ამის შესახებ საქართველოს პარლამენტის აგრარულ საკითხთა კომიტეტის თავმჯდომარემ, გიგლა აგულაშვილმა დარგობრივი ეკონომიკისა და ეკონომიკური პოლიტიკის და რეგიონული პოლიტიკისა და თვითმმართველობის კომიტეტების გართიანებულ სხდომაზე განაცხადა, სადაც კომიტეტების წევრებმა „სასოფლო-სამეურნეო კოოპერატივის შესახებ“ კანონპროექტთა პაკეტი განიხილეს.
როგორც პროექტის ინიციატორმა განმარტა, მეურნეობების გაერთიანება და კოოპერატივებში გამსხვილება საუკეთესო საშუალებაა სოფლის მეურნეობის სექტორში არსებული ვითარების გაუმჯობესებისთვის, სოფლისა და სოფლის მეურნეობის აღორძინების ხელშეწყობისთვის და ამით, მოსახლეობის სოფლიდან მიგრაციის შეჩერებისთვის. მისი თქმით, კოოპერირება ხელს შეუწყობს სოფლის მეურნეობის სფეროში არსებული რესურსების უკეთ და უფრო ეფექტურად გამოყენებას. უნდა აღინიშნოს, რომ საკანონმდებლო პაკეტის ფარგლებში გათვალისწინებულია საგადასახადო კანონმდებლობაში ცვლილებების შეტანაც, რომლის მთავარი არსი სასოფლო-სამეურნეო კოოპერატივებისთვის საგადასახადო შეღავათების დაწესებაში მდგომარეობს.
კერძოდ, 2017 წლის 1 იანვრამდე მოგების გადასახადისაგან გათავისუფლდება სასოფლო-სამეურნეო საქმიანობით მიღებული შემოსავალი. ასევე 2017 წლის 1 იანვრამდე ქონების გადასახადისგან თავისუფლდება სასოფლო-სამეურნეო კოოპერატივის სტატუსის მქონე პირის საკუთრებაში არსებული სასოფლო-სამეურნეო საქმიანობაში გამოყენებული ქონება გარდა მიწისა, ასევე ასეთ პირებზე ლიზინგით გაცემული მოძრავი ქონება. ამავე პერიოდამდე ერთობლივ შემოსავალში არ აისახება და დაბეგვრისაგან გათავისუფლდება კოოპერატივის წევრთა შორის სასოფლო-სამეურნეო საქმიანობის შედეგად მიღებული პროდუქტის და მასთან დაკავშირებული მომსახურების მიწოდება. გარდა ამისა, სასოფლო-სამეურნეო კოოპერატივში, ამავე კოოპერატივის მეპაიეების მიერ პაის სახით მისი შეტანის შემთხვევაში, მიწაზე ქონების გადასახადის განაკვეთი 50%-ით შემცირდება.
პარლამენტის აგრარულ საკითხთა კომიტეტის ინიციატივით მომზადებული საკანონმდებლო პაკეტი სხდომაზე პირველი მოსმენით განიხილეს.
საპარლამენტო უმცირესობა სასოფლო-სამეურნეო კოოპერატივების შექმნის ინიციატივას მიესალმება, თუმცა, როგორც აღნიშნეს, კანონპროექტი მეწარმეთა მიმართ დისკრიმინაციულია. სერგო რატიანმა ყურადღება იმ შეღავათებზეც გაამახვილა, რომელიც საკანონმდებლო პროექტის თანახმად, კოოპერატივების მიმართ ამოქმედდება.
დეპუტატის განმარტებით, ასეთ შემთხვევაში არათანაბარ მდგომარეობაში ჩადგებიან ის მეწარმეები და ფერმერები, რომლებიც კოოპერატივებში არ იქნებიან გაერთიანებული.
სერგო რატიანი მიიჩნევს, რომ კანონპროექტი ამ მიმართულებით ხარვეზს შეიცავს და საჭიროა ისეთი მექანიზმების მოფიქრება, რაც მეწარმეებს დისკრიმინაციულ მდგომარეობაში არ ჩააყენებს.
