ჩვენი მოქალაქეები გამუდმებით ხშირად გამოთქვამენ საყვედურს და სამართლიანადაც, რომ, საკვები პროდუქტის ფასების ზრდა უკვე ჩვეულებრივ მოვლენად იქცა. ტენდენცია მთელ საქართველოშია. თუმცა, ოზურგეთში ბევრი ფიქრობს, რომ აქ ყველაზე მეტად ახერხებენ ფასებით მანიპულირებას.
ბოლო დღეების განმავლობაში, ხალხი განსაკუთრებით ზეთის ფასის მატების გამო ბრაზობს.
_როცა ერთი ლიტრი 6 ლარი გახდა, ჩვენთვის ეს დიდი დარტყმა იყო. გვეგონა, აქ მაინც შეჩერდებოდა ფასი. მერე ისევ მოუმატეს. ბოლოს კი, ამ ორი დღის მანძილზე, სულ ცოტა, შვიდლარნახევარი გახადეს. ხან რომ ამბობდნენ, მალე ათი ლარი გახდებაო, მაინც გაზვიადებული გვეგონა. არადა, საქმე მართლაც აქეთ მიდის. რას გვიპირებენ, ნეტავ? _ გვეუბნებიან რიგითი მოქალაქეები: ნინო ცხომელიძე, მარინა კაპანაძე, ნინო ვასაძე, მადონა ჩხარტიშვილი და სხვები, რომლებიც დღეს „გურია ნიუსს“ სხვადასხვა მაღაზიებში ფასების გამოკითხვისას ესაუბრნენ.
_დავდივართ მაღაზიიდან მაღაზიაში, ბაზრიდან ბაზარში, რომ სადმე ცოტა ნაკლებ ფასად წავაწყდეთ რაიმეს. ამასობაში კი გადის ნახევარი დღე და სახლში როდის დავბრუნდეთ, საქმე თავსაყრელად არის, როგორც იქნა, ამინდი გამოვიდა _ამბობენ ისინი.
დღეს ოზურგეთის სხვადასხვა მარკეტებსა და სავაჭრო ცენტრებში ფასების მატებაც და მათ შორის ასევე მნიშვნელოვანი განსხვავებაც საგრძნობლად შესამჩნევია. მაგალითად , სავაჭრო ცენტრ „მოდერნში“ ერთი ლიტრი ზეთის ყველაზე დაბალი ფასი 6,90 ლარია. შაქარი კი ერთი კილოგრამი 2,40 ლარი ღირს. „მაგნიტის“ ქსელის მაღაზიებში ერთი ლიტრი ზეთის ყველაზე იაფი ფასი 6,30 ლარია. ერთი კილოგრამი შაქარი კი 2 ლარი ღირს. თუმცა, აქციის დღეა და სხვა დროს შაქარი 2,30 ღირს. ერთი ლიტრი ზეთის ფასი კი 6,60 ლარიდან იწყება.
_ვის ატყუებენ ათთერიანი აქციით? კვირაში ორჯერ რომ ათი, თუნდაც 30 თეთრით გაგიიაფებენ და ყოველ ორ დღეში ფასს ზრდიან, ეს რა მიდგომაა? ერთი კილოგრამი ხახვი ერთი ლარი ღირს ბაზარში. სავაჭრო ცენტრს 59 თეთრში აქვს. დიდი მიღწევაა, ხომ იცი! ხახვი გაუიაფებიათ ყველაზე შესამჩნევად. თავად ჭამონ საგრძნობლად გაიაფებული ხახვი, რომ „მაშხალები“ წამოჰყარონ თვალებიდან. იქნებ, ცოცხლად გაგვატყაონ, მეტი რა დარჩათ? _ გვითხრა ნონა ერქომაიშვილმა, რომელიც იმაზეც ბრაზობს, რომ წიწილების საკვები „კორმაც“ გაძვირებულია _ ბალახი მაინც წამოსულიყო ადრე, რა ცივი გაზაფხულია, იქნებ, ცოტა შეგვეხიდოს შინაური ფრინველის გამოზრდაშიო.
შედარებით იაფიადაა შესაძლებელი ზეთის, შაქრის და კვერცხის თუ სხვა პროდუქტის ყიდვა ოზურგეთში, თაყაიშვილის ქუჩაზე მდებარე მარკეტში, „ლეილას მაღაზია“.
_რა ვქნა? 6 ლარად ვყიდი ერთ ლიტრ ზეთს. ერთ კილოგრამ შაქარს 2,20 ლარად. აქციებს არ ვატარებ მე. რა ქნას ხალხმა. მეც როგორ მიჭირს, ხომ უნდა გავითვალისწინო? ქვეყანაში რთული მდგომარეობაა. ღმერთი ფარავდეს ყველას, _ გვითხრა მაღაზიის გამყიდველმა ლეილა აბაშიძემ.
გურიის ქუჩაზე მდებარე არაერთ კერძო სასურსათო მაღაზიაში ერთი კილოგრამი შაქარი 2,40 ლარი ღირს, რაც მართლაც მეტისმეტია და ხალხიც სამართლიანად ბრაზობს. ბრაზობენ თვით გამყიდვლებიც, ოღონდ თავიანთ კოლეგებზე: „სად ნახეთ 2,20 ლარად შაქარი? ოზურგეთში არის დღეს ასეთი ფასი? ვინაა, ნეტა?“ _ ასე შემოგვწყრნენ ისინი, როცა ვუთხარით სხვა სავაჭრო წერტილებში უფრო დაბალი ფასების არსებობის შესახებ.
დიდ სავაჭრო ცენტრებში, აქციების დღეები, ფლაერზე განთავსებული ცხრილით თუ ვიმსჯლებთ, არც ისე მომგებიანია. კვირის დღეებიდან, მაგალითად, ორშაბათს, „ მაგნიტის“ ქსელში რძისა და ყველის ნაწარმზეა ფასდაკლება. სოფლიდან ჩამოსული ადამიანი, რომელსაც სურს ხორცის, თევზეულის თუ ტკბილეულის ყიდვა , ამ მიზერულ აქციაშიც ვერ ჩაერთვება სრულად, უბრალო მიზეზით- ერთ დღეს ხომ ყველ საჭირო ძირითადი პროდუქტის აქცია არ აქვთ.
_ესეც სათავისოდ აქვთ გათვლილი. საჩვენოდ როდის და ვინ მოცლის?- ამბობენ რიგითი მოქალაქეები, რომლებსაც ხუმრობა მაინც შეუძლიათ:
„ინდონეზიაში ნავთობბაზა თუ ქარხანა აფეთქდა, ალი ცას წვდებოდა და საქართველოში იმ დღესვე ხომ არ გააძვირეს საწვავი, იქნებ, „კალონკებზეც“ გაიაროთო _ დაგვიბარეს.
