ლანჩხუთის მუნიციპალიტეტის საპრივატიზაციო ობიექტთა ნუსხაში ის 25 ობიექტი მოხვდა, რომელთა რეალიზებაც გამგეობას შესაძლებლად მიაჩნია. თუმცა, აღმოჩნდა, რომ ამ საკითხთან დაკავშირებით განსხვავებული ხედვა აქვთ საკრებულოს ზოგიერთ წევრს.
გამგეობის ქონების მართვის, ეკონომიკისა და სოფლის მეურნეობის განვითარების სამსახურის უფროსის, გოგი ფაცურიას მიერ წარმოდგენილ საპრივატიზაციო ნუსხაშია მოხვედრილი სოფელ შუხუთის ცენტრში მდებარე ყოფილი კულტურის სახლის შენობა, რომელიც წლებია უფუნქციოა. ამ შენობის სამომავლო დანიშნულებასთან დაკავშირებით, ადგილობრივი ხელისუფლების მხრიდან, წინა წლებში არაერთხელ ჟღერდებოდა სხვადასხვა წინადადება. იყო მოსაზრება, ლელოს თამაშის ტრადიციიდან გამომდინარე, აქ ბინა ტრადიციების მუზეუმს დაედო. თუმცა, საქმე მხოლოდ საუბრებით შემოიფარგლებოდა.
ამ ეტაპზე კი, შუხუთის მაჟორიტარი დეპუტატისთვის გაუგებარი დარჩა, თუ რატომ მოხვდა ეს შენობა-ნაგებობა გამგეობის მიერ წარმოდგენილ საპრივატიზაციო ნუსხაში. აკაკი იმნაიშვილის თქმით, მას ამ შენობის საკითხზე საუბარი ჰქონდა მუნიციპალიტეტის გამგებელთან, რომელსაც ქონების მართვის სამსახურის უფროსიც ესწრებოდა:
“საინტერესოა, რატომ მოხდა პრივატიზების ნუსხაში ყოფილი კულტურის სახლის შენობა. ამ საკითხზე გოგი ფაცურიასთან ერთად, მე საუბარი მქონდა გამგებელთან და ვიცოდი, რომ ამ შენობას ექსპერტიზა უნდა ჩატარებოდა და შემდეგ მიღებულიყო გადაწყვეტილება აქ სოფლისთვის მნიშვნელოვანი რამ გაკეთებულიყო, თავად ადგილობრივი მოსახლეობის ინტერესებში შედის ამ შენობის ბედი”, _ ამბობს იმნაიშვილი.
გოგი ფაცურიას განმარტებით, ეს შენობა საპრივატიზაციო ნუსხაში მანამდე იყო შეტანილი, სანამ სოფლის მაჟორიტარსა და გამგებელს შორის აღნიშნული საუბარი შედგებოდა, ამიტომაც, მანამ ექსპერტიზის დასკვნა არ იქნება, ეს შენობა არ გასხვისდება:
“უკვე მოწვეულია სამხარაულის საექსპერტო ბიურო, სანამ იქიდან დასკვნა არ ჩამოვა, შენობა აუქციონზე არ გავა”, _ ამბობს ფაცურია.
კიდევ ერთი საკრებულოს წევრი, რომელიც საპრივატიზაციო ნუსხიდან ერთ-ერთი ობიექტის ამოღებას ითხოვს, გიორგი ჩახვაძეა _ მას შენიშვნა ჩიბათის ყოფილი ადმინისტრაციული შენობის შესაძლო გასხვისებასთან დაკავშირებით ჰქონდა.
“ძალიან მაინტერესებს, რა ხდება ამ შენობასთან დაკავშირებით. ჩემი წინადადებაა, ეს დამწვარი შენობა საერთოდ ამოვიღოთ საპრივატიზაციო ნუსხიდან, რადგან მაქვს ინფორმაცია, რომ იქ შესაძლებელია იუსტიციის სახლი გაიხსნას. მაჟორიტარი დეპუტატის ბიურომ უკვე დააყენა ეს საკითხი”, _ საკუთარი არგუმენტი შესთავაზა გამგეობას ჩახვაძემ და ისიც იკითხა, როდემდე უნდა იყვნენ ქოლგის ქვეშ შეხიზნული სოფლის რწმუნებული და მისი თანაშემწე.
“იყო საუბარი, რომ სოფლის ადმინისტრაციისთვის ყოფილი მედპუნქტის შენობა გადაეცათ, სანამდე უნდა იყოს სოფლის რწმუნებული და მისი თანაშემწე ქოლგის ქვეშ?!” _ ამბობს ჩახვაძე, რომლის წინადადებაც, რომ საპრივატიზაციო ნუსხიდან ამოეღოთ ჩიბათის ყოფილი ადმინისტრაციული შენობა, მისაღები დარჩა მმართველი რგოლისთვის.
სხვათა შორის დეპუტატები იმ უფუნქციო შენობების ბედითაც ინტერესდებიან, რომლებიც ამ ჯერზე საპრივატიზაციო ნუსხას მიღმაა დარჩენილი.
როგორც საკრებულოს წევრმა ამირან ქანთარიამ აღნიშნა, არის დაინტერესება ქალაქის ცენტრში მდებარე ყოფილი რესტორნის შენობის მიმართ: “საკმაოდ ახლო ურთიერთობა მაქვს იუსტიციის სამინისტროს მაღალი რანგის თანამდებობის პირებთან, რომლებმაც ნახეს რა ყოფილი რესტორნის შენობა, არიან დაინტერესებულები, რომ მის ადგილზე იუსტიციის ახალი სახლი გააკეთონ”.
შენობაში, რომელზეც ქანთარია საუბრობს, წლების წინ რესტორანი ფუნქციონირებდა. თუმცა, როგორც ამას სპეციალისტები განმარტავენ, გარდა იმისა, რომ ეს შენობა საფრთხის შემცველია და, ფაქტობრივად, აღდგენას აღარ ექვემდებარება, მარტივად ამ შენობასთან დაკავშირებით რაიმე სახის გადაწყვეტილების მიღება შეუძლებელია, რადგან იგი რამდენიმე სუბიექტს შორის დავის საგანს წარმოადგენს.
გოგი ფაცურიას თქმით, ამ შენობის გამო დაკავშირებით სასამართლო დავა მიმდინარეობს სახელმწიფოსა და კერძო პირს შორის:
“ჩემთვისაც გაუგებარია, რამდენ ხანს უნდა გაგრძელდეს ასე. უკვე მერამდენე წელია გარკვეული არაა, ვინ არის შენობის მესაკუთრე. რაც შეეხება იუსტიციის სახლის მშენებლობას, საუბარი იყო ყოფილი კომისარიატის შენობაზე, რომელიც ადრე ეკონომიკის სამინისტროს ბალანსზე იყო, ახლა კი იუსტიციის სამინისტროსთვის გადაუციათ”, _ განმარტავს ფაცურია.
საკრებულოს წევრებმა, თავმჯდომარის _ გოგი ხელაძის ხელმძღვანელობით, ქალაქის ტერიტორიაზე მდებარე რამდენიმე უფუნქციო შენობა მოინახულა და საკუთარი მოსაზრებებიც დააფიქსირეს მათ სამომავლო ბედთან დაკავშირებით.
დეპუტატთა თვალთახედვის არეალში მოხვდა ქალაქის ცენტრში მდებარე ის უსახური შენობაც, სადაც წლების წინ მეთესლეობის ინსპექცია იყო განთავსებული, ახლა კი შენობა სარგებლობის უფლებით სატყეო სააგენტოს აქვს მიკუთვნებული.
საკრებულოს წევრთა თქმით, უკვე დასმულია საკითხი, რომ ეს უფუნქციოდ დარჩენილი შენობა მუნიციპალიტეტის ბალანსზე გადავიდეს, ჩაუტარდეს რეაბილიტაცია და მასში ჭადრაკის სახლი განთავსდეს.
გარდა ამისა, მონიტორინგის მონაწილე დეპუტატებს მიაჩნიათ, რომ მუნიციპალური განვითარების გრძელვადიან პერსპექტივაში აუცილებლად უნდა იყოს გათვალისწინებული ყოფილი სკოლა-ინტერნატის შენობის რეაბილიტაცია და მასში საცხოვრებელი ფართის მოწყობა. დეპუტატთა მოსაზრებით, ამ პროექტის გახორციელებით შესაძლებელი იქნება მუნიციპალიტეტში რეგისტრირებული ეკომიგრანტებისა და უსახლკარო ოჯახების, რომლებიც ამ ეტაპზე მუნიციპალიტეტის სოციალურ პროგრამაში არიან ჩართულები, საცხოვრებელი ფართით დაკმაყოფილება.
ყოფილი სკოლა-ინტერნატის საკითხის დროულ გადაწყვეტას ითხოვენ მიმდებარე ტერიტორიაზე მაცხოვრებლები.
“საჭიროა, დროულად მოხდეს აქაურობის დემონტაჟი, სანამ რაიმე უბედურება მომხდარა. აქვე სკოლაა, მრავალსართულიანი ბინები, ბავშვები შედიან ამ ნანგრევებში. ზოგს აგური გააქვს აქედან. საშიშია არ ჩამოენგრეს ვინმეს თავზე კედელი და ნანგრევებში არ მოყვეს. მერე გვიან იქნება მწუხარების გამოთქმა”, _ ამბობს აქაური მოსახლეობა.
