ავტოსაგზაო შემთხვევები ქვეყანაში ხშირია და ნაადრევად გარდაცვალების ერთ-ერთი გამომწვევი მიზეზიცაა.
ავტოსაგზაო შემთხვევები ხშირად ხდება ჩოხატაური-ბახმაროს გზაზე, განსაკუთრებით, გუთური-ჯვარცხმის მონაკვეთზე, სადაც მანქანები დიდი სისწრაფით მოძრაობენ.
გზის მიმდებარედ მცხოვრები მოსახლეობა „გურია ნიუსთან“ საუბრისას ხშირად ამბობს, რომ ამ მონაკვეთზე ცხოვრება შეუძლებელია – ავტომობილები ისეთი სისწრაფით დადიან, რომ მაცხოვრებლებს ეზოდან გასვლის ეშინიათ.
„ხან ვისი ღობეა გატანილი და ხან _ ვისი. მაინდამაინც ვიღაც უნდა მოკვდეს, რომ ყურადღება მოგვაქციონ?! წლებია, ვითხოვთ, ბარიერები და სიჩქარის შემზღუდავი დააყენონ, მაგრამ ყურადღებას არავინ გვაქცევს”, _ ამბობენ მცხოვრებლები ჩვენთან.
ჩოხატაურის მუნიციპალიტეტის მერის, ირაკლი კუჭავას თქმით, ჩოხატაური-ბახმაროს გზა, საგზაო-დეპარატამენტის მოვლა-შენახვის ქვემდებარეა და მუნიციპალიტეტის მფლობელობაში არ არის.
არსებული პრობლემის მოგვარების გზად შინაგან საქმეთა სამინისტრო საქართველოს ცენტრალურ გზებზე ოპტიკურ-ბოჭკოვანი ხაზების მონტაჟსა და ჭკვიანი კამერების დაყენებას ასახელებს; პროექტში გათვალისწინებული სოფელი გუთურიც არის, სადაც ავტოსაგზაო შემთხვევები ხშირია. ამის შესახებ შინაგან საქმეთა სამინიტროს პრესსამსახურმა ჯერ კიდევ გასულ წელს გვითხრა.
თუმცა, ცოტა ხნის წინ, გურიაში, ჩოხატაურის მუნიციპალიტეტში, კიდევ ერთი ავტოსაგზაო შემთხვევა მოხდა სოფელ ჯვარცხმაში, სადაც ერთმანეთს ავტომობილი და სამარშრუტო ტაქსი შეეჯახნენ. მომხდარის შედეგად 24 წლის არაჩვეულებრივი ახალგაზრდა – ვახო ანთიძე დაიღუპა, მარშუტკის მგზავრებმა კი უმეტესად თავის ტვინის შერყევა მიიღეს.
მოსახლეობის წუხილის გათვალისწინების და ამ მონაკვეთზე სიჩქარის შემზღუდავის, “ჭკვიანი კამერის“ დაყენების შემთხვევაში, შესაძლოა, ვახოს სიცოცხლე გვეხსნა და გამოუსწორებელი ტრაგედია არ დატრიალებულიყო.
მომხდარის შემდეგ „გურია ნიუსი“ დაინტერესდა თუ რა ეტაპზეა გურიაში ოპტიკურ-ბოჭკოვანი ხაზების მონტაჟი, რაც საჭიროა ჭკვიანი კამერების დასაყენებლად; თუ დასრულებულია, კამერების დაყენება როდის მოხდება, თუ დაყენებულია, სად არის დაყენებული და რა ეტაპზეა უშუალოდ სოფელ გუთურში მოსახლეობისთვის მიცემული დაპირება ე.წ. კამერების დამონტაჟების შესახებ_ ამ კითხვებით შინაგან საქმეთა სამინისტროს მივმართეთ.
როგორც უწყების მიერ გაცემულ პასუხში წერია, გურიაში ამ დროისთვის 32 ნომრის ამომცნობი ე.წ. ჭკვიანი კამერაა დამონტაჟებული.
„საქართველოს შინაგან საქმეთა სამინისტროს ერთობლივი–ოპერაციების ცენტრის მიერ მოწოდებული ინფორმაციის საფუძველზე გაცნობებთ, რომ მიმდინარე წელს გურიის რეგიონში დღეის მდგომარეობით სულ დამონტაჟებულია 32 ნომრის ამომცნობი ე.წ. „ჭკვიანი“ ვიდეოკამერა, კერძოდ:
ჩოხატაურის მუნიციპალიტეტში – 4 ნომრის ამომცნობი ვიდეოკამერა; ოზურგეთის მუნიციპალიტეტში – 21 ნომრის ამომცნობი ვიდეოკამერა; ლანჩხუთის მუნიციპალიტეტში – 7 ნომრის ამომცნობი ვიდეოკამერა“,_ წერია სამინისტროს მიერ მოწოდებულ ინფორმაციაში.
დეტალური განმარტება კი თუ გზების რა მონაკვეთზეა დამონტაჟებული აღნიშნული კამერები მოწოდებულ ინფორმაციაში არ არის.
ინფორმაციაში არც იმას აქვს პასუხი გაცემული თუ რა ეტაპზეა სოფელ გუთურში ჭკვიანი კამერების მონტაჟის საკითხი. “გურია ნიუსი“ არკვევს, რამდენად შესაძლებელია, გზის ამ მონაკვეთზე სიჩქარის შემზღუდავი დადგეს, სანამ “ჭკვიანი კამერები“ დამონტაჟდება ან მორიგი ტრაგედია დატრიალდება.
