„პრაქტიკულად, დღეს, ყველაზე პრინციპულ საკითხებზეც კი „ქართულ ოცნებას“ აღარ აქვს უმრავლესობა არც ხელისუფლებაში და არც პარლამენტში, ეს კი ნიშნავს, რომ ხელისუფლება თავისი ნებით, თავისთავს აცხადებს არალეგიტიმურად”, _ ეს განცხადება პარლამენტის დეპუტატმა ზვიად კვაჭანტირაძემ ,,გურია ნიუსთან” საუბრისას გააკეთა.
მისი თქმით, ამ სიტუაციიდან გამოსავალი ჯერ კიდევ არსებობს, რომელიც მდგომარეობს ახალი კორექტირებული კანონპროექტის პარლამენტში შეტანით.
_ დღევანდელი დღე იქნება ერთ-ერთი სამარცხვინო ფურცელი „ქართული ოცნების“ ისტორიაში _ პრაქტიკულად რომ ვივარაუდოთ, ეს არ არის სპექტაკლი, არ არის თავიდან ბოლომდე დაგეგმილი პარტიის ლიდერშიპის მიერ. მოხდა ის, რომ პარტიის წარმომადგენლების სერიოზულმა ნაწილმა გაილაშქრა პარტიის და პარტიის ლიდერშიპის წინააღმდეგ, ანუ ფაქტობრივად, ზედაპირზე ეს დევს, თუ, რა თქმა უნდა, ვივარაუდებთ, რომ ეს არ არის დადგმული სპექტაკლი.
ამით მართველი პარტია თავად აცხადებს, რომ კრიზისი დაუდგათ და უნდა გაითვალისწინონ და გაიზიარონ ეს პასუხისმგებლობა.
პრაქტიკულად დღეს ყველაზე პრინციპულ საკითხებზეც კი, „ქართულ ოცნებას“ აღარ აქვს უმრავლესობა არც ხელისუფლებაში და არც პარლამენტში, ეს კი ნიშნავს, რომ ხელისუფლება თავისი ნებით, თავის თავს აცხადებს არალეგიტიმურად.
რაც შეეხება გამოსავალს, გამოსავალი არის იმაში, რომ თუ კი ბიძინა ივანიშვილს არ სურს, რომ მისი ქმედებები და დღევანდელი გადაწვეტილება შეფასდეს პოლიტიკურ თაღლითობად, პოლიტიკურ შულერობად და თუ კი მართლა ამის პოლიტიკური ნება გააჩნიათ, რაც დაპირდნენ ქართულ საზოგადოებას, ის შეასრულონ.
ჯერ კიდევ არის დრო დარჩენილი ამისთვის, ამიტომ მათ სასწრაფოს უნდა შემოიტანონ განსახილველად ახალი კანონპროექტი, კორექტირებული, მეტნაკლებად დაბალანსებული, თუნდაც იმ ვითომდაც ამბოხებული მაჟორიტარების მიერ გამოთქმული პრეტენზიების გათვალისწინებით.
ვგულისხმობ იმას, რომ დღევანდელ კანონცვლილებასთან დაკავშირებით აპელირება და პრეტენზიები იყო იმასთან დაკავშირებით, რომ თითქოს არ იყო გათვალისწინებული რეგიონების ინტერესები, მაგრამ შეიძლება იგივე კანონპროექტი შემოვიტანოთ, რომელშიც იქნება რეგიონული პრეფენციული ან პროპორციულ-პრეფენციული პრინციპები დაცული.
თუ ამის პოლიტიკური ნება არსებობს, ამის გაკეთება შესაძლებელია, მაგრამ მე არ მაქვს ამის ილუზია, რომ არსებობს ეს პოლიტიკური ნება. ეს ნება რომ არსებულიყო, მათ ჩემზე ნაკლებად კი არ იციან ეს შესაძლო ვარიანტი.
ეს ხშირად გაჟღერებულა განხილვებისას, მაგრამ ამაზე არ წამოვიდნენ. როგორც ჩანს, დაგეგმილი იყო ის სცენარი, რაც დღეს გათამაშდა.
არ რცხვენიათ, რომ თავიანთი სახე წაიბილწეს და შეირცხვინეს იმ ამომრჩევლის წინაშე, ვისაც დღემდე მართლა სჯეროდა მართველი პარტიის.
_ ბატონო ზვიად, მოსალოდნელია თუ არა ამ პოლიტიკური კრიზისის დროს ვადამდელი საპარლამენტო არჩევნები?
_ ჩვენ ყველაფრისთვის ვიქნებით მზად, მაგრამ საკითხავია, სჭირდება თუ არა ეს ქვეყანას.
არც მალავენ, რომ დღევანდელი გადაწყვეტილება მიიღეს თითქოსდა გუნდის ერთიანობის შესანარჩუნებლად, ანუ, ფაქტობრივად, პარტიულ ინტერესებს შესწირეს ქვეყნის ინტერესები _ ეს არის სამარცხვინო.
ასეთი განცხადებას არასდროს არც ერთი პასუხისმგებლიანი პოლიტიკოსი არ გააკეთებს არც ერთ ქვეყანაში, მაგრამ ამათ გააკეთეს.
_ ბატონო ზვიად, როგორ შეაფასებდით დეპუტატების მიერ უმრავლესობის დატოვებას?
_ დღეს დეპუტატების მიერ უმრავლესობის დატოვებას რა ეფექტი ექნება, არ ვიცი. ეტყობა, ჩემი მეგობრები, კოლეგები თავიანთ პოლიტიკურ მომავალზე ფიქრობენ და არ უნდათ პასუხისმგებლობის აღება იმ გადაწყვეტილებაზე, რაც დღეს უმრავლესობამ მიიღო.
_ დღეიდან როგორ შეიძლება განვითარდეს მოვლენები?
_ ვფიქრობ, საზოგადოების კონსოლიდაცია მოხდება იმისკენ, რომ ხელისუფლებამ იგრძნოს თავისი პასუხისმგებლობა.
საზოგადოება ამ დღეებში თავისი ერთიანობით, თავისი ძალისხმევით და სინერგიით ყველანაირად შეეცდება ხელისუფლებას ეს ცვლილება მიაღებინოს, თუ არადა შემდგომ მომავალი გვიჩვენებს, რა იქნება. ყოველ შემთხვევაში, ჩვენ შეთანხმებული ვართ, რომ აბსოლუტურად კოორდინირებულები ვიქნებით ჩვენს მოქმედებაში.
