საქართველოს მთავრობამ ოქტომბრის ბოლოს აზარტულ თამაშებთან დაკავშირებით პარლამენტს საკანონმდებლო ინიციატივით მიმართა. ფინანსთა სამინისტროს მიერ მომზადებული პროექტი აზარტულ თამაშებზე გარკვეული რეგულაციების ამოქმედებას ითვალისწინებს. კერძოდ, საკანონმდებლო ორგანოში ინიცირებული კანონ-პროექტის მიხედვით, აზარტული თამაშები ნებადართული 18-ის ნაცვლად, 21 წლის ადამიანისთვის იქნება. რეგულაციას ემატება აზარტულ თამაშებზე დამოკიდებული ადამიანების სია, სადაც განთავსებული იქნება თამაშებზე დამოკიდებული პირთა მონაცემების ბაზა. გარდა ამისა, რეგულაციას ემატება აზარტულ თამაშებზე დამოკიდებული ადამიანების სია, სადაც განთავსებული იქნება თამაშებზე დამოკიდებულ პირთა მონაცემთა ბაზა.
რეგულაცია ონლაინ კაზინოებსაც შეეხება. 2018 წლის პირველი იანვრიდან ონლაინ კაზინოების მფლობელები ვალდებული იქნებიან, ელექტრონული ფორმით ორგანიზებულ თამაშში მონაწილეობა მხოლოდ შემოსავლების სამსახურის მიერ რეგისტრირებულ მოთამაშეს მიაღებინონ. მოთამაშეთა პერსონალური ინტერნეტ ანგარიშები (დეპოზიტები) ძალაში 2017 წლის 31 დეკემბრიდან შევა. დარეგისტრირებულ მოთამაშეთა რეესტრს შემოსავლების სამსახური აწარმოებს.
2016 წელს ,,საერთაშორისო გამჭვირვალობა-საქართველოს“ მიერ ჩატარებული კვლევის მიხედვით, მოსახლეობის 6% აზარტული თამაშებითაა დაკავებული, მათ შორის უმრავლესობა უპირატესობას ონლაინ ტოტალიზატორს ანიჭებს. მოსახლეობის 2%-აცხადებს, რომ აზარტული თამაშების გამო, მას ან მის ოჯახის წევრს მნიშვნელოვანი ფინანსური პრობლემა ჰქონდა. კვლევის შედეგების მიხედვით, მოსახლეობის დიდი ნაწილი (92%) უარყოფითად არის განწყობილი ამ ინდუსტრიის მიმართ და მიაჩნიათ, რომ ის საერთოდ უნდა აიკრძალოს ან შეიზღუდოს. ორგანიზაციაში აღნიშნავენ, რომ ამ საკითხზე არ არსებობს სახელმწიფოს მიერ წარმოებული კვლევა, რაც აზარტული თამაშებიდან მომდინარე რისკებს შეისწავლიდა.
აზარტული ყველაზე შემოსავლიანი ბიზნესია საქართველოში, რასაც სტატისტიკური მონაცემები ადასტურებს. მაგალითად, თუ 2015 წელს აზარტული თამაშის შემოსავალი 2 მილიარდ 121 მილიონ ლარს შეადგენდა, 2016 წელს აზარტული თამაშების სექტორის შემოსავალმა 4 მილიარდ 235 მილიონ ლარს მიაღწია, რაც 2 მილიარდით მეტია წინა წელთან შედარებით.
აზარტულ თამაშებთან დაკავშირებულ რეგულაციას გამოეხმაურა ფინანსთა მინისტრის ყოფილი მოადგილე ლაშა ხუციშვილი. მისი თქმით, აზარტულ თამაშებთან დაკავშირებით სახელმწიფოს როლი მნიშვნელოვანია, მაგრამ მხოლოდ რეგულაციების გამკაცრებით პრობლემა ვერ გადაიჭრება.
„ინტერნეტიზაციის პირობებში საკმაოდ რთული იქნება ამ პრობლემის ბოლომდე მოგვარება, ამიტომ მნიშვნელოვანია, ოჯახის წევრებიც აქტიურად იყვნენ ჩართულები, რათა მათი შვილები აზარტულ თამაშებზე დამოკიდებულები არ გახდნენ, თუმცა ის რეგულაციები, რომლებზეც მთავრობა მუშაობს, მნიშვნელოვნად შეამცირებს აზარტულ თამაშებზე დამოკიდებულებას“, – განაცხადა ლაშა ხუციშვილმა
,,გურია ნიუსი“ დაინტერესდა იქნებოდა თუ არა აზარტულ თამაშებზე რეგულაციების გამკაცრება ეკონომიკისთვის წამგებიანი. საკითხთან დაკავშირებით ეკონომისტებს ვესაუბრეთ.
ეკონომიკის ექსპერტის დემურ გიორხელიძის განცხადებით, უმჯობესია აზარტული თამაშები აიკრძალოს, რადგან გასართობი თამაშებიდან მიღებული ფული ბიუჯეტს არ სჭირდება.
,,აზარტული თამაშები წამგებიანი არ არის ქართული ეკონომიკისთვის. სჯობს, რომ საერთოდ არ არსებობდეს, ვიდრე ასეთ მასიურ სახეს იღებდეს. საერთოდ რომ აიკრძალოს და ერთ ადგილზე იყოს კონცენტრირებული, გაცილებით უკეთესი იქნება. ბიუჯეტში არ არის საჭირო აზარტული თამაშებისგან მიღებული ფული „, _ განაცხადა გიორხელიძემ.
სრულიად განსხვავებული პოზიცია აქვს ეკონომიკის ექსპერტ დავით იაკობიძეს. მისი თქმით, აზარტული თამაშებიდან შემოკრებილი ფული საკმაოდ მნიშვნელოვანია ქართული ეკონომიკის განვითარებისთვის.
_ რეგულაციას არ გავცნობილვარ, მაგრამ, ზოგადად, ეკონომიკის წახალისებისთვის აზარტული თამაშებიდან მიღებული ფული საკმაოდ მნიშვნელოვანია. მით უმეტეს, ისეთ პირობებში, როგორშიც ახლა ვიმყოფებით. აზარტულ თამაშებზე რეგულაციების გამკაცრება ხდება ქართული ოჯახებისთვის, მშობლებისთვის. ბევრი ადამიანი ხდება მასზე დამოკიდებული, რაც ცუდია, _ განაცხადა იაკობიძემ.
შეგახსენებთ, რომ საქართველოს პარლამენტში კანონპროექტი, რომლის ავტორი ფინანსთა სამინისტროა, უკვე ინიცირებულია.
