„დავით გარეჯთან არსებული მდგომარეობა ძალიან საშიში ტენდენციაა. შესაძლოა, საქართველოსა და აზერბაიჯანს შორის მძაფრი დაპირისპირება განვითარდეს. აზერბაიჯანის საგარეო საქმეთა სამინისტრომ პირდაპირ განაცხადა, დავით გარეჯი ალბანური კულტურულ-ისტორიული ძეგლიაო, რითაც მეზობელმა ქვეყანამ საქართველოსა და აზერბაიჯანს შორის რელიგიური დაპირისპირების ტენდენცია გააჩინა“,_აღნიშნა „გურია ნიუსთან“ ექსპერტმა უსაფრთხოების საკითხებში ვახტანგ მაისაიამ.
გარდა ამისა, მაისაია საქართველოს პრეზიდენტის, სალომე ზურაბიშვილის შესახებაც საუბრობს და მას „საერთო სასამართლოების შესახებ“კანონპროექტზე ხელის მოწერის გამო აკრიტიკებს.
_ბატონო ვახტანგ, საქართველოს პრეზიდენტმა “საერთო სასამართლოების შესახებ“ სადავო კანონპროექტს, რომელიც უზენაეს სასამართლოში მოსამართლეთა უვადოდ განმწესების პროცედურებს ითვალისწინებს ხელი მოაწერა. იმ ფონზე, როცა კანონპროექტში ვენეციის კომისიის, აშშ-ს, ეუთოს, ევროკავშირისა და ევროსაბჭოს რეკომენდაციები სრულად არ ასახულა, როგორ ფიქრობთ, რა გახდა ზურაბიშვილის გადაწყვეტილების მიღების მიზეზი?
_ძალიან მიჭირს, ვისაუბრო, ქალბატონმა სალომემ აღნიშნულ კანონპროექტს ხელი რა მოტივით მოაწერა. მოგეხსენებათ, პრეზიდენტი მაღალი სახელმწიფო პირი და ქვეყნის მეთაურია, ამიტომ ვვარაუდობ, შედარებით წმინდა სახელმწიფოებრივ ინტერესთან გვქონდეს საქმე, ვიდრე კანონპროექტთან მიმართებით ზურაბიშვილის პიროვნულ დამოკიდებულებასთან. პირადად აღნიშნულ კანონპროექტს არათუ ვემხრობოდი, არამედ მიმაჩნია, რომ „საერთო სასამართლოების შესახებ“ მიღებული კანონი აპარტეიდულია, რომელიც სასამართლო ხელისუფლებას აკნინებს. სალომე ზურაბიშვილს აღნიშნულზე ვეტო რომ დაედო, მმართველ პარტიას მისი დაძლევა გაუჭირდებოდა. სამწუხაროდ, ზურაბიშვილი თვლის, რომ შიდაპოლიტიკურ პროცესებში არ უნდა ჩაერიოს, რაც პრეზიდენტის ამ ქმედებითაც გამოიხატა.
_შს მინისტრმა გიორგი გახარიამ პანკისის ხეობაში ადგილობრივ მოსახლეობასა და სამართალდამცველებს შორის მწვავე დაპირისპირებაზე პასუხისმგებლობა სახელმწიფო სტრუქტურებს დააკისრა და აღნიშნა, რომ მათ მიერ რისკები არასათანადოდ იყო შეფასებული. როგორ ფიქრობთ, სახელმწიფო უწყებების მხრიდან უნებლიე შეცდომას ჰქონდა ადგილი თუ შს მინისტრის პროვოკაცია გამიზნულად მოუწყვეს?
_პირველ ყოვლისა, ბატონი გიორგი გახარიას აღნიშნულ პოზიციას მივესალმები. ბატონი გახარია თვითკრიტიკულობითაც გამოირჩევა ხოლმე, რაც საინტერესო თვისებაა. რაც შეეხება კითხვას, ნათელია, რომ შს მინისტრი შეცდომაში ეკონომიკისა და მდგრადი განვითარების სამინისტრომ შეიყვანა, რომელმაც ჰესის მშენებელი კომპანიისთვის უწყებას სამართალდამცველების გამოყოფა მოსთხოვა. ეკონომიკის სამინისტრო ვინ მოატყუა, ეს ჯერ კიდევ გასარკვევია. მიმაჩნია, რომ აღნიშნულ საკითხზე საპარლამენტო კომისიის შექმნა და ყველა დეტალის გამოკვლევა აუცილებელია. საზოგადოებამ უნდა იცოდეს, ვინ ატყუებს მაღალი თანამდებობის პირებს.
_წმინდა სინოდის წევრი მეუფე იობი (არქიაშვილი) დავით გარეჯის სამონასტრო კომპლექსიდან საქართველოსა და აზერბაიჯანს შორის შესაძლო რელიგიური კონფლიქტის გაჩენის შესახებ ალაპარაკდა. მისი თქმით, იმ შემთხვევაში, თუ ქვეყნებს შორის საზღვრის დემარკაციის პროცესი ქართული მხარისთვის სასარგებლოდ არ გადაწყდება და სასულიერო პირები იქნებიან ის ადამიანები, რომლებიც ტერიტორიის გამო საკუთარ სისხლსაც დაღვრიან. ვდგავართ რელიგიური კონფლიქტისა და მეზობელ სახელმწიფოსთან საბოლოოდ ურთიერთობების გაფუჭების ზღვარზე?
_დავით გარეჯთან არსებული მდგომარეობა ძალიან საშიში ტენდენციაა. შესაძლოა, საქართველოსა და აზერბაიჯანს შორის მძაფრი დაპირისპირება განვითარდეს. დავით გარეჯთან არსებული პროცესების ფონზე, აზერბაიჯანის ტერიტორიაზე აზერბაიჯანისა და თურქეთის შეიარაღებულმა ძალებმა ერთდღიანი წრთვნები ჩაატარეს, რომელშიც მონაწილეობას მძიმე საბრძოლო ტექნიკაც იღებდა, რაც ძალიან უცნაურია. იქიდან გამომდინარე, რომ პოლიტიკაში დამთხვევები იშვიათია, ვვარაუდობ, რომ მეზობელი ქვეყნების მიერ საქართველოსთვის ძალის დემონსტრირებას ჰქონდა ადგილი. საქართველოსა და აზერბაიჯანს შორის ურთიერთობა დიპლომატიურ დაპირისპირებაში უკვე გადავიდა. აზერბაიჯანის საგარეო საქმეთა სამინისტრომ პირდაპირ განაცხადა, დავით გარეჯი ალბანური კულტურულ-ისტორიული ძეგლიაო, რითაც მეზობელმა ქვეყანამ საქართველოსა და აზერბაიჯანს შორის რელიგიური დაპირისპირების ტენდენცია გააჩინა. ამ ფონზე, ქართველი რელიგიური სასულიერო პირის, იობის აღნიშნული განცხადება გასაკვირი არ უნდა იყოს, რომელმაც აზერბაიჯანის ოფიციალური პირების მიერ გაკეთებულ განცხადებას მან საკადრისი პასუხი გასცა. ფაქტობრივად, მეუფე იობმა ის საქმე გააკეთა, რაც ჩვენს დიპლომატიურ სამსახურს უნდა გაეკეთებინა.
_მმართველი პარტიის მიერ განსაკუთრებით ბოლო პერიოდის განმავლობაში დაშვებულმა შეცდომებმა ცხადყო, რომ ხელისუფლება შიდა და გარე საფრთხეებს შესახებ მოსალოდნელ შედეგებს ობიექტურად ვერ აცნობიერებს. თქვენი აზრით, რა არის აღნიშნულის მიზეზი?
_ საქართველოში ანალიტიკური სამსახური, რომელიც პროცესებს ობიექტურად მიმოიხილავს, გააანალიზებს და რეკომენდაციებს პოლიტიკურ ხელმძღვანელობას მიაწვდის, არ არსებობს, რაც არის შიდაპარტიული ორგანიზაციის პრობლემა. მაგალითად, მეზობელ ქვეყნებში, აზერბაიჯანში ორი, ხოლო სომხეთში სამი სახელმწიფოს სტრატეგიული კვლევითი ცენტრი არსებობს. ამ მხრივ, საქართველოს კი ბევრი სამუშაო აქვს.
