“წულუკიანი “ოცნების“ ფასადს ამახინჯებს, მისი მოშორება პარტიისთვის სასურველი უნდა იყოს”

 „ქართული ოცნება“ ძალიან ცდილობს საკუთარი ფასადის გალამაზებას, რომელსაც თეა წულუკიანი ძალიან ამახინჯებს, ამიტომ იუსტიციის მინისტრის მოშორება, რეიტინგის გაუმჯობესების მხრივ, მმართველი პარტიისთვის სასურველი უნდა იყოს“, _ აღნიშნა „გურია ნიუსთან“ იურისტმა ლია მუხაშავრიამ.

მისივე თქმით, „ქართული ოცნების“ ლიდერებსა და თეა წულუკიანს შორის უთანხმოების მიზეზი, შესაძლოა, რამდენიმე საკითხს უკავშირდებოდეს.

_ ქალბატონო ლია, „ქართული ოცნების“ ყველაზე სტაჟიანმა მინისტრმა თეა წულუკიანმა მმართველ პარტიას ულტიმატუმი წაუყენა და თანამდებობიდან წასვლა დააანონსა. ციტირება: „თანამდებობიდან არ გადავმდგარვარ, მაგრამ თუ ჩემი პოზიცია არ იქნება გაზიარებული, რომელიც იუსტიციის სამინისტროს უფლებამოსილების ფარგლებში გადასაჭრელ თემას ეხება,  გვერდზე გავიწევი“, _ აღნიშნა მინისტრმა. სანამ გაირკვეოდა, რომ ის თანამდებობაზე რჩება, პარლამენტის ვიცე-სპიკერმა, გია ვოლსკიმ განაცხადა, წულუკიანის ულტიმატუმი იუსტიციის სამინისტროდან პენიტენციური სამსახურის გასვლას უკავშირდებაო. როგორ ფიქრობთ, აღნიშნული შეიძლებოდა ყოფილიყო წულუკიანის წყრომის რეალური მიზეზი?

_ შესაძლოა, თეა წულუკიანსა და „ქართული ოცნების“ ლიდერებს შორის უთანხმოების მიზეზი რამდენიმე საკითხი იყოს, მათ შორის, სასამართლო სისტემაში შექმნილი ვითარება. ყოველთვის, როცა ჩვენ მართლმსაჯულების სისტემაში არსებულ პრობლემებს ვაპროტესტებთ, წულუკიანი ჩუმად არის, არადა სასამართლოში სამართლიანობის აღდგენა და ეფექტური რეფორმების განხორციელება იუსტიციის მინისტრის პრეროგატივაა. „ქართული ოცნება“ ძალიან ცდილობს საკუთარი ფასადის გალამაზებას, რომელსაც თეა წულუკიანი ძალიან ამახინჯებს, ამიტომ იუსტიციის მინისტრის მოშორება რეიტინგის გაუმჯობესების მხრივ მმართველი პარტიისთვის სასურველი უნდა იყოს.

_მიუხედავად იმისა, რომ ამ ეტაპზე თეა წულუკიანსა და „ქართული ოცნების“ ლიდერებს შორის პოზიციები შეჯერდა, როგორ ფიქრობთ, მმართველი პარტია უახლოს მომავალში მას თანამდებობიდან გაუშვებს?

_აღნიშნულზე დანამდვილებით საუბარი რთულია, თუმცა ფაქტია, რომ სასამართლო სისტემასთან დაკავშირებულმა საკითხმა „ქართული ოცნება“ შუაზე გახლიჩა, რასაც საზოგადოება და სავარაუდოდ, „ოცნების“ ლიდერი პირდაპირ იუსტიციის მინისტრის პასუხისმგებლობას უკავშირებს. კიდევ ერთხელ ვიმეორებ, იუსტიციის მინისტრი „ქართულ ოცნებას“ ამახინჯებს. იმ დროს, როცა სასამართლოში საქმეები უკუღმა მიდის, ის სავარძელს ინარჩუნებს. მართლმსაჯულებასთან დაკავშირებული საკანონმდებლო ინიციატივები წულუკიანისგან მოდიოდა და ბუნებრივია, სისტემაში შექმნილ ვითარებაზე პასუხისმგებელი იუსტიციის მინისტრია.

_სასამართლო სისტემაში არსებულ ვითარებაზე ლეგიტიმურად პასუხისმგებელი, ბუნებრივია, თეა წულუკიანია, მაგრამ იმ ფონზე, როცა „ოცნების“ ლიდერმა ბიძინა ივანიშვილმა ოდიოზური მოსამართლეები წინა რეჟიმის მსხვერპლებად გამოაცხადა და პარლამენტის თავმჯდომარე ირაკლი კობახიძე მართლმსაჯულებასთან დაკავშირებით ბიძინა ივანიშვილის პოზიციებს ახმოვანებს, ჯოხს ერთ პიროვნებაზე რატომ გადატეხენ?

_თეა წულუკიანი ყოველთვის დუმილის უფლებით სარგებლობდა, არ აქტიურობდა, რამაც შეაძლებინა თავი აქამდე მოეტანა. ვიღაცას ხომ უნდა დაბრალდეს, რატომ წავიდა მართლმსაჯულებაში ცუდად საქმე?! თეა წულუკიანმა ხელი შეუწყო იმას, რომ  ლევან მურუსიძე ბიძინა ივანიშვილის თვალში კარგად წარმოჩენილიყო, რაზეც, შესაძლოა, პასუხი სამომავლოდ მოეთხოვოს.  

_“ქართულმა ოცნებამ“ გუნდის განახლების პროცესი დაიწყო. როგორც ცნობილია, პარტია ახალ კადრებს მთელი ქვეყნის მასშტაბით ეძებს. როგორ ფიქრობთ, მმართველ პარტიას ახალი სახეები 2020  წლის საპარლამენტო არჩევნებში გამარჯვებას მოუტანენ?

_ „ქართულმა ოცნებამ“, რაც უნდა ობიექტური განახლება განახორციელოს, მისი საქმიანობა წარმატებული მაინც ვერ იქნება. მმართველ პარტიას საზოგადოების თვალში ცუდი იმიჯი აქვს,  ამიტომ განახლება ვერ უშველის. დამისახელეთ სფერო, რომელიც „ქართულმა ოცნებამ“ წარმატებით განახორციელა, რომელმაც შედეგი გამოიღო და ადამიანის ყოფაზე დადებითად აისახა. საქართველოში ადამიანებს დემოკრატიული ცხოვრების გამოცდილება აქვთ და არჩევნებში უკეთეს არჩევანს გააკეთებენ.

_“თიბისის“ დატოვების შემდეგ, მამუკა ხაზარაძე შს მინისტრს დაუპირისპირდა და აღნიშნა, რომ გიორგი გახარიასგან  შანტაჟის შემცველი წერილი მიიღო. წერილის ავთენტურობას, რომელზეც პროკურატურამ გამოძიება შეწყვიტა და მმართველმა გუნდმა მას არაფრის მთქმელი ფარატინა ფურცელი უწოდა, ლონდონში ჩატარებული ექსპერტიზა დაადგენს. მანამდე კი წერილის სანდოობასთან დაკავშირებით, როგორია თქვენი პოზიცია?

_ სიმართლე მამუკა ხაზარაძის მხარეს არის. კარგად ჩანს, რომ „თიბისი ბანკის“ დამფუძნებელი ძალიან შეაწუხეს და გაამწარეს, სხვა შემთხვევაში ხმას არ ამოიღებდა. საბანკო და საფინანსო სფეროს სკანდალები ძალიან დიდ დარტყმას აყენებს და ვიცი, რომ თუ ძალიან არ გაუჭირდათ ბანკირები არ აყვირდებიან.