მწვავე შეფასება მოჰყვა ლანჩხუთის საკრებულოს სხდომაზე მიმდინარე წლის სოციალური პროგრამების დამტკიცების საკითხს, რომელიც დეპუტატების წინაშე განსახილველად მერიის სოციალური სამსახურის უფროსმა თამარ ფირცხალაიშვილმა წარადგინა. თუმცა, სანამ ჯერი აქამდე მივიდოდა, საკრებულოს პირველმა პირმა ბესიკ ტაბიძემ კომისიებში გაწევრიანებულ დეპუტატებს მუშაობის ტემპი დაუწონა და მეტი აქტიურობისკენ მოუწოდა კოლეგებს.
რაც შეეხება ზემონახსენებ განსახილველ საკითხს, ფირცხალაიშვილის განმარტებით, მიმდინარე წელს მუნიციპალიტეტში16 სოციალური პროგრამა გახორციელდება და საამისოდ ბიუჯეტიდან 550100 ლარის გახარჯვაა გათვალისწინებული.
ფირცხალაიშვილის მიერ წარმოდგენილ საკითხს გვიმბალაურის ადმინისტრაციული ერთეულის მაჟორიტარის, ციცო ურუშაძის მწვავე შეფასება მოჰყვა: „ძალიან მაინტერესებს, რატომ ვამტკიცებთ ყოველწლიურად ერთსა და იმავე პროგრამას?! 10 წელია, ალბათ, ასე გრძელდება და მომავალშიც ასე იქნება. სიახლე არ უნდა შემოვიტანოთ?! იყო საკითხები, რომელიც კომისიის სხდომაზე განვიხილეთ, მაგრამ, როგორც ჩანს, არ აისახა დასამტკიცებელ დოკუმენტში. როდესაც ვსაუბრობთ დიალეზის პროგრამაში ჩართულ პაციენტებზე, რომელთა ტრასპორირების ხარჯებს ვაფინანსებთ, რატომ არ შეიძლება, იგივე იყოს შეზღუდული შესაძლებლობის მქონე ბავშვებზე?! მათ სახელმწიფო უფინანსებს რეაბილიტაციის კურსს, მაგრამ ის ტარდება სხვადასხვა ადგილას. ხომ შეიძლება ამ ბავშვების ტრანსპორტირება უზრუნველვყოთ?! სიახლეები ხომ უნდა დავნერგოთ. ავიღოთ ქირავნობის პროგრამა _ ათასი არასამთავრობოა, რომლებთანაც შეიძლება თანამშრომლობა და ბიუჯტიდან თანხების დაზოგვა. ვინმე ფიქრობს, რომ დაეკონტაქტოს არასამთავროებებს?! ხომ შეიძლება გაკეთდეს დროებითი თავშესაფარი იმ ადამიანებისთვის, რომლებიც ბინადრობის პროგრამით სარგებლობენ, შემდეგ გამოსწორდება მათი ყოფა და დაბრუნდება ეს ხალხი სახლებში“.
ურუშაძის პასუხად მერიის სამსახურის უფროსმა განმარტა, რომ შეზღუდული შესაძლებლობების მქონე ბავშვების ტრანსპორტირების თემა დამატებით შესწავლასა და შესაბამის სამსახურთან დამატებით კონსულტაციების გამართვას საჭიროებს. დასადგენია, რა პერიოდულობით საჭიროებენ ეს ბავშვები ტრანსპორტირებას.
ციცო ურუშაძე, ასევე, დაინტერესდა, თუ რას ხმარდება თანხა, რომლითაც ლანჩხუთის ბიუჯეტიდან ეპარქია ფინანსდება.
„რამდენადაც ვიცი, სასულიერო გიმნაზიის მოსწავლეების ტრანსპორტირებისთვის 7000 ლარზე მეტია გამოყოფილი. მე ამის წინააღმდეგი არ ვარ, პირიქით, დიდი მოკრძალებით ვარ ამ სკოლის მიმართ, უბრალოდ, მაინტერესებს, ჩვენ ყოველწლიურად 50 ათასი ლარს რომ ვაძლევთ მეუფის რეზიდენციას, რაში იხარჯება ეს თანხები?! იქნებ, სწორედ ამ 50 ათასიდან დაფინანსდეს სასულიერი გიმნაზიის მოსწავლეების ტრანსპორტირების ხარჯები“, _ დასძინა გვიმბალაურის მაჟორიტარმა.
აღნიშნული თანხის მიზნობრიობით ლესის მაჟორიტარი ელისო ჭიჭინაძეც დაინტერესდა: „მეც მაინტერესებს, სად მიდის ეს 50 ათასი ლარი. ლესაში ეკლესია შენდება, ამდენი ხანია ვითხოვთ დახმარებას. ერთი ლარი არ მიგვიღია იმ ფულიდან, რომელიც ჩვენ გამოვყავით. გვაქვს კითხვები და გვინდა პასუხები“.
კოლეგების ცნობისმოყვარეობის დაკმაყოფილებას უმრავლესობის წევრი დეპუტატი გიორგი ჩახვაძე შეეცადა: „მე მაქვს მამაოებთან ურთიერთობა და მათგან ვიცი, რომ ეს თანხა არსად მიდის, გარდა იმისა, რომ ეკლესიებს ხმარდება, ლანჩხუთის ეკლესიებს, ნამდვილად ასეა!“
მერის მოადგილის გოგი ფაცურიას გამარტებით, ვისაც აინტერესებს, თუ რას ხმარდება ზემონახსენები თანხა, შეუძლია შესაბამისი ანგარიში მოითხოვოს და გაიგოს რეალური მდგომარეობა.
