“თხილს არ დაადგა საშველი, თორემ ყველის ფასი ყოველდღე იმატებს”

ბოლო დღეების განმავლობაში, რძისა და რძის ნაწარმის ფასმა ოზურგეთში საგრძნობლად მოიმატა.

ერთი კილოგრამი ყველი 12 ლარი ღირს, მარკეტებსა და ზოგიერთ სავაჭრო ქსელში კი ერთ კილოგრამს 14 ლარადაც ჰყიდიან.

უფრო რომ დავაკონკრეტოთ, 14 ივლისს, ოზურგეთში, ერთი კილოგრამი ყველი 11 ლარი ღირდა, 13 ივლისს _ ათი ლარი. ხოლო 15 -16 ივლისს უკვე ერთ კილოგრამს 12 ლარად ჰყიდდნენ, მომდევნო დღეებში უკვე 13 ლარსაც აფასებდნენ.

მეზობელ მუნიციპალიტეტებში როცა გადავამოწმეთ, გვითხრეს, რომ ჩოხატაურში, უკვე კარგა ხანია, ერთი კილოგრამი ყველი 13 ლარი ღირს.

როგორც ვხედავთ, ყველის ფასი ყოველდღე იმატებს.

_ ამ დროს, ზაფხულში, ივნისის ბოლოდან, ყოველთვის ასე ხდება. ძირითადად, პირუტყვს მთაში მირეკავენ. ქალაქსა და სოფლებში კი ბევრი დამსვენებელია ჩამოსული და ყველს, რძის ნაწარმს აქტიურად ყიდულობენ. ამიტომ ხდება ფასის მატება. გასაკვირი ის არის, ერთი თვის წინ რომ 5 ლარი ღირდა. ყველაფერი გაძვირდა. ზეთი ვერ გვიყიდია. რამდენი ქატო და პურის ფქვილი უნდა შეიძინო, რომ პირუტყვი გამოკვებო? ახლა მოვლა და პატრონობა თქვი, _ ამბობენ სოფლებიდან ჩამოსული ქალბატონები, რომლებიც ყველის რეალიზაციით აღებულ თანხას სასაცილოს უწოდებენ.

_ თხილს არ ეშველა არაფერი _ არც ფასი ემატება, არც _ სიმწიფე. გასულ წელს, ამ დროს, ახალი თხილის ჩაბარება უკვე დაწყებული იყო. ახლა უნდა ეჯაჯგურო, რომ “ქეჩხო” მოაშორო. არ ირჩევა ჯერ. ძალიან ცივი წელიწადია და ამიტომ ყველანაირი კულტურა, ბოსტნეულით დაწყებული და ხეხილოვნებით დამთავრებული, აგვიანებს შემოსვლას, _ ამბობს რიტა გოგიტიძე, რომელიც ოზურგეთის ბაზარში ხშირად ყიდის აგრარულ ნაწარმს.

მან, ასევე, გვითხრა, რომ სულ ორ ტონამდე თხილის მოსავალს იწევს და სრულ გაურკვევლობაშია _ არ იცის, წელს რა ფასად მოახერხებს მოსავლის ან მოკრეფას ან ჩაბარებას.

_ შარშან ამ დროს თხილი ბუდებიდან უკვე ცვიოდა, წელს ჯერ არ გაქანებულა. მუშახელის დაქირავებასაც ვერ შევძლებთ, ალბათ. უკვე ისმის ხმები, რომ ერთი დამხმარე 70 ლარს ითხოვს. 50 ლარსაც ვერ და არ გადავიხდი, რადგან თხილს ფასი არ აქვს. კი მაქვს პლანტაცია შემოღობილი, როცა შემოვა, ჩამოცვივდება და ავკრეფ ნელ-ნელა. მეზობლებიც მივეხმარებით ერთმანეთს. მოვიფიქრებთ რაიმეს, _ ამბობენ ჩვენთან საუბარში სოფლების: მერიის, ქაქუთის და ლიხაურის მცხოვრებლები: იამზე ღლონტი, ნინო სალუქვაძე და მანანა ქავთარაძე, რომლებსაც ოზურგეთის ბაზარში შევხვდით.

_ თხილის ამბავი კიდევ სხვაა. რაც შეეხება ხორცსა და ყველს, ცოტა შორეული წარსულის გახსენებაა საჭირო. კომუნისტების დროს და ცოტა მოგვიანებითაც, ხორცის და ყველის ფასი თითქმის ერთნაირი იყო. ახლა რა ხდება? თუ ხორცის ფასი ასე გაიზარდა, ეს ხორცის რეალიზაციის რეგულაციის დაწესების გამო მოხდა. დაწესდა , რომ სარეალიზაციოდ თვითნებურად ვერ გაიტან, პირუტყვი უნდა დაიკლას სასაკლაოზე _ მთელი რიგი პროცედურებია. სწორედ რეგულაციის მოწესრიგებამ წამოსწია ხორცის ფასი. ასევე, უნდა მოხდეს ყველზეც. ვის მოსწონს, ვთქვათ, ქუჩაში, არხის ცხაურზე დადებული ვედრო და შიგ ჩაყრილი ყველი რომ იყიდება? ასე ველურად რატომ უნდა ვივაჭროთ? კი, ახლა ცოტათი გაიზარდა ყველის ფასი. სეზონია, რესტორნები ამუშავდა, ტურისტები დადიან… თუმცა, ეს დროებითია. ამიტომ, როცა ყველის ირგვლივაც დაწესდება რეგულაცია, ყველსაც ისევე დაედება ფასი, როგორც ხორცს აქვს. ადამიანის ნაშრომს თავად ადამიანმა უნდა დაადოს ფასი! როგორ გგონიათ, ვაჭრები, რატომღაც გადამყიდველებს რომ ვეძახით, რომ არ იბარებდნენ სოფლის პროდუქტს, ეს ხალხი კიდევ უფრო იაფად არ გაყიდის ყველსა და რძეს თუ სხვა პროდუქტს? ზოგჯერ ზოგი ჭირიც მარგებელია. გასაჭირის ბრალიცაა, მაგრამ გასაჭირს თავი არ უნდა დააბრიყვებინო, _ გვეუბნება მეურნე აკაკი ღლონტი.

რაც შეეხება რძეს და რძის დანარჩენ ნაწარმს, დღეის მდგომარეობით, ფასი ზრდისკენ არის მიმართული: ერთი ლიტრი რძე 2 ან 2,50 ლარი ღირს. ერთი კილოგრამი ნადუღი 5-6 ლარი. ნახევარი ლიტრი მაწონი 1,50 ან 2 ლარი.

დიდი ალბათობით, როგორც ბაზარში ამბობენ, რძისა და რძის ნაწარმის ფასი კიდევ მოიმატებს.

სოფლებიდან ჩამოსული მეურნეები ხშირად ბრაზობენ, თუ რატომ ატყდა აჟიოტაჟი რძის ნაწარმის ფასის ზრდის გამო.

_ რა გაუკვირდა ამ ხალხს? ლამის, ავტირდით, ყველის ფასი რომ 6 ლარი იყო. სრულ წაგებაზე ვმუშაობდით. როგორი მოვლა, რამდენი შრომა სჭირდება, თუ იციან?! კი ვყიდით, მაგრამ რომ არ ჩაგატირონ ეს 12 ლარი, ისე არ გაგეცლებიან, _ ასეთ საუბარს ახლა განსაკუთრებით ხშირად მოისმენთ ოზურგეთის ქუჩებში, სადაც ხშირად დგებიან სოფლიდან ჩამოტანილი პროდუქტით დატვირთული ქალბატონები.

“გურია ნიუსი” დაინტერესდა, რა ღირს რძე და რძის ნაწარმი მარკეტებსა და სავაჭრო ობიექტებში. ზოგადად, თუ მოიმატა აღნიშნული პროდუქტის რეალიზაციამ.

თითქმის ყველგან დაგვიდასტურეს, რომ უფრო ძვირი ღირს ქარხნული წესით დამზადებული რძე, ხაჭო თუ ყველი და რეალიზაციაც გაზრდილია.

_ ტურისტული სეზონია. ქალაქებიდან ხალხია ჩამოსული. ხშირია წვიმები, ტურისტებიც ნაკლებად მოძრაობენ ცუდ ამინდში, თუმცა, კვება ხომ სჭირდებათ ადამიანებს? ამიტომ ზაფხულის ბოლომდე, ვფიქრობთ, კარგი სავაჭრო გარემო გვექნება, _ გვეუბნებიან მარკეტების მფლობელები თუ აქვე მომუშავე ოპერატორები.