მმართველი გუნდი საქართველოში ნარკოპოლიტიკის ლიბერალიზაციის მიმართულებით, საკანონმდებლო პაკეტის ინიცირებას პარლამენტის საგაზაფხულო სესიის ბოლომდე მოახდენს, რომლის გათვალისწინებით, ერთი მხრივ, ნარკოდამოკიდებული ადამიანებისთვის კონკრეტული სერვისები იქნება გათვალისწინებული, მეორე მხრივ კი, ნარკოგამსაღებლებისთვის სასჯელები კიდევ უფრო გამკაცრდება.
საზოგადოებრივს პარლამენტის ჯანდაცვის კომიტეტის თავმჯდომარე აკაკი ზოიძე განუმარტავს, რომ მომზადებული საკანონმდებლო პაკეტი მსოფლიოში აღიარებულ ოთხსვეტიან ნარკოპოლიტიკას ეფუძნება, რომელზეც მუშაობა ბოლო ოთხი თვის განმავლობაში მიმდინარეობდა და 41 არასამთავრობო ორგანიზაციის ჩართულობით მომზადდა.
ზოიძე ამბობს, რომ ახალი ინიციატივა ბევრად უფრო თამამ და გაბედულ ნაბიჯებს მოიცავს, მათ შორის, ამნისტიას.
დეპუტატის ცნობით, ნარკოპოლიტიკასთან მიმართებაში მსჯელობის საგანი იქნება ის, თუ სად გადის ზღვარი – პირად მოხმარებასა და გასაღებას შორის.
„ოთხსვეტიანი პოლიტიკა რომ განვახორციელოთ, ამისათვის საკანონმდებლო ცვლილებები იმ გზით უნდა წავიდეს, რომ მცირე ოდენობის მოხმარებისთვის, ან მცირე ოდენობის შენახვა-მოხმარების მიზნით, ადამიანი საპატიმრო სასჯელისგან უნდა გათავისუფლდეს. ზოგადად, შეიძლება, პირადი მოხმარებისთვის ორი-სამი ექსტაზი იყოს, მაგრამ ათი აბი ვერ იქნება. ზღვარი სად უნდა გავიდეს მოხმარებასა და გასაღებას შორის, ეს ძალიან მნიშვნელოვანია. 260-ე მუხლში საპატიმრო სასჯელები მკვეთრად განსხვავდება და ძალიან მნიშვნელოვანია, რომ საკითხზე ჩამოვყალიბდეთ, რადგან ამაზე იმ ადამიანების ბედია დამოკიდებული, რომლებიც დღესაც საპატიმროში სხედან.
გადაწყვეტილებაზე თუ სად გავავლებთ ზღვარს, დამოკიდებულია ის, რომ შეიძლება, ბევრი ადამიანი ციხიდან გათავისუფლდეს და ამ კანონმდებლობის მიღებით ჰუმანური აქტიც მოხდეს. თუ ეს კანონპროექტი მიღებული იქნება, ამ შემთხვევაში, ახალი გარემოებების საფუძველზე, მათი საქმეების გადახედვა მოხდება და მათთვის შედეგი იმით დადგება, რომ ან პატიმრობიდან გათავისუფლდებიან, ან ნაწილს ვადა მოხდილი ექნება, ან ნაწილს სასჯელი გაუუქმდება“, – აცხადებს დეპუტატი.
ზოიძის განცხადებით, მას შემდეგ, რაც საკანონმდებლო პაკეტი იქნება მიღებული, პირობა იქნება დადებული და საპატიმრო სასჯელის გაუქმება ძალაში ერთი წელი მანამდე არ შევა, სანამ ყველა სერვისი გამზადებული არ იქნება. მათ შორის ექიმების გადამზადება მოხდება.
„როგორც კი, საპატიმრო სასჯელს გავაუქმებთ, საკითხი დადგება, რომ ამ ხალხს რა ვუყოთ? – ამ ადამიანებისთვის სერვისები გამზადებული უნდა იყოს. საპატიმრო სასჯელის გაუქმების ნაწილი ერთი წელი არ ამოქმედდება, მაგრამ დანარჩენი, რაც კონკრეტული ადამიანების ბედზე იმოქმედებს, რომლებიც საპატიმროში სხედან, ეს დაუყონებლივ იმოქმედებს, როგორც კი ცვლილებებს მივიღებთ“, – აღნიშნავს ზოიძე.
კანონმდებელი ოთხსვეტიანი ნარკოპოლიტიკის ლიბერალიზაციის განმარტების ფონზე, ყურადღებას იმაზე ამახვილებს, საქართველოში თუ რატომ უნდა გადაიხედოს არსებული ნარკოპოლიტიკა.
„წარსულის გამოცდილებამ აჩვენა, რომ საპატიმრო სასჯელი არ აკავებს და ბოლო წლებში, ნარკოტიკების მომხმარებელთა რაოდენობა იზრდება, ან სტაბილურდება, ან მაინც იზრდება. მთელ მსოფლიოში იგივე პრობლემაა, რის გამოც მიდგომა დაბალანსებული, ოთხსვეტიანი პოლიტიკის სასარგებლოდ შეიცვალა. ყველა საერთაშორისო ორგანიზაცია მოგვიწოდებს, რომ ამ გზით წავიდეთ“, – განაცხადა ზოიძემ.
რაც შეეხება ოთხსვეტიან ნარკოპოლიტიკას, პარლამენტის ჯანდაცვის კომიტეტის თავმჯდომარე სვეტებს ნაწილ-ნაწილ განმარტავს:
პირველი სვეტი – „ეს არის პრევენცია, რომელიც ნარკოპოლიტიკის ფუნდამენტია. პრევენცია ერთადერთი დასაბუთებული გზაა, სადაც საერთაშორისო გამოცდილებამ აჩვენა, რომ მხოლოდ პრევენციის მეშვეობითაა შესაძლებელი ნარკომომხმარებელთა რაოდენობის შემცირება იმის ხარჯზე, რომ მომავალი თაობები ამ მანკიერ წრეში არ ებმებიან. პრევენცია ერთჯერადად მხოლოდ იმის თქმა არ არის, რომ ნარკოტიკები მავნებელია. ეს ძალიან კარგად გათვლილი სტრატეგიაა, სადაც საგანმანათლებლო პროგრამებია ჩართული. ბავშვებამდე საკითხის მიტანა შესაბამისი, დახვეწილი გზავნილებით ხდება, რადგან ეს თემა ცნობისმოყვარეობის საბაბად არ უნდა იქცეს. სამწუხაროდ, სკოლაში სავალდებულო ერთი გაკვეთილიც კი არ არის და ეს მიდგომა უნდა შეიცვალოს. თუ გვინდა, რომ ამ პრობლემას რეალური მეთოდები დავუპირისპიროთ, ქვეყანამ ნარკომოხმარების პრევენციაში თანხობრივი ინვესტიცია უნდა მოახდინოს. პრევენციაში ცხოვრების ჯანსაღი წესი და მასობრივი სპორტი შედის“.
მეორე სვეტი – „მკურნალობაა, რომელიც იმას მოიცავს, რომ თუ ადამიანი მანკიერ წრეში მაინც მოხვდა და ნარკოდამოკიდებული გახდა, ეს ადამიანები ფსიქოლოგიურ და სამედიცინო დახმარებას საჭიროებენ. საუბარია – საინექციო ნარკოტიკებზე, რომელიც მაღალ ფიზიკურ დამოკიდებულებას იწვევს და ამ დამოკიდებულებისგან გათავისუფლება მხოლოდ ნებისყოფით შეუძლებელია. ეს ადამიანები ფსიქოლოგიურ და სამედიცინო დახმარებას საჭიროებენ. რეაბილიტაციის ექვსთვიანი კურსის შეთავაზება მოხდება მათთვის, ვინც უკვე ნარკოდამოკიდებულია და იმისკენ უბიძგებს, რომ გამრუდებული გზა გაასწოროს“.
მესამე სვეტი – „ზიანის შემცირებაა. ეს იმ კატეგორიისთვის არის, ვინც ეს მანკიერი ჩვევა ვერ დაძლია, ან ძალიან შორს წასული შემთხვევა ვლინდება. მსგავსი კატეგორიის ადამიანის ჩანაცვლებით თერაპიაზე გადაყვანა მოხდება, რათა ის კრიმინალში არ ჩაერთოს და მისთვის მეტადონის ჩანაცვლების პროგრამა ხელმისავწდომი იყოს. ეს იმისთვის კეთდება, რომ ამ ადამიანმა საზოგადოების წინააღმდეგ დანაშაული არ ჩაიდინოს, რომ ფული იშოვოს და არალეგალურ ბაზარზე წამალში გადაიხადოს“.
მეოთხე სვეტი – „ამ სვეტში სამართალდამცავი ქმედებებია გათვალისწინებული. ეს სვეტი მიმართული ნარკოტიკების უკანონო ბრუნვასა და ნარკოგამსაღებლებზე უნდა იყოს და ამ მხრივ არანაირი კომპრომისი არ იქნება. პირიქით, გამკაცრებას ვთავაზობთ იმ კუთხით, რასაც სააფთიაქო ნარკომანია ჰქვია. ანუ, ფსიქოტროპული პრეპარატების ურეცეპტოდ გაცემა დაისჯება, რომელიც ნარკოდანაშაულის კატეგორიაში გაერთიანდა. ვინც ამას გააკეთებს, ეს იქნება აფთიაქის დირექტორი თუ სხვა, მას რვაწლიანი საპატიმრო სასჯელი დაემუქრება. არ მგონია, რომ რომელიმე ჭკუათმყოფელი ადამიანი ასეთ რისკზე წავა, რომ ამისთვის მცირე მოგება მიიღოს. ეს ძალიან მავნე და სახიფათო ტენდენციაა, რაც აქამდე იყო, მისი შეკავება გარკვეულწილად შევეცადეთ, მაგრამ იმისათვის, რომ ეს პრობლემა აღმოვფხვრათ, ეს ცვლილებები მომზადდა“.
ნარკომომხრებლისთვის დასაწესებული სავარაუდო საკანონმდებლო აკრძალვები
„პირველი ისაა, რომ ნარკოდამოკიდებული ადამიანი კი არ დაისაჯოს, მას ვუმკურნალოთ, მასზე ვიზრუნოთ და დავეხმაროთ, საჭიროების შემთხვევაში კი, უფლებრივად შევზღუდოთ, რადგან ისე რომ არ იყოს, რომ ბოლოს, მინდა და მოვიხმარ გამოვიდეს. სახელმწიფო ნარკომომხმარებელს მკურნალობას და რეაბილიტაციას სთავაზობს, ნარკოდამოკიდებული კი, ამაზე ან არ მიდის, ან მიდის და მაინც მოიხმარს.
ის მექანიზმები იქნება გათვალისწინებული, რითაც მას უფლებები შეეზღუდება. არსებული მექანიზმები დაიხვეწება და საუბარი იქნება იმაზე, რომ ასეთი ადამიანი მუშაობას საჯარო სამსახურში ვერ დაიწყებს, მას მართვის მოწმობა არ მიეცემა, დიდ დამსაქმებლებში ვერ დასაქმდება და ა.შ. ეს ისეთი პრინციპი იქნება, რომ თუ თქვენ გინდათ, არჩევანი გააკეთეთ და ამ ჩვევისგან გათავისუფლდით, მაგრამ თუ არ გინდათ, რომ გათავისუფლდეთ, კეთილი ინებეთ და საჯარო მაღალი ინტერესის გამო, თქვენი ცხოვრება შეზღუდული იქნება და ეს თქვენი არჩევანია. წინააღმდეგ შემთხვევაში ისე გამოვა, რომ ნარკოტიკებს პოპულარიზაციას ვუკეთებთ და ვამბობთ, მიდით, მოიხმარეთ და ცხოვრებაში არანაირი პრობლემა არ შეგექმნებათ. ყველაფერს თავისი ფასი აქვს და კანონმდებლობა ამ პრინციპით უნდა იყოს“.
მას შემდეგ, რაც პარლამენტში ნარკოპოლიტიკის მიმართულებით საკანონმდებლო პაკეტის ინიცირება მოხდება, თავდაპირველად, მასზე მსჯელობა კომიტეტების ფორმატში მოხდება, საბოლოო მიღება კი, საშემოდგომო სესიაზე იგეგმება.
1tv.ge
