“გურია ნიუსისთვის” ცნობილი გახდა, რომ ჯერჯერობით არ გარკვეულა იმ დამოუკიდებელი ექსპერტის ვინაობა, ვინც საექსპერტო კომისიაში სახალხო დამცველის ინიციატივით ჩაერთვება.
გუშინ სხვადასხვა მედიასაშუალებებმა გაავრცელეს ინფორმაცია, თითქოს მთავარმა პროკურატურამ უარი თქვა დამოუკიდებელი ექსპერტის ჩართვაზე.
“მთავარი პროკურატურისთვის ოფიციალურად არავის მოუმართავს და აქედან გამომდინარე, არც უარი გვითქვამს. მომართვის შემდეგ პროკურატურა განიხილავს მათ მიერ შერჩეული ექსპერტის კომპეტენციას და ამის მიხედვით მიიღებს გადაწყვეტილებას”-განაცხადა მთავარი პროკურატურის პრესსამსახურის ხელმძღვანელმა ხათუნა პაიჭაძემ “გურია ნიუსთან”.
ახლუდინ ალდამოვი ლაფანყურში მოკლული ბაჰაუდინ ალდამოვის მამა ამბობს, რომ 3 დღის წინ სახალხო დამცველი პირადად შეხვდა დაღუპულთა მშობლებს და დამოუკიდებელი ექსპერტის ჩართვას დაჰპირდა.
“უჩა ნანუაშვილმა გვითხრა ,რომ დაგვეხმარებოდა ყველაფერში. დაგვპირდა რომ ექსპერტს თვითონ შეარჩევდა და ყველა ხარჯს თავად გაისტუმრებდა. ჩვენ ფულის გადახდაზე პრობლემა არ გვაქვს, თუ გვეტყვიან რომ გადასახდელი გვაქვს , გადავიხდით, ოღონდ სიმართლე გაირკვეს”.
“გურია ნიუსისთვის” ცნობილი გახდა, რომ პროკურატურას დამოუკიდებელ ექსპერტად მაია ნიკოლეიშვილის კანდიდატურა შესთავაზეს, რაც საგამოძიებო უწყებისთვის მიუღებელი აღმოჩნდა.
როგორც გავარკვიეთ, სახალხო დამცველი დამოუკიდებელი სასამართლო ექსპერტიზის ცენტრ “ვექტორის” დირექტორს ალექსანდრე გეჯაძესაც დაუკავშირდა და ექსპერტთა კომისიაში ჩართვა შესთავაზა.
“სახალხო დამცველმა დამირეკა და მითხრა, სამი გვამია ჩამოტანილი და იქნებ დაგვეხმაროთო. ვკითხე, ჩაუტარდათ თუ არა მათ ექსპერტიზა, რაზეც მიპასუხა, ჯერ არ ჩატარებულა, მაგრამ აპირებენო. თუ გამომძიებელი მიიღებს გადაწყვეტილებას და დამსწრის სტატუსით ჩაგვრთავს, მაშინ არანაირი ფინანსური ანგარიშსწორება არ იქნება საჭირო, უფასოდ მივიღებთ კვლევაში მონაწილეობას” _ ამბობს ექსპერტი გეჯაძე.
როგორც ირკვევა, ჯერ არ გადაწყვეტილა ვინ გადაიხდის დამოუკიდებელი ექსპერტის ჰონორარს, რაც შესასრულებელი სამუშაოს გათვალისწინებით, დაახლოებით 4-5 ათასი ლარია. ამბობენ, რომ მაია ნიკოლეიშვილი ერთადერთია, ვინც თანახმაა უფასოდ ჩაატაროს ექსპერტიზა.
შპს “ვექტორის” ექსპერტებს ექსპერტის სტატუსით უფასოდ ჩართვის უფლებას კანონი არ აძლევს. შესაბამისად, ალექსანდრე გეჯაძე მზად არის ასევე ანაზღაურების გარეშე, ოღონდ დამსწრის სტატუსით მიიღოს კვლევაში მონაწილეობა. აღსანიშნავია, რომ დამსწრე ხელს მხოლოდ კვლევის ნაწილზე აწერს, საბოლოო დასკვნაზე კი თუ რა გახდა სიკვდილის მიზეზი და აშ. მას ხელის მოწერის უფლება არ აქვს.
“თუ სამ გარდაცვლილზე დროულად არ გვაცნობებენ ექსპერტიზის დასკვნის შედეგებს, შეიძლება დანარჩენი ბიჭების ექსჰუმაციაზე საერთოდ უარი ვთქვათ,” _ ამბობენ ჭირისუფლები.
