“გურია ნიუსი” ჩოხატაურის მუნიციპალიტეტის სოფელ ზოტს სტუმრობდა.
სოფელში 2008 წლის აგვისტოს ომის გმირის, მურთაზ ირემაძის სახელობის საჯარო სკოლა მდებარეობს, რომელიც მეორე წელია “ახალი სკოლის მოდელში” არის ჩართული.
რა პრობლემების და გამოწვევების წინაშე დადგა ჩოხატაურიდან, დაახლოებით, 36 კილომეტრის მოშორებით მდებარე მაღალმთიან სოფელში არსებული სკოლა, როგორია სწავლისადმი მუსლიმი თემის დამოკიდებულება და ხომ არ ექმნებათ პრობლემები მოსწავლეებს სკოლაში მისასვლელად, ამის გარკვევა სკოლის დირექტორთან, ზაზა ანთაძესთან ვცადეთ.
ზაზა ანთაძე
ზაზა ანთაძე ჩვენთან საუბრისას ამბობს, რომ სკოლაში, რომელმაც ფუნქციონირება 2017 წელს დაიწყო, დღეისთვის 22 მასწავლებელი და 140 მოსწავლეა.
“პანდემიის დასაწყისში გაგვიჭირდა. არიან ოჯახები, რომლებსაც ინტერნეტით სასწავლო პროცესში ჩართვის საშუალება არ აქვთ. მოსწავლეები რომ განათლების მიღმა არ დარჩენილიყვნენ, ამობეჭდილ მასალებს ვაწვდიდით, მაგრამ სად საკლასო ოთახში ჩატარებული გაკვეთილი და სად ონლაინ სწავლება. თუმცა, ასე თუ ისე, ამ გამოწვევას გავუმკლავდით.
სკოლაში 22 მასწავლებელი და 140 მოსწავლეა. მათ შორის 2 სპეციალური საგანმანათლებლო საჭიროების მქონეა. ეტლით მოსარგებლე მოსწავლეც გვყავდა, შინ სწავლებაზე იყო. შემდეგ ეს მოსწავლე უმაღლეს სასწავლებელში ჩაირიცხა. ყველა მასწავლებელი ადგილობრივი კადრია. ისინი მეორე წელია, სწავლების “ახალ მოდელში” არიან ჩართულები. გაკვეთილები, ძირითადად, ახალი, თანამედროვე მოდელით ტარდება. ასევე, ტარდება ტრენინგები და ამ ტრენინგების მეშვეობით ვახერხებთ სწავლებას იმ ძირითადი პრინციპებით, რა პრინციპებითაც უნდა მიიღოს ბავშვმა განათლება”, _ გვითხრა სკოლის დირექტორმა.
როგორც ზაზა ანთაძე ჩვენთან საუბრის დროს აღნიშნავს, სკოლას 4 მიკროავტობუსი ემსახურება, რითაც მოსწავლეების გაკვეთილზე დაგვიანების პრობლემა მოგვარებულია, მაგრამ უამინდობის დროს, მაგალითად, თოვლში, გადაადგილება ტრანსპორტსაც უჭირს.
რაც შეეხება ჩვენს კითხვას, რომელიც სწავლისადმი დამოკიდებულებას შეეხებოდა, სკოლის დირექტორი გვეუბნება, რომ სკოლის კურსდამთავრებულები სხვადასხვა უმაღლეს სასწავლებელში აგრძელებენ სწავლას. თუმცა, ახალგაზრდებს სწავლის გაგრძელება ბათუმში ურჩევნიათ, რადგან ტერიტორიულად ახლოა.
ანთაძე აღნიშნავს იმასაც, რომ ვაჟებთან შედარებით, გოგონები უფრო ხშირად ხდებიან სტუდენტები:
“140 მოსწავლიდან ყოველწლიურად 5-6 სტუდენტი მიდის სხვადასხვა უმაღლეს სასწავლებლებში. უმეტესად მიდიან ბათუმში, რადგან ტერიტორიულად ახლოს არის და იქ ჰყავთ ნათესავები. ბინასთან დაკავშირებული პრობლემების გამო კი, თბილისში შედარებით ნაკლებად მიდიან. წელს ჩვენი სკოლის სამი კურსდამთავრებული თბილისში სხვადასხვა უნივერსიტეტში ჩაირიცხა.
ყოველთვის ვიბრძოდი, რომ უფრო და უფრო მეტ კურსდამთავრებულს გაეგრძელებინა სწავლა უმაღლეს სასწავლებელში და ვფიქრობ, მივაღწიე _ შედეგია ის, რომ თემიდან გამომდინარე, აღარ არის, რომ გოგოს სწავლის გაგრძელება არ უნდოდეს. პირიქით, უფრო მეტი გოგონა ხდება სტუდენტი, ვიდრე _ ვაჟი”, _ ამბობს “გურია ნიუსთან” საუბრისას სკოლის დირექტორი.
