საქართველოს ჯანდაცვის კომიტეტის თავმჯდომარე, აკაკი ზოიძე მიიჩნევს, რომ თამბაქოსთან დაკავშირებით საქართველოს კანონმდებლობაში ხარვეზია. მისი თქმით, “უფილტრო და ფილტრიან სიგარეტზე ფასის გაზრდის შემდეგ მოქალაქეებმა სიგარეტის მოხმარების შემცირების ნაცვლად, იაფი პროდუქტის, დაფასოებული თამბაქოს ყიდვა დაიწყეს”.
“ეს არის შემდეგი ნაბიჯი, რაც უნდა გაკეთდეს. წელს გაძვირდება, თუ მომავალ წელს, მაგაზე არ არის საუბარი. იაფი და ხელმისაწვდომი თამბაქო არ უნდა იყოს. ფასის ზრდა მიმართული იყო იმისკენ, რომ ადამიანებმა ან ნაკლები მოწიონ, ან თავი დაანებონ”, _ განმარტავს ზოიძე და დასძენს, რომ თამბაქოს მოხმარების შემცირების ერთადერთი გზა ფასის ზრდაა.
ის აღნიშნავს, რომ მისი ნათქვამი, შესაძლოა, არაპოპულარული იყოს, თუმცა, თამბაქოს მოხმარების თავის დანებების შემდეგ მოქალაქეები კმაყოფილები იქნებიან. როგორც ზოიძე აღნიშნავს, არ გეგმავს საკანონმდებლო ინიციატივაზე მუშაობას. მისი თქმით, მსგავსი რეგულაცია ჯანდაცვის მსოფლიო ორგანიზაციის რეკომენდაციაა და გადაწყვეტილება მთავრობამ უნდა მიიღოს.2014-2018 წლამდე პერიოდში სააქციზო გადასახადი ქვეყანაში ხუთჯერ გაიზარდა. სააქციზო გადასახადის გაზრდის პროცესი ამით არ დასრულებულა. ფასი გაიზარდა 2018 წელსაც, ცვლილებები კი 2019 წლიდან ამოქმედდა. 2019 წლის ბიუჯეტით, შემოსავლები სააქციზო გადასახადიდან, დაახლოებით, 1,5 მილიარდს უნდა გაუტოლდეს.
2019 წლიდან უფილტრო სიგარეტის აქციზის ღირებულება, ფილტრიანისას გაუთანაბრდა და ერთ კოლოფზე 1,7 ლარს გაუტოლდა;
2019 წლიდან გასამმაგდა ადვალური (იმპორტირებული პროდუქტის ღირებულების პროცენტული გადასახადი) გადასახადი თამბაქოზე _ ერთ კოლოფზე 10-დან 30-პროცენტამდე.
აკაკი ზოიძის ამ განცხადებას უარყოფითად ეხმაურებიან ოზურგეთელები. გამოკითხული 20 მამაკაცისგან, უმრავლესობა თვლის, რომ თუთუნზე ფასი არ უნდა გაიზარდოს და ეს თუ მოხდება, მაშინ საპროტესტო აქციები არ მოაკლდება ხელისუფლებას.
“ხალხს წურბელასავით უშრობენ სისხლს. ვითომ ჩვენზე და ჩვენს ფილტვებზე წუხს მთავრობა! ვის ატყუებენ?! უნდათ, ჩალის და თივის მოწევა რომ დავიწყოთ?! მაგრამ დარწმუნებული ვარ, ამაზეც მოიფიქრებენ რამეს. ყველაფერს აძვირებენ და ამ თუთუნს დაანებონ თავი. ომის დროს ხალხი თხმელის ფოთოლს ახმობდა და თუთუნის მაგივრად მას ეწეოდა. ომის დროში გვაბრუნებენ, თუ რა ხდება?” _ გვითხრა ოზურგეთელმა აკაკი ხარაბაძემ.
როგორც ოზურგეთის აგრარულ ბაზარში ამბობენ, ბოლო ოთხი წლის განმავლობაში თუთუნის ფასი არ გაზრდილა:
“მე, პირადად, თუთუნი აჭარიდან, ქედის მუნიციპალიტეტიდან ჩამომაქვს. ზუსტად ახლა იწყება მაღალმთიან აჭარაში თუთუნის დათესვა, რომ დროულად მოხდეს შემდეგ ნაყოფის შენახვა-დამუშავება. არის შემთხვევები, როდესაც 50 თეთრის თუთუნს ვერ ყიდულობს გლეხი და თუ მისი ფასი მოიმატებს, მაშინ სულ ვერ იყიდის. ამჟამად 100 გრამი თუთუნის ფასი 2 ლარიდან 6 ლარამდე მერყეობს, ხარისხის მიხედვით იყიდება”, _ გვითხრა მალხაზ ჭაღალიძემ.
“აღარ ვეწევი სიგარეტს და გადავედი თუთუნზე. ახლა იკითხავ, რატომ ვეწევი თუთუნს? _ იმიტომ, რომ სიგარეტს ცეცხლის ფასი აქვს. არც იოცნებონ თუთუნზე ფასის გაზრდა, დაანებონ ხალხს თავი და მოგვაქციონ ყურადღება”, _ გვითხრა ოზურგეთელმა აკაკი ზოიძემ.
