოს ცეცხლის შეწყვეტის შეთანხმების შესაბამისად არის მიღებული, უნდა გადაიხედოს. როგორ ფიქრობთ, აღნიშნული ფორმატი ქვეყნებს შორის არსებული ვითარების ფონზე, რამდენად ეფექტურია?
_ ჟენევის ფორმატში ქართული დიპლომატია აუცილებლად უნდა გააქტიურდეს. ამ ფორმატში ქართული მხარე ძალიან პასიური, არაადეკვატური და არაკომპეტენტურია. უინიციატივო და უღიმღამო მოლაპარაკებების ფონზე, თუ ქართული მხარე არ გააქტიურდება, კიდევ უფრო რთულ ვითარებას მივიღებთ. საქართველოს პრეზიდენტმა აჩვენა, ქართველმა დიპლომატიამ როგორ უნდა იმუშაოს. სალომე ზურაბიშვილმა გამოიჩინა პრინციპულობა და მეზობელი ქვეყნების ლიდერებთან ისეთი მნიშვნელოვანი თემები გამოაცოცხლა, რომლებიც ჩვენი ხელისუფლების მხრიდან აბსოლუტურად უყურადღებოდ იყო დატოვებული, რასაც დადებითად ვაფასებ.
