ოზურგეთის მუნიციპალიტეტში, სოფელ ოზურგეთში, ბაილეთის საზღვართან ახლოს, მარტოხელა ქალბატონი, ნონა ბერიძე ცხოვრობს.
ის არაერთხელ დაგვიკავშირდა და დაწვრილებით გვესაუბრა, თუ როგორ უვლის 19 მიუსაფარ ძაღლს და არ ჰყოფნის სახსრები, რომ სრულფასოვნად უპატრონოს ოთხფეხა მეგობრებს.
_ ვის არ ვეხვეწები. ერთმა ჟურნალისტმა მითხრა, შენი ძაღლების სადევნელად არ მცალიაო. თქვენც ასე ხომ არ მეტყვით? გაცოფდებიან, წამალი და პური მჭირდება. ერთჯერადად კი მეხმარებიან ზოგჯერ, მაგრამ ეს სულაც არაა საკმარისი. სახლი დანგრევის პირას მაქვს. გაზი ჭიშკართანაა და ვერ შევიყვანე,_ გვითხრა ბერიძემ.
მან ჩვენთან ასევე ისაუბრა, რომ დანგრევის პირას მყოფ სახლში ცხოვრობს. აქვს მხოლოდ სოციალური დახმარება, რაც პურის ფულადაც არ ჰყოფნის.
_ ეს მიუსაფარი ძაღლები ქუჩიდან ჩემთან მოვიდნენ. ვუვლი, მაგრამ სახსრები არ მაქვს. ხანდახან კი მეხმარებიან, მაგრამ მჭირდება ყოველთვიურად დახმარების დანიშვნა. 200 ლარი მაინც მჭირდება, _ ამბობს ის და სასწრაფო ყურადღებას ითხოვს.
„გურია ნიუსი“ ქალბატონს შინ ეწვია. ჩვენთან ერთად ნონა ბერიძესთან მუნიციპალიტეტის მერის წარმომადგენელი სოფელში, ბადრი თავდუმაძეც წამოვიდა.
სახლი, სადაც ქალბატონი ცხოვრობს, მართლაც ავარიულ მდგომარეობაშია. თუმცა, როგორც ბადრი თავდუმაძემ ბერიძეს ჩვენი თანდასწრებით უთხრა, სახლის დასახური მასალა მას კარგა ხნის წინ გადასცა ადგილობრივი მუნიციპალიტეტის ხელმძღვანელობამ.
_ ხალხი მოვიყვანე, ვუთხარი, დაგიხურავთ-თქო. ნახევარი დავხურეთ. მერე მიგვატოვებინა თვითონ. რამდენჯერ დავეხმარე, იცით? ხან 50 ხან 100 ლარი გადავეცი. პურის ფქვილიც მივუტანე. მეტი რა ვქნა? მე ხელფასის დანიშვნა საიდან შემიძლია? ისიც ვთხოვე, რომ ძაღლების გარკვეული რაოდენობა მაინც გადაეყვანათ სხვაგან. თუმცა, წინააღმდეგი წავიდა. თავშესაფარი კი ჯერ არსად არაა. აქ ვინ აუშენებს? – თქვა თავდუმაძემ.
ჩვენ დავაპირეთ ეზოში შესვლა, რომ არსებული ვითარების სრულყოფილად გადაღება მოგვეხერხებინა, თუმცა ნონა ბერიძემ გაგვაფრთხილა, რომ იქ, შესაძლოა, ძაღლებს დავეკბინეთ. ერთ-ერთი ძაღლი კი, რომელიც განსაკუთრებით იწევდა საკბენად, მან ხელში აიყვანა. ეზოში შესვლაზე კი კვლავ კატეგორიული უარი გვითხრა, არ შეხვიდე, სხვები გიკბენენო… თუმცა, მალე, იქვე ისე შემოგვესივნენ ძაღლები, მანქანაში ჩასხდომით ვუშველეთ თავს.
კითხვაზე, არის თუ არა იმის საშიშროება, რომ ამდენმა მშიერმა ძაღლმა თავად პატრონი დაკბინოს, ბერიძემ გვიპასუხა, რომ დღემდე ახერხებს, ეს ასე არ მოხდეს…
ქალბატონმა ნონამ არაერთხელ გაუსვა ხაზი თავის გასაჭირს, რომ სახლში გაზიც არ შეუყვანია. საპირისპირო თქვა ბადრი თავდუმაძემ:
_გაზის მილი სახლამდე მოყვანილია. განცხადება არ დაწერე, რომ სახლში შეიყვანო. მოდი ადმინისტრაციულ შენობაში, დაწერე, დაგეხმარები, რომ ეტაპობრივად დაფარო თანხა. მეც, როგორც შევძლებ, გადაგიხდი, მარტოხელა ხარ, რამდენჯერ უნდა გითხრა? _ მიმართა მას თავდუმაძემ.
თუმცა, ნონა ბერიძემ კვლავ თავისი გაიმეორა – ამ ეტაპზე მხოლოდ ძაღლების მოსავლელად და გამოსაკვებად საჭირო დახმარებას ითხოვს.
ბადრი თავდუმაძემ „გურია ნიუსთან“ ისიც თქვა, რომ ორი ძაღლი ბერიძისგან თავად წაიყვანა შინ და უვლის.
_ ცოტათი შევეხიდე ამ საქმეშიც. ეს კიდევ აგროვებს ამ ძაღლებს და მოჰყავს. მეტი რა ვქნა, როგორ უნდა დავეხმარო?
მუნიციპალიტეტის მერის მოადგილე, ირაკლი სირაძე, ასევე განმარტავს, რომ არაერთხელ დაეხმარა ბერიძეს.
როგორც აღმოჩნდა, ბერიძემ, წინა დღეს, ჩვენთან საუბრისას არ თქვა, რომ სახლის დასახური მასალა ხელისუფლებამ გადასცა. რომ გაზის სახლში შესაყვანად, განცხადების დაწერა იყო საჭირო და არ მისულა წარმომადგენელთან.
კითხვაზე, რატომ არ ზრუნავს ჯერ პირადი პრობლემის მოგვარებაზე, თუნდაც იმიტომ, რომ უკეთ შეძლოს ძაღლების მოვლა, აცხადებს, რომ ძაღლების მოვლა უპირველესია მისთვის.
_როცა თავად მისახედი ხართ, მარტოხელას გეხმარებიან შესაძლებლობის ფარგლებში და ამაზე უარს ამბობთ იმ მოტივით, რომ ჯერ ძაღლებია მისახედი , ახირებაც ხომ არ არის? მადლიერების გამოხატვაც ხომ შეიძლება?
_ხან კი მეხმარებიან, უმადური არ ვარ, მაგრამ ცოდოა ეს ძაღლები. 5 ლარი მაინც მინდა დღეში მარტო პურისთვის, _ კვლავ თავისას ამბობს ის.
თუმცა, რანაირად ეყოფა 19 ძაღლს ხუთი პური, ეს ცალკე „გამოცანაა“.
როგორც ცნობილია, გურიაში მიუსაფარ ძაღლთა თავშესაფარი, ჯერჯერობით, არ არსებობს. ხდება აცრა და შემდეგ კვლავ უშვებენ იმ სივრცეში, სადაც ბინადრობენ.
სოფელ ოზურგეთში, ბერიძის მისამართით ბრაზობენ მეზობლებიც _ რომ ამ ძაღლებმა ქათმები არაერთხელ დაუგლიჯეს. ბერიძეს აქაც აქვს პასუხი: „ქათმების გაზრდა ეზარებათ და მერე ძაღლებს აბრალებენო.“
ოზურგეთის მომსახურების ცენტრის დირექტორი, თენგიზ ქუტიძე ჩვენთან საუბარში აცხადებს, რომ მუდმივი თავშესაფარი აქ არსად არის . ხდება აცრები დაავადებაზე, ცოფზე ვაქცინაცია. 4-5 დღით ცხოველთა იზოლაციის განყოფილებაში მოთავსება.
„გურია ნიუსი“ ესაუბრა ასევე უმეთვალყურეოდ დარჩენილი ცხოველების განყოფილების უფროსს, გოგი მაღლაფერიძეს.
_პური არაერთხელ ვუყიდე. შევთავაზეთ, ჩვენთან დამლაგებლად ემუშავა. უარი გვითხრა. როცა დასჭირდა, ზაღლებს აცრები გავუკეთეთ, სტერილიზაცია ჩავუტარეთ უფასოდ. მეტი არაფერი შეგვიძლია. ასეთი სახით აწიც დავეხმარებით. თვითონ აგროვებს ამ ძაღლებს. ადრე 6 ჰყავდა, ახლა 19-მდე შეუგროვებია. ჩვენ სხვა დახმარების საშუალება არ გვაქვს, _ გვითხრა მაღლაფერიძემ.
