“უცნობი ძველი აჭარა”_ ასე ჰქვია სულხან სალაძის წიგნს, რომლის პრეზენტაციაც თბილისში, სასტუმრო რუმსში შედგა.
წიგნი მკითხველს მე-19, მე-20 საუკუნეების აჭარის შესახებ მოუთხრობს, თუ როგორ ცხოვრობდნენ, რა ტრადიციები ჰქონდათ და რაზე სწუხდნენ აჭარლები.
როგორც სულხან სალაძე “გურია ნიუსთან” საუბრისას ამბობს, ძველი აჭარის ამბებით ყოველთვის იყო დაინტერესებული, თუმცა, წიგნის გამოცემაში დიდი როლი გაზეთ “ბათუმელებში” მუშაობამ შეასრულა.
“აჭარაში გავიზარდე. სკოლა იქ დავამთავრე, უნივერსიტეტშიც იქ ვსწავლობდი და სოფლებში ზევით ქვევით წანწალის შედეგად გზაში რადგან ვიყავი, ჩემთვის ყველაფერი ახლობელი და ნაცნობი იყო. ამავე დროს, მუდმივად მინდოდა, რაღაც მენახა უფრო შორს, უფრო ძველი და როდესაც ამ ამბებით უფრო დავინტერესდი აღმოჩნდა, რომ ის ლიტერატურა, რაც არსებობდა არ გვაძლევდა ხელშესახებ ინფორმაციას. 2016 წელს “ბათუმელებში” დავიწყე მუშაობა. რუბრიკა “კულტურული მეხსიერება” მიმყავდა და ყველა გადაცემაში ერთი ჩანაწერი ძველი აჭარის შესახებ იყო. ბოლოს გადავწყვიტეთ, რომ მოდი წიგნად ვაქციოთ ეს ყველაფერი“,_ამბობს სალაძე.
მისი თქმით, წიგნი სხვადასხვა თემას ეხება და უძველესი ამბების გარდა, მკითხველი გამოყენებულ ფოტო მასალის უმეტესობას პირველად ნახავს.
“ამ წიგნისთვის ერთ-ერთი გამორჩეული არის ის, რომ უნიკალური ფოტო მასალაა. ამ ფოტოების 70% პირველად ნახავს მკითხველი. ეს არის პირველი ექსპედიცია, რომელიც ძველ აჭარაში მოეწყო მეოცე საუკუნის 30-იან წლებში, არის უფრო ძველი ფოტოებიც. არის თემები ეთნოგრაფიაზე, პრესაზე, პოლიტიკაზე, ომზე, მუჰაჯირობაზე”,_ამბობს სალაძე.
“უცნობი ძველი აჭარა” გაზეთ “ბათუმელების” მიერ გამოცემული მეოთხე წიგნია და როგორც ავტორი “გურია ნიუსთან” საუბრისას აღნიშნავს, წიგნის მიზანია მკითხველს დაანახოს, რომ აჭარა ბათუმს მიღმაც საინტერესოა.
“თუ ამ წიგნის შედეგად მკითხველი დაინახავს, რომ აჭარა მართლაც უცნობია და მხოლოდ ბათუმი არ არის და ბათუმს იქითაც საინტერესოა, ე.ი. მაშინ შეიძლება ვთქვათ, რომ ამ წიგნმა თავის მისია შეასრულა”,_ამბობს სალაძე.
