საქართველოს იუსტიციის უმაღლესი საბჭო საქართველოს ჟურნალისტური ეთიკის ქარტიას, საქართველოს კომუნიკაციების ეროვნულ კომისიას, საქართველოს ჟურნალისტთა კორპუსს, საქართველოს სამოქალაქო სექტორს, საქართველოს სახალხო დამცველსა და საქართველოს საზოგადოებას გამოხატვის თავისუფლების ფარგლების სავარაუდო დარღვევის ფაქტებზე მიმართავს და რეაგირებას ითხოვს.
ამის შესახებ გადაწყვეტილება საქართველოს იუსტიციის უმაღლესი საბჭომ ევა გოცირიძის ინიციატივის საფუძველზე მიიღო. ინიციატივა მოსამართლეთა კრიტიკის აკრძალვასთან არის დაკავშირებული.
მიმართვის ტექსტი 25-გვერდიანია და მასში დეტალურადაა განხილული მოსამართლეთა მიმართ გამოთქმული მოსაზრებებების შესახებ.
ასევე, მედიის წარმომადგენლების მიერ ბოლო პერიოდში გავრცელებულ განცხადებებს საქართველოს მოსამართლეებისა და სასამართლო სისტემის მიმართ, რომლებიც, ჩვენი აზრით, განხორციელებულია გამოხატვის თავისუფლების ფარგლების უხეში დარღვევით და წარმოადგენს სასამართლოს, როგორც ინსტიტუტისადმი შეუწყნარებელ უპატივცემულობას და ინდივიდუალური რეპუტაციის უფლების არაერთგზის უხეშ შელახვას.
საბჭო მიიჩნევს, რომ ასეთი განცხადებები, ცალ- ცაკლე და მით უფრო ერთობლივად, დიდ ზიანს აყენებს არა მარტო სასამართლო სისტემას, არამედ თავად გამოხატვის თავისუფლებას და იწვევს მის დისკრედიტაციას, რამდენადაც ისინი განხორციელებულია გამოხატვის თავისუფლებისგან განუყოფელი „მოვალეობებისა და პასუხისმგებლობის“ დარღვევით, ხოლო ზოგჯერ – თვით ამ თავისუფების ბოროტად გამოყენებით.
საბჭო მიიჩნევს, რომ ისინი აუცილებლად უნდა გახდეს სამაუწყებლო საშუალებების, ჟურნალისტთა კორპუსის და მთელი საზოგადოების მხრიდან განხილვისა და ფართო საჯარო დისკუსიის საგანი.
“ჩვენი მიზანია შევიტყოთ, თუ როგორია ჩვენი საზოგადოების, სამაუწყებლო საშუალებების და საკუთრივ ჟურნალისტთა კორპუსის დამოკიდებულება ამ განცხადებებისადმი, რათა ყველამ ერთად შევაფასოთ, რამდენად სწორად არის ჩვენში გააზრებული გამოხატვის თავისუფლების შინაარსი, სასამართლოსა და ინდივიდუალური მოსამართლეების მიმართ „დასაშვები კრიტიკის“ ფარგლები და რით გამოიხატება გამოხატვის თავისუფლებისაგან „განუყოფელი მოვალეობებისა და პასუხისმგებლობის“ დარღვევა სასამართლოს კრიტიკასთან მიმართებაში. ჩვენი მიზანია, აგრეთვე, შევაფასოთ იმ სამართლებრივი მექანიზმებისა თუ ეთიკური მოთხოვნების ადეკვატურობა, რომლებიც მოწოდებული უნდა იყოს, ერთი მხრივ, დაიცვას სასამართლოს და მოასამართლეების ავტორიტეტისა და მიუკერძოებლობის ლეგიტიმური საჯარო და კერძო ინტერესი, და, მეორე მხრივ, შექნას ეფექტიანი მისაგებელი დარღვეული უფლებებისა და ინტერესების აღდგენის, გამოსწორებისა და დარღვევების პრევენციისათვის (კანონმდებლობა, ჟურნალისტთა და სხვა პროფესიული ეთიკის ნორმები, მაუწყებელთა ქცევის კოდექსი, არსებული პრაქტიკა და სხვა)”, _ ნათქვამია საბჭოს მიმართვაში.
საბჭო მიიჩნევს, რომ ეს განცხადებები განხილულ უნდა იქნეს როგორც ცალ-ცალკე, ისე ერთობლივად (კუმულაციურად), და ერთობლიობაში შეფასდეს ცალკეული ჟურნალისტების მხრიდან პროფესიული ეთიკის პრინციპების სავარაუდო დარღვევის საკითხი.
როგორც საბჭოს მიმართვაშია აღნიშნული, მოსამართლეების მიმართ, ბოლო პერიოდში, გამოყენებულია უმძიმესად შეურაცხმყოფელი ეპითეტები, როგორებიცაა: „ზონდერ- მოსამართლე“, „დაქირავებული ზონდერი“; „მანქურთი“, „მანტიაში გახვეული მანქურთი“, „მოღალატე“, „კრიმინალი“, 5 „სამარცხვინო“, „ გაყიდული მონა“, „ჯიბის მოსამართლე“, „დავალების შემსრულებელი“, „ქვეყნისათვის თავისმომჭრელი“, მოსამართლეების მოხსენიება „ბრბოდ“ და სხვა;
ასევე, მათივე ცნობით, ვრცელდება განცხადებები რომელიც მოსამართლისათვის უვიცობის დაბრალებას, მისი პიროვნული და პროფესიული შეურაცხყოფას ისახავს მიზნად. გარდა ამისა, ვრცელდება გამონათქვამები მთელი სასამართლო სისტემის წინააღმდეგ, მათ შორის ცრუ ფაქტებისა და დაუსაბუთებელი „შეფასებების“ გავრცელება, რომლებიც იწვევს სასამართლოს დისკრედიტაციას ხალხის თვალში. ასევე, ვრცელდება შეურაცხმყოფელი და დამამცირებელი კონტექსტები; მოსამართლეთა დემონიზება, მათდამი სიძულვილის გაღვივება და მათი ასოცირება ბნელ, ბოროტ ძალებთან; მოსამართლეთათვის დანაშაულის პირდაპირ დაბრალება უდანაშაულობის პრეზუმფციის პრინციპების დარღვევით;მოსამართლეების დაშინება, სამსახურის დაკარგვისა და დასჯის მუქარა, მათ მიერ სამსახურეობრივი მოვალეობების შესრულებასთან დაკავშირებით; მოსამართლეების გადადგომის მოთხოვნა საჯაროდ,ქალაქის ცენტრში გამართულ მიტინგზე, გვარების დასახელებით და შეურაცხმყოფელი ეპითეტებით; მოწოდება სტუდენტებისადმი, ბოიკოტი გამოუცხადონ მოსამართლეებს და არ შევიდნენ მათ ლექციებზე; საჯარო განცხადებები სასამართლოს გადაწყვეტილებებისადმი დაუმორჩილებლობისა და მისი აღსრულებისადმი წინააღმდეგობის გაწევის თაობაზე.
მიმართვაში ასევე აღნიშნულია იმ ჟურნალისტების ვინაობისა და გამონათქვამების ზუსტი თარიღების შესახებ, რაზეც ზემოთ ვისაუბრეთ.
კერძოდ, ყურადღება გამახვილებულია ოთხ პირის – ნიკა გვარამიას, ზაალ უდუმაშვილის, გიორგი გაბუნიასა და ელისო კილაძის გამონათქვამებზე.
