მოახლოებული საკურორტო სეზონის კვალდაკვალ, დიდია დამსვენებელთა ინტერესი გურიის ზღვისპირა კურორტ ურეკის მიმართ, რომლის უნიკალური მაგნიტური ქვიშის სამკურნალო ეფექტის მნიშვნელობა მსოფლიოში ცნობილია.
რა ხდება ამ დროისთვის ურეკში, სადაც განახლებულ ინფრასტრუქტურულ სამუშაოებთან ერთად, არსებობს მრავალი, წლების განმავლობაში გადაუჭრელი პრობლემა, რომელთა მიმართ გამკლავება არც ისე ადვილია?
უპირველეს ყოვლისა, დღეს დამსვენებელი და ზოგადად, საზოგადოება დაინტერესებულია, საპანდემიო კარანტინის მოხსნის შემდგომ, რა ხდება კურორტზე, მიიღებს თუ არა იგი დამსვენებელს და ტურისტებს, როგორი განვითარდება ეს პროცესი, რა რეგულაციები დაწესდა, აღადგინა თუ არა ჯანდაცვის სამინისტრომ ადგილზე შრომის ინსპექტირების ჯგუფი და რამდენად უსაფრთხო იქნება ზღვაზე გასვლა, წყლის თუ ქვიშის აბაზანა და ასე შემდეგ.
“გურია ნიუსი” დაინტერესდა კონკრეტული თემით _ რა მითითებები მისცა სასტუმროს მეპატრონეებს სამინისტროს შრომის ინსპექტირების ჯგუფმა და იქნება თუ არა დამსვენებელი ამ სეზონზე უსაფრთხოდ?
როგორც ოზურგეთის მუნიციპალიტეტის ზედამხედველობის სამსახურის განყოფილების გამგემ, შუქრი გაბრიჩიძემ გვითხრა, ურეკში უკვე იმყოფებოდა აღნიშნული ჯგუფი, რომელიც ჯანდაცვის სამინისტრომ მოავლინა. ისინი შეხვდნენ სასტუმროს მეპატრონეებს, ესაუბრნენ მათ კონკრეტული რეგულაციების შესახებ, რომელიც მკაცრად უნდა იქნეს დაცული.
კითხვაზე _ როგორ გადაიჭრება სასტუმროებთან არსებული ღია აუზის პრობლემა, რამდენ ადამიანს ექნება მისი გამოყენების უფლება, როგორ მოხდება მუდმივად წყლის განახლება, გაბრიჩიძემ გვიპასუხა, რომ აუზის 6 კვადრატული მეტრი სივრცე უნდა დაეთმოს ერთ ადამიანს:
_ ყველაზე მეტად საყურადღებოა ღია აუზის პრობლემა. სასტუმროს მეპატრონეებს დაევალათ, რომ აუზის ფართობის 6 კვადრატული მეტრი სივრცე უნდა დაეთმოს ერთ ადამიანს. ანუ აუზს, რომლის ფართი 12 კვმ-ია, მხოლოდ ორი ადამიანის ჩასვლა იქნება შესაძლებელი. გარდა ამისა, გამუდმებით _ ყოველ ერთ საათში უნდა მოხდეს აუზში ძველი წყლის შეცვლა ახლით, რაც ადვილი შესასრულებელი არ იქნება და საჭიროებს განსაკუთრებულ მობილიზებას და ყურადღებას, _ გვითხრა მან.
გარდა ამისა, შუქრი გაბრიჩიძემ ისაუბრა სხვა სანიტარულ-ჰიგიენურ ვალდებულებებზე _ წყალი ყოველდღე უნდა დაიქლოროს და სხვა.
კითხვაზე _ არის თუ არა დღეს ყველა სასტუმრო მზად იმისთვის, რომ დამსვენებელმა თავი უსაფრთხოდ იგრძნოს აუზში ჩასვლისას, გაბრიჩიძე გვპასუხობს: “ზოგიერთი სასტუმროს მეპატრონეებმა თქვეს, რომ ჯერ არ აქვს მოწესრიგებული აღნიშნული პრობლემა და ამბობენ, რომ საჭიროა შესაბამისი სპეციალისტი. მათ შრომის ინსპექტირების ჯგუფმა ურჩია, რომ სანამ ასეთ სპეციალისტს არ მოძებნიან, აუზი დახურონ და მხოლოდ პრობლემის მოგვარების შემდეგ მოახდინონ მისი ფუნქციონირება”.
ურეკში ახალი პრობლემა არაა უკანონო მშენებლობები, რასაც ხან კონკრეტული პირები აპროტესტებენ, ხან ზედამხედველობის სამსახურის მიერ ხდება გამოვლენა და დაჯარიმება.
“ადამიანს, მიწის და შენობის რა რაოდენობით საკუთრებაც უნდა ჰქონდეს, თუ იმ ადგილზე კვლავ იწყებს ახალ მშენებლობას, აუცილებლად უნდა ითხოვოს ნებართვა. წინააღმდეგ შემთხვევაში, მოქმედი კანონის თანახმად, ასეთი მშენებლობა უკანონოდ ითვლება და დაჯარიმდება. ასეთი ფაქტი არა ერთი გვაქვს. მაგალითად, მესაკუთრემ საკუთარ ეზოში, შიდა მხრიდან ბლოკის გალავანი შემოავლო ნაკვეთს, რაც ნებართვის გარეშე ყოვლად დაუშვებელი იყო. ამიტომ ის რვა ათასი ლარით დაჯარიმდა. მსგავსი თავნებობა არაერთხელ ხდება ზღვისპირა კურორტზე”, _ გვითხრა გაბრიჩიძემ.
კონკრეტული მოქალაქეები ხშირად აპროტესტებენ უკანონო მშენებლობებს ან ისეთ ქმედებებს პლაჟის სიახლოვეს, რაც თავად მიაჩნიათ უკანონო მშენებლობად.
ერთი ასეთი კონკრეტული ფაქტის გამო, “გურია ნიუსს” მოქალაქემ მიმართა, რომელმაც გვითხრა, რომ ერთ-ერთმა მესაკუთრემ თავისი სააგარაკე სახლის წინ, ზღვის სიახლოვეს, პლაჟის ნაწილის შეღობვაც მოინდომა.
ჩვენ დავინტერესდით, რამდენად შეესაბამებოდა სიმართლეს ეს ფაქტი. ადგილზე მისულებს დასახელებული ქალბატონი იქ არ დაგვხვდა.
“ახლახან წავიდა თბილისში, მალე დაბრუნდება. არანაირ უკანონო მშენებლობას არ ვეწევით. უბრალოდ, ბეტონის დაბალი ჯებირი ჩავასხით, რომ ღელვის დროს ზღვის ტალღებმა სახლი არ აავსოს ქვიშით, რაც აქამდე ხდებოდა”, _ გვითხრეს ქალბატონის ახლობლებმა და მუშებმა, რომლებიც ადგილზე დაგვხვდნენ. თავად მოქალაქე, რომელიც ამ შემოსაზღვრას ეწინააღმდეგებოდა და რედაქციას მომართა, ადგილზე არ გამოჩენილა.
ოზურგეთის მუნიციპალიტეტის მერიის ზედამხედველობის სამსახურის უფროსმა შუქრი გაბრიჩიძემ ამ ფაქტის ირგვლივ ასეთი კომენტარი გააკეთა:
“მე მოვედი ადგილზე. ქალბატონი, რომელიც ამ ბეტონის ჩასხმას აპროტესტებდა, ასევე, მოითხოვდა ზღვისპირა ზოლზე, კონკრეტულად, “გურია პალასის” წინ მდებარე ეზოების გასწორხაზოვნებას და მის აღებას, რაც 30 წლის წინ არის გაკეთებული და მაშინდელი კანონით არ იკრძალებოდა. ახლა მე როგორ ავიღებ და დავუნგრევ მოქალაქეს თავის საკუთრებას?!
რაც შეეხება სახლის წინ გაკეთებულ ჯებირს, მეპატრონე ამბობს, რომ ღელვის დროს ტალღებს ქვიშა პირდაპირ სახლში შეაქვს და ეს იქნება დამცავი ბარიერი, ნაწილობრივ მაინც, მეტი არაფერი. რაც გააკეთეს, მეტის დამატებას არ აპირებენ _ ვაკონტროლებთ”, _ გვითხრა გაბრიჩიძემ.
