„ქართული ოცნება“ პრეზიდენტის პირდაპირი წესის არჩევის გაუქმებას 2018 წლიდან გეგმავს, თუმცა, ვინ უნდა აირჩიოს პრეზიდენტი ხალხის ნაცვლად, პარლამენტმა თუ ამომრჩეველთა კოლეგიამ, რომელიც 150 პარლამენტარისა და 150 დელეგატისგან იქნება დაკომპლექტებული, ჯერჯერობით უცნობია.
როგორც ცნობილია, პრეზიდენტის წესის არჩევის შესაძლო ცვლილებამ აზრთა სხვადასხვაობა გამოიწვია.
„არასახელმწიფოებრივი განცხადება”, “შურისძება”, პრეზიდენტის მიჯირყვნა”, _ ასეთ შეფასებებს აკეთებენ იურისტები და პოლიტოლოგები მოსალოდნელ ცვლილებასთან დაკავშირებით, ნაწილი კი მიიჩნევს, რომ საპარლამენტო უმრავლესობის მიერ მიღებული გადაწყვეტილება ყოფილი პრემიერის, ბიძინა ივანიშვილის ინტერესებს ემსახურება.
„გურია ნიუსი“ დაინტერესდა თუ რას ფიქრობს მოსახლეობა, ვინ უნდა აირჩიოს პრეზიდენტი, რის გარსარკვევადაც, თბილის ქუჩებში მოქალაქეები შემთხვევითი შერჩევის პრინციპით გამოვიკითხეთ.
მიხეილ აკოფიანის თქმით, პრეზიდენტს ხალხი უნდა ირჩევდეს.
„პრეზიდენტი უნდა აირჩიოს საზოგადოებამ, რადგან საქართველო დემოკრატიული ქვეყანაა“,_ ამბობს აკოფიანი.
როგორც ლელა გეგეჭკორი ამბობს, საზოგადოებამ ყოველთვის იცის, ვინ უნდა იყოს ქვეყნის პირველი პირი.
„პრეზიდენტი უნდა აირჩიოს ხალხმა, რადგან ის ხალხის რჩეული პირია. საქართველო პატარა ქვეყანაა და საზოგადოებამ ყოველთვის იცის, ვინ იმსახურებს ქვეყნის პირველი პირის სტატუსს“, _ ამბობს გეგეჩკორი.
ცისანა ყიფიანის თქმით კი, პრეზიდენტი კომპეტენტურმა პირებმა უნდა აირჩიონ.
„არჩევნების ჩატარება დიდ თანხებთან არის დაკავშირებული, ამიტომ პრეზიდენტი კომპეტენტურმა პირებმა უნდა აირჩიონ. მთავარია, სამართლიანი ქვეყანა შევქმნათ. ისეთი პიროვნება უნდა აირჩეს პრეზიდენტად, რომელსაც ცუდი წარსული არ ექნება და ცუდი გარემოცვა არ ეყოლება“,_ ამბობს ყიფიანი.
ლია ტოროშელიძე ამბობს, რომ დეპუტატების მიერ არჩეული პრეზიდენტი არ უნდა.
„პრეზიდენტი უნდა აირჩიოს ხალხმა. პარლამენტში ჩვენ დეპუტატები ავირჩიეთ, მაგრამ მათ ხშირ შემთხვევებში გვიმტყუნეს. იმედები არ გაგვიმართლეს, ამიტომ პირადად მე, იმათი არჩეული პრეზიდენტი არ მინდა“,_ამბობს ტოროშელიძე.
ირაკლი სამხარაული თქმით, პრეზიდენტი ხალხმა უნდა აირჩიოს.
„პრეზიდენტი უნდა აირჩიოს ხალხმა საკუთარი აზრით უნდა აირჩიოს და არა პარლამენტმა“,_ ამბობს სამხარაული.
სამხარაულის მსგავსად ფიქრობს თამარ ბედოშვილიც:
„პრეზიდენტი ხელისუფლებაში ქვეყნის სამართავად მოდის. ის არის ხალხის წარმომადგენელი, განსაკუთრებული უფლებამოსილებით აღჭურვილი პირი, შესაბამისად, მას უნდა ირჩევდეს ხალხი“,_ ამბობს ბედოშვილი.
ამავე თემაზე:
„მიჯირყვნის მცდელობა“ თუ ნონსენსის გამოსწორება – პრეზიდენტი შესაძლოა ხალხმა აღარ აირჩიოს
ახლა კონსტიტუცია ბიძინასია, რეალურად ის ქვეყნის და ხალხის აღარაა
