წინასადღესასწაულო დღეებში ბაზარსა თუ მაღაზიებში მყიდველთა რაოდენობის ზრდა არავის უკვირს, რადგან ახალი წლის ერთ-ერთ მთავარ მშვენებად უხვი სუფრა მიიჩნევა. თუმცა, ისიც ფაქტია, რომ ახალი წლის მოახლოებასთან ერთად სამომხმარებლო პროდუქტზე ფასებიც ნელ-ნელა იზრდება და ბაზარში ახალ წლამდე მყიდველის რაოდენობასთან ერთად თითქმის ყოველდღე მატულობს პროდუქტზე ფასები.
გამონაკლისი ამ მხრივ არც ლანჩხუთია, სადაც სადღესაწაულო ფუსფუსი უკვე შესამჩნევია და მოსახლეობა, საკუთარი ფინანსური შესაძლებლობის ფარგლებში, ცდილობს, ახალი წლის სუფრისთვის პროდუქტი წინასწარ მოიმარაგოს. მართალია, დახლებთან მყიდველის სიმრავლეა, თუმცა, მყიდველიცა და გამყიდველიც მომატებული ფასების გამო ჩივის. მოვაჭრეები პროდუქტებზე ფასებს ზრდას, ძირითადად, ვალუტის კურსის ცვლას უკავშირებენ, თუმცა, აქვე იმასაც დასძენენ, რომ სადღესასწაულო დღეების გამო, ეს ჩვეულებრივი მოვლენაა.
მომხმარებელი ლალი კვაჭაძე ამბობს, რომ ფასი ყველაფერზეა მომატებული:
“დღითიდღე იზრდება ფასები 20-30 თეთრით, ზოგ პროდუქტზე ორი-სამი ლარითაც კი. რომ იანგარიშო, პროდუქტების შესაძენად, საახალწლოდ 500 ლარიც არ გეყოფა, საგრძნობად მომატებულია ფასები და ჯერ სადაა კიდევ გაიზრდება. ყველი 11-12 ლარი ღირს, ხორცი _ 17 ლარი. ქართული სუფრის ტრადიციებს თუ გავითვალისწინებთ, საახალწლოდ სწორედ ამ პროდუქტებზე გაიზრდება ფასები. გოჭი და ინდაური წელსაც ძალიან ძვირი ეღირება, ერთეულები თუ შეძლებენ მის ყიდვას. უფულობა და გაჭირვებაა ხალხში. პენსია 200 ლარია მხოლოდ და ზოგ ოჯახს ეგეც არ აქვს”.
როგორც ირკვევა, ყველაზე მეტად მომხმარებელი ხორცსა და რძის ნაწარმზე ფასების ზრდას განიცდის. ლანჩხუთში ერთი კილო საქონლისა და ღორის ხორცის ფასი 17 ლარიდან იწყება. სულგუნი 16 ლარი ღირს, სოფლის ყველი კი _ 11 ლარი, ნადუღი 5-6 ლარია, კვერცხი _ 50 თეთრი, მჭადის ფქვილი ორი ლარი ღირს, ბულგარული წიწაკა _3-3,50 ლარი; ხმელი ლობიო 4-5 ლარი ღირს, ქათამი _ 20 ლარი, ხოლო დასაკლავი წიწილას 15 ლარს აფასებენ. გაძვირებულია ნიგოზიც, ე.წ. “კერკეტა” ნიგვზის ფასი 18-20 ლარია, ხოლო ქართული ნიგოზი კილოგრამი 30 ლარამდე ღირს. როგორც მოვაჭრეები ამბობენ, შედარებით დაბალი ფასის გამო, “კერკეტა” ნიგოზზეა მეტი მოთხოვნილებაა. ერთი ლიტრი ღვინის ფასი, ხარისხის შესაბამისად, 3-4 ლარია, ხოლო ლიტრი არაყი შვიდი-რვა ლარი ღირს.
თევზეულიდან ყველაზე იაფად “ხამსა” იყიდება და სამი ლარი ღირს, ხოლო დანარჩენი სახეობის ნედლი თევზის ფასი კი 7-12 ლარამდეა. შედარებით იაფი ღირს მაღაზიებში გაყინული თევზი. ბაზრის მოვაჭრეები ვარაუდობენ, რომ ახალი წლის წინა დღეებში თევზის პროდუქტებზე ფასები არ გაიზრდება, რადგან სადღესაწაულო სუფრისთვის მათზე მოთხოვნა მცირეა.
სხვა პროდუქტებთან შედარებით, ბაზარში დაბალი ფასებია ხილსა და ბოსტნეულზე, თუმცა, თუ გასულ წელს ერთი კილოგრამი ვაშლის ფასი ერთი ლარიდან იწყებოდა და სამ ლარამდე ადიოდა, ახლა 50 თეთრით ძვირად ფასობს, ყურძენი, ჯერჯერობით, ოთხი ლარი ღირს. ბაზარში ჭირს კარგი მანდარინის შერჩევა და მისი ფასი ხარისხზეა დამოკიდებული. ყველაზე იაფად კომბოსტო, ხახვი, სტაფილო, ჭარხალი და კარტოფილი იყიდება.
რაც შეეხება საახალწლო სუფრის მთავარ ატრიბუტს _ გოჭსა და ინდაურს, როგორც ირკვევა, მათზე ხელი ბევრს არ მიუწვდება:
“შარშან 40-70 ლარს შორის მერყეობდა ინდაურის ფასი. სიდიდის მიხედვითაა ფასები, გააჩნია როგორი ინდაური იქნება და წონაში რამხელა. სიმართლე რომ ვთქვათ, ნაკლებად იყიდება, უჭირს ხალხს. გოჭის ფასი ერთი კილოგრამის, 10 ლარია და აწი რა იქნება, არ ვიცით”, _ ამბობენ მოვაჭრეები.
