საქართველოს პარლამენტის თავმჯდომარემ, არჩილ თალაკვაძემ, პარლამენტის საგანგებო სხდომაზე განაცხადა, რომ მასწავლებლებმა, საგანგებო მდგომარეობისა და პანდემიის პირობებში დისტანციური გაკვეთილების ჩატარებით, განსაკუთრებული მაგალითი მისცეს საზოგადოებას.
პარლამენტის თავმჯდომარემ ყურადღება გაამახვილა პროექტ „ტელესკოლაზე“, ასევე გამოყო პროგრამა ეთნიკური უმცირესობების წარმომადგენელთათვის განათლების ხელმისაწვდომობის შესახებ.
„მასწავლებლებმა მართლაც განსაკუთრებული მაგალითი მისცეს საზოგადოებას, როდესაც საგანგებო მდგომარეობისა და პანდემიის პირობებში ატარებენ დისტანციურ გაკვეთილებს. ახლა, ამ მომენტში ძალიან ბევრი მოსწავლე მონაწილეობს ამ პროცესში, იღებს ყოველდღიურად განათლებას. პროექტი მიმდინარეობს უწყვეტად. მინდა, კიდევ ერთხელ ყველა მასწავლებელს მადლობა გადავუხადო. ასევე, კარგი და წარმატებული ინიციატივა იყო საზოგადოებრივი მაუწყებლის პროექტი „ტელესკოლა“, რომელმაც ბევრ მოსწავლეს მისცა შესაძლებლობა, იყოს პროცესში ჩართული და განათლების პროცესი არ შეწყდეს. განსაკუთრებით მინდა, გამოვყო ინიციატივა და საზოგადოებრივი მაუწყებლის პროგრამა ეთნიკური უმცირესობებისთვის, სადაც ასევე განათლების მიწოდების პროცესი ამ პროექტის შედეგად შენარჩუნდა და ხელმისაწვდომი დარჩა ეთნიკური უმცირესობებისთვისაც“, – განაცხადა არჩილ თალაკვაძემ.
