გურიაში ვენახების კადასტრი იქმნება. საკითხის შესახებ შეხვედრა რამდენიმე დღის წინ შედგა გურიის სამხარეო ადმინისტრაციაში სახელმწიფო რწმუნებულ გიორგი ურუშაძეს, ღვინის ეროვნული სააგენტოს თავმჯდომარის მოადგილეს ზურაბ ვაჭარაძეს და მევენახეობის მარეგულირებელი სამმართველოს უფროსს დავით მაღრაძეს შორის.
როგორც შეხვედრაზე აღინიშნა, ვენახების კადასტრის საშუალებით მოხდება შესაბამის ნაკვეთებზე ინფორმაციის შეკრება და მათი მუდმივი განახლება.
აღნიშნული პროგრამის გახორციელება ხელს შეუწყობს რეგიონში მევენახეების ინტერესების დაცვას, ყურძნის ხარისხის ამაღლებასა და მეღვინეობის განვითარებას.
უფრო კონკრეტულად კი, რას ისახავს მიზნად ვენახების კადასტრის პროგრამა, ამის შესახებ მევენახეობის მარეგულირებელი სამმართველოს უფროსს დავით მაღრაძეს ვესაუბრეთ.
როგორც მაღრაძე ამბობს, კადასტრი არის საინფორმაციო სისტემა, რომელიც არის ვენახების და მევენახეების შესახებ და განკუთვნილია ზოგადად ვენახებისა და ღვინის წარმოების მართვის კონტროლისთვის.
_ ეს არის ერთიანი მონაცემთა ბაზა მთელი საქართველოსთვის, რომელშიც გვაქვს საბაზისო ინფორმაცია ვენახებზე და მევენახეების შესახებ.
ეს ინფორმაცია გამოყენებული იქნება დარგის წარმოების მართვის, მომავალი დაგეგმვისთვის, ღვინისეული და ყურძნისეული წარმოშობის პროდუქტების მონიტორინგისთვის. ეს არის ბაზისი იმისა, რასაც შემდეგ დარგისთვის მნიშვნელოვანი გამოყენება ექნება.
ამავდროულად, საჭიროა, გვქონდეს ინფორმაცია მევენახეების შესახებ, ვიცოდეთ უშუალოდ ვენახების შემადგენლობა, როგორიცაა ჯიშები, საძირეები, გაშენების წელი, პერიმეტრი და ა. შ. ეს მონაცემთა ბაზა არის, ასევე, მონიტორინგის საშუალება ყურძნის წარმოებისა და დაგეგმვისთვის. ვიცოდეთ, რა ჯიშის ყურძენს უნდა ველოდოთ, რამდენს და ა. შ., რომ მერე დარგმა და მეღვინეობამ გააკეთოს შესაბამისი გათვლები.
_ როგორ უნდა მოხდეს კადასტრის პროგრამაში ჩართვა?
_ კადასტრის პროგრამაში ხვდება ყველა ის მეურნე, ვისაც ვენახი გააჩნია. გვეყოლება შერჩეული ოპერატორები, რომლებიც შეკრებენ მევენახისგან ინფორმაციას და ასახავენ მონაცემთა ბაზაში. ეს არის ორ კომპონენტზე დაფუძნებული ბაზა. პირველია გეოსაინფორმაციო სისტემა _ ე.წ. რუქები, რომელზედაც მოინიშნება ვენახის პოლიგონი, ანუ სად არის განლაგებული ვენახი და მეორე _ აგრონომიული ინფორმაცია: რა ჯიშია, როდის გაშენდა, რა მანძილია რიგებს შორის, ხეივანიც შეიძლება აღიწეროს. ირწყვება, არ ირწყვება. ამით იკვრება ის ინფორმაცია, რომელიც მოდის მევენახიდან და გროვდება ამ რუქების საშუალებით.
_ პროგრამა ამოქმედების შემდეგ რით დაეხმარება მევენახეებს _ გაუმარტივდებათ მათ ყურძნის ჩაბარება, გაყიდვა?
_ ჩვენ არ ვაკეთებთ აღწერას მარტო აღწერისთვის. აღწერა არის დარგის მართვისა და კონტროლისთვის. მევენახეთა ინტერესების დაცვა ძალიან მნიშვნელოვანია. მნიშვნელოვანია, ასევე, გარკვეული ჯიშობრივი შემადგენლობის გარკვევა. ამჯერად არა, მაგრამ იქნება დაფინანსების პროგრამებში მონაწილეობის შესაძლებლობა.
თვითონ ის ნაკვეთი, რომელიც მევენახეს აქვს დარეგისტრირებული საჯარო რეესტრში, მხოლოდ ნაკვეთია, ჩვენი დოკუმენტი კი ამ ნაკვეთს დამატებით ღირებულებას სძენს.
წლევანდელი წლიდან ღვინის ეროვნულმა სააგენტომ დაიწყო ყველა ღვინის სერტიფიცირება, რომელიც საქართველოში იწარმოება. ღვინის სერტიფიცირება კი ვენახიდან იწყება. მევენახემ უნდა დაადასტუროს, რომ მას აქვს ვენახი და რა ჯიშობრივი შემადგენლობისაა ეს ვენახი. ამ სისტემის შედეგად ჩვენ ვიღებთ ინფორმაციას რომელ მევენახეს რა ჯიში აქვს გაშენებული. მევენახეობის რომელ მხარეში რა ჯიშები გვაქვს.
დღევანდელი ცვალებადი ეკონომიკური საბაზრო პირობებში, გარკვეული ჯიშმა, რომელიც გუშინ არ იყო პოპულარული, ხვალ შეიძლება პოპულარობა შეიძინოს, მისი საბაზრო დაინტერესება გაიზარდოს. ჩვენ უკვე გვაქვს უკვე საშუალება, ვიფიქროთ, რა პოტენციალი გვაქვს ქვეყანაში ან რა მიმართულებით შეიძლება დავიწყოთ მისი გაფართოება.
ეს პროგრამა მეღვინეებისთვისაც ძალიან მნიშვნელოვანია _ მარტივდება ყურძნის წარმოშობის მიკვლევადობა. თუ მომხმარებელს აინტერესებს გურიის ღვინო, მან უნდა იცოდეს, რომ გურიაში რა ჯიშის ყურძენი მოდის, შესაბამისად, მომხმარებლების ინტერესების დაცვაც ხდება.
საბოლოოდ, მიგვაჩნია, რომ მოწესრიგებული სტატისტიკური ინფორმაცია ხელს შეუწყობს და გამოადგება დარგის განვითარებას.
_ საქართველოში ყურძნის რომელი ჯიშებია წამყვანი და პოპულარული?
_ საქართველოს ბაზარზე თუ ვისაუბრებთ, ფართობების მიხედვით გვაქვს 2 წამყვანი ჯიში: რქაწითელი და საფერავი. ამ ორ ჯიშზეა დამყარებული ქართული მეღვინეობა. მატების ტენდენცია გააჩნია საფერავს, ხოლო რქაწითელის პლანტაცია ისე სწრაფად აღარ იზრდება. შემდეგ მოდის მწვანე კახური. პოპულარობით არანაკლებია რაჭა-ლეჩხუმის ყურძნის ჯიშები, გურიიდან ამ კატეგორიაში ჩხავერია.
ინფორმაციისთვის, საქართველოში ვენახების კადასტრის პროგრამა 2014 წლიდან დაიწყო.
“რამდენიმე ეტაპი გავიარეთ. პირველი იყო მეთოდიკების დახვეწა, სხვადასხვა სისტემების გამოყენება. ამას ვაკეთებთ რეგიონული პრინციპით. 2019 წლიდან დავიწყეთ მასიური გაშლა იმ მეთოდიკით, რომელსაც დღეს ვიყენებთ. მუდმივად ახლდება ინფორმაცია ვენახების შესახებ. წელს გეგმაში გვაქვს, რომ დასავლეთ საქართველოს 4 რეგიონი _ გურია, სამეგრელო აჭარა და იმერეთი მოვაქციოთ ამ კადასტრის ქვეშ”, _ გვითხრა მაღრაძემ.
როგორც ცნობილია, პროგრამა უკვე დასრულდა კახეთის, რაჭა-ლეჩხუმის, ქვემო ქართლის, შიდა ქართლის, მცხეთა-მთიანეთისა და სამცხე-ჯავახეთის რეგიონებში, სადაც ჯამში, აღწერილია 45 312 ჰა ფართობის ვენახები.
ღვინის ეროვნულ სააგენტოში აცხადებენ, რომ ვენახების კადასტრი გააჩნია ევროკავშირის წევრ ყველა იმ ქვეყანას, სადაც განვითარებულია მევენახეობა-მეღვინეობის ინდუსტრია. საქართველოს ვენახების კადასტრის შექმნა კიდევ ერთი წინგადადგმული ნაბიჯი იქნება ევროპული გამოცდილებისკენ.
ავტორი
