რამდენიმე დღის წინ, ჩოხატაურის მუნიციპალიტეტში ა(ა)იპების რეორგანიზაცია დაიწყო და 14 ა(ა)იპ-იდან მუნიციპალიტეტში 9 დატოვეს.
გაერთიანდა კომპლექსური სასპორტო სკოლა და სპორტის განვითარების ცენტრი, რომელსაც სპორტისა და სპორტულ ღონისძიებათა ორგანიზების ცენტრი დაერქვა და მის დირექტორად თამაზ ძნელაძე დაინიშნა.
რეორგანიზაცია შეეხო სამუსიკო სკოლას, სამხატვრო სკოლას და მოსწავლე-ახალგაზრდობის სახლს _ სამივე ა(ა)იპ-ის გაერთიანების შედეგად ა(ა)იპ სახელოვნებო სკოლების გაერთიანება დაფუძნდა, რომელიც სამუსიკო სკოლის დირექტორს ქეთევან გიორგაძეს ჩააბარეს.
საბიბლიოთეკო გაერთიანების, სამუზეუმო გაერთიანების და თანამედროვე სახვითი ხელოვნების გალერეის გაერთიანების შედეგად შექმნილ ახალ ორგანიზაციას არაფორმალური განათლებისა და კულტურული მემკვიდრეობის დაცვის ცენტრი დაერქვა და მისი ხელმძღვანელი მარი შოშაშვილია.
რეორგანიზაციას შემცირებებიც მოყვა, თუმცა, რამდენ ადამიანს მოუწია სახლში წასვლა, ჯერ დაუზუსტებელია _ არსებული ინფორმაციით, გათავისუფლებულთა რიცხვი 50-ს აღწევს.
ჩოხატაურის მუნიციპალიტეტის მერი ირაკლი კუჭავა ჩვენთან საუბრისას ამბობს, რომ პროცესი ჯერ არ დასრულებულა. მისივე თქმით, რეორგანიზაციის შედეგად “სუბსიდირება დაახლოებით 130 000 ლარით მცირდება” .
კითხვას, რის მიხედვით შეარჩიეს სახლში გასაშვები ადამიანები, ჩოხატაურის მერი ასე პასუხობს:
“გასაშვები ადამიანები არ შეგვირჩევია _ ფინანსთა სამინისტროს რეკომენდაციის შესაბამისად შტატების რეორგანიზაცია მოვახდინეთ, რის შესახებაც, კანონით დადგენილი წესის მიხედვით, სამი თვით ადრე ეცნობა ყველა დასაქმებულს”, _ გვითხრა ირაკლი კუჭავამ.
აღსანიშნავია, რომ გასული წლის ბოლოს, ა(ა)იპ-ების რეორგანიზაციის დაწყებამდე, ირაკლი კუჭავამ საკრებულოს სხდომაზე აღნიშნა, რომ არასამეწარმეო არაკომერციულ იურიდიულ პირებში “უსაქმურები” იყვნენ დასაქმებულები, რომლებიც სახლები უნდა წასულიყვნენ. მერს კონკრეტული გვარები არ დაუსახელებია და არც დღეს ასახელებს. ამბობს, რომ ეს გადაწყვეტილება ა(ა)იპ-ების ხელმძღვანელებმა უნდა მიიღონ:
_ ჩვენ გაერთიანებული ა(ა)იპ-ების სტრუქტურა შევიმუშავეთ, საშტატო ნუსხა შევადგინეთ, დავნიშნეთ გაერთიანების ხელმძღვანელები. ახალი თანამშრომლების აყვანა უკვე მათი პრეროგატივაა, “საქმიანებს” აიყვანენ თუ “უსაქმურებს”, მათი გადასაწყვეტია. თუმცა, ამ მხრივ მკაცრი მონიტორინგი მერიის მხრიდან გაგრძელდება. მე კარგად მესმის (არა ერთი წელი ვიყავი უმუშევარი), რომ სამუშაო ადგილის დაკარგვა ადამიანებისთვის ძალიან მტკივნეულია, ამიტომ, ჩვენი რეკომენდაცია იყო ა(ა)იპ-ის ახალი ხელმძღვანელებისადმი, რომ რეორგანიზაციის პროცესი შეხებოდა, ძირითადად, რამდენიმე ადგილას დასაქმებულ ადამიანებს, _ აღნიშნა ჩვენთან საუბრისას მერმა.
_ ბატონო ირაკლი, როგორც ვიცით, გაერთიანებულ ა(ა)იპ-ებში ხელფასებმა მოიმატა. რა ბედი ელით იმ დაწესებულებებში მომუშავე ადამიანებს, რომლებსაც რეორგანიზაცია არ შეხებიათ და რომლებსაც გასულ წელს ხელფასები შეუმცირეთ? ჩვენთან საუბრებში ისინი ამბობენ, რომ მიზერული ანაზღაურება აქვთ იმ ფონზე, როცა გამგეობასა და საკრებულოში მნიშვნელოვნად გაიზარდა შრომის ანაზღაურება. ა(ა)იპ-ების თანამშრომლები ჩვენთან საუბრისას იმასაც ამბობენ, რომ ისინიც ისეთივე დატვირთვით მუშაობენ, როგორც მერიასა და გამგეობაში დასაქმებული პირები და არის შემთხვევები, როცა მათ დაწესებულებებში მომუშავეების გარკვეულ კატეგორიას საარსებო მინიმუმზე დაბალი ხელფასი აქვთ… რა პრინციპით ინიშნება ხელფასები და რამდენად სწორად მიგაჩნიათ მერიასა და საკრებულოში ხელფასების მატების შემდეგ, ა(ა)იპ-ებში ასეთი დაბალი ანაზღაურება?
_ დიახ, გაერთიანებულ ა(ა)იპ-ებში ზოგიერთ პოზიციაზე დასაქმებულ ადამიანებს, პასუხისმგებლობის ზრდასთან ერთად, ხელფასები გაეზარდათ. ზოგადად, ა(ა)იპ-ებში ხელფასები არ არის მაღალი და შემოსავლების ზრდის კვალობაზე ჩვენ არ გამოვრიცხავთ ხელფასების გაზრდას, მაგრამ ის, რაც არის დღეის მდგომარეობით, მინიმუმ, 2-ჯერ აჭარბებს სახელმწიფოს მიერ დადგენილ საარსებო მინიმუმს.
რაც შეეხება მერიაში ხელფასების გაზრდას, ეს საკანონმდებლო მოთხოვნებიდან გამომდინარე გახორციელდა. სინამდვილეში ეს გაზრდაც არაა _ მომუშავეები ვეღარ მიიღებენ ეგრეთ წოდებულ “მეცამეტე ხელფასს”, რომლის გადანაწილება მოხდა 12 თვეზე. აქვე იმასაც გეტყვით, რომ არც მერს და არც საკრებულოს თავმჯდომარეს არც ერთი თეთრით არ გაუზრდიათ ხელფასი, თუმცა, ზემოთ აღნიშნული საკანონმდებლო ნორმა ამის საშუალებას იძლეოდა, _ აღნიშნა “გურია ნიუსთან” საუბრისას ირაკლი კუჭავამ.
აღსანიშნავია, რომ რეორგანიზაციის დაწყებამდე ჩოხატაურის მუნიციპალიტეტის მერიის დაქვემდებარებაში მყოფ ა(ა)-იპ-ებში 602 ადამიანი იყო დასაქმებული და მათ ხელფასებზე გასულ წელს 2 მილიონ 146 ათას 700 ლარი დაიხარჯა.
მერის მიერ მოწოდებული ინფორმაციით კი კლება მხოლოდ 130 000 ლარი იქნება, რაც იმას ნიშნავს, რომ ა(ა)იპ-ების შენახვა ჩოხატაურის მუნიციპალიტეტის ბიუჯეტს კვლავ სოლიდური თანხა _ 2 მილიონზე მეტი დაუჯდება.
რაში ეძლევათ ა(ა)იპ-ებში დასაქმებულ ადამიანებს ხელფასები, ვინ და როგორ მუშაობს; რამდენად სამართლიანად ითხოვენ ისინი ხელფასების მატებას; დარჩნენ თუ არა სამსახურებში “უსაქმურები” რეორგანიზაციის შემდეგ _ ამ თემაზე “გურია ნიუსის” კვლევას უახლოეს ნომერში შემოგთავაზებთ.
