ექიმების თქმით, აუცილებლად უნდა დაისაჯონ ის ადამიანები, რომლებმაც მუნიციპალიტეტში არსებული ერთადერთი საავადმყოფო 1 ლარად გაყიდეს და პერსონალს 3 წელია მონურ პირობებში ამუშავებს. ხელისუფლება კი აუცილებლად უნდა დაინტერესდეს “ადითის” საქმიანობით და ყველა მისი ქმედება საჯარო უნდა გახდეს.
ჯანდაცვის მინისტრი დავით სერგეენკო ამ საკითხით არაერთგზის დაინტერესდა და “ადითის” ინვესტორებს მკაცრი გაფრთხილება მანამდე მისცა, სანამ ექიმები საპროტესტო აქციებს მოაწყობდნენ.
ამის შესახებ 1 მაისს “გურია ნიუსს” ჯანდაცვის მინისტრის მრჩეველმა სადაზღვევო საკითხებში ლაშა ნიკოლაძემ განუცხადა.
.”ადითთან” დაკავშირებით შემიძლია გითხრათ, რომ “ადითის” ინვესტორი ორი დღის წინათ შეხვდა მინისტრს და ბატონმა დავით სერგეენკომ პირველი მოთხოვნა დაუყენა ის, რომ სახელფასო დავალიანება ბოლომდე გადაეხადათ. ჩვენ ველოდებოდით, რომ აღდგომამდე სრულად თუ არა, ნაწილი დაფარვა მაინც მოხდებოდა , რადგან მათგან დაპირება იყო, რომ თუ სრულად ვერ მოვახერხებთ დაფარვას, გრაფიკს მაინც შევადგენთო. არ გაუგრძელდათ ხელშეკრულება. კიდევ ერთხელ გიმეორებთ, პირველი და უპირობო მოთხოვნა ბატონი მინისტრისგან იყო ასეთი: ჯერ დაფარეთ სახელფასო დავალიანებები და შემდეგ ვილაპარაკოთ სხვა პრობლემებზეო”.
“ადითმა” სახელფასო დავალიანება ნაწილობრივ დაფარა, მაგრამ ამით პრობლემა არ ამოწურულა.
ამ ამბიდან ორი კვირის თავზე, 17 მაისს, ჯანდაცვის მინისტრმა კომპანიას უმკაცრესი პირობები წაუყენა…
გამკაცრებული მონიტორინგის მექანიზმი და უფრო მყარი ფინანსური გარანტიები _ ასეთი პირობები წაუყენა ჯანდაცვის მინისტრმა დავით სერგეენკომ კომპანია “ადითის” წარმომადგენლებს 17 მაისს პარლამენტის ჯანდაცვის კომიტეტში გამართულ შეხვედრაზე.
17 მაისს, პარლამენტში გამართულ შეხვედრას, ჩოხატაურისა და ლანჩხუთის ,”ადითის” საავადმყოფოების წარმომადგენლები თეიმურაზ კოროშინაძე და თინათინ გოგუაძე, ასევე საპარლამენტო უმრავლესობის წევრებიც ესწრებოდნენ. შეხვედრა საკმაოდ დაძაბულ ვითარებაში მიმდინარეობდა. მინისტრმა კომპანიის წარმომადგენლებს სავადმყოფოებში არსებული მძიმე მდგომარეობა შეახსენა, ასევე “ადითის” მხრიდან შეუსრულებელი ყველა ვალდებულება და ხელშეკრულების დარღვეული პირობები, რომლის თანახმად საავადმყოფოებში დაახლოებით ორი წლის განმავლობაში სიტუაცია უფრო მეტად გაუარესდა. ამას თან ერთვის თვეობით გაუცემელი ხელფასები, მედიკოსების პერმანენტული გაფიცვები და თითქმის გაჩერებული საავადმყოფოები, რომლის გამო ადგილობრივი მოსახლეობა სამედიცინო მომსახურებას ვერ იღებს.
შეხვედრა პარლამენტში და ძალიან მკაცრი დავით სერგეენკო
17 მაისს პარლამენტის ჯანდაცვის კომიტეტში გამართულ შეხვედრაზე მინისტრის კრიტიკა არ ასცდა ჩოხატაურის,”ადითის“ საავადმყოფოს ხელმძღვანელს კოროშინაძეს. როგორც სერგეენკომ აღნიშნა, კოროშინაძის ანალიტიკურ გამოსვლაში ყველაფერზე იყო საუბარი გარდა პაციენტების ინტერესებისა.
“თქვენ ვრცლად ისაუბრეთ თქვენივე ანალიტიკურ გამოსვლაში იმასთან დაკავშირებით თუ როგორ შემცირდა შემოსავალი საავადმყოფოში და რა ზიანი მიადგა ამით სამედიცინო დაწესებულებას, ერთი სიტყვაც არ გითქვამთ პაციენტებზე. სად არის აქ გათვალისწინებული პაციენტების ინტერესები?!”_ასე მიმართა მინისტრმა კოროშინაძეს რომლისგან შესაბამისი პასუხი ვერ მიიღო.
ჯანდაცვის კომიტეტის სხდომაზე საუბარი “ადითის” წარმომადგენლებთან საკმაოდ დაძაბულად წარიმართა. საპარლამენტო უმრავლესობის წევრი ზაქარია ქუცნაშვილი კომპანიასთან ხელშეკრულების შეწყვეტას ემხრობოდა, თუმცა “ადითის” წარმომადგენლები კი არსებულ სიტუაციას კლინიკებში მხოლოდ სადაზღვევო კომპანიების უპასუხისმგებლობით ხსნიდნენ.
“ადითის” სამედიცინო დირექტორის ნიკოლოზ ფრუიძის განცხადებით, 7 სადაზღვევო კომპანიიდან, რომელთანაც “ადითს“ ხელშეკრულება აქვს, ყველას დავალიანება დაახლოებით 780 000 ლარზე მეტს შეადგენს.
“გურია ნიუსი” შემდგომი პროცესებით დაინტერესდა, თუ რა პოზიცია ექნება ჯანდაცვის სამინისტროს არსებულ კომპანიასთან დაკავშირებით და იქნება თუ არა გადაწყვეტილებები რადიკალური? დავით სერგეენკომ აღნიშნა, რომ გადაწყვეტილებები იქნება ცალსახა.
“ჩვენი პოზიცია არის ცალსახა, რომ ნებისმიერი მოლაპარაკება ხელშეკრულების გაგრძელებაზე ან შეწყვეტაზე შესაძლებელი იქნება მხოლოდ მას შემდეგ, რაც წარმოდგენილი იქნება სახელფასო დავალიანებების დაფარვის უმოკლესი გრაფიკი. ეს გრაფიკი უკვე წარმოდგენილი არის. შესაბამისად, ჩვენ შეიძლება ვისაუბროთ ხელშეკრულების გაგრძელების პირობებზე, რომელიც იქნება არა არსებული, არამედ განახლებული ვალდებულებებით, სადაც მონიტორინგის ძალიან მკაცრი მექანიზმი იქნება ჩადებული. ასევე ძალიან მყარი ფინანსური გარანტიები. ამ დოკუმენტს წარმოვადგენთ მომავალი კვირის განმავლობაში და თუ მოხდა შეთანხმება პარლამენტის წევრებთან, თვითონ კლინიკების წარმომადგენლებთან, სამინისტორებთან და კომპანიასთან, ანუ ეს იქნება მრავლმხრივი მსჯელობა, წავალთ თუ არა ამ მიმართულებით”_ განაცხადა დავით სერგეენკომ.
“გურია ნიუსი“ კომპანია “ადითის” წარმომადგენლების პოზიციითაც დაინტერესდა. შევეცადეთ იმ კითხვებზე, რომელიც ყველაზე მეტად “ადითის” საავადმყოფოებში დასაქმებულ ადამიანებს აინტერესებთ, პასუხები “ადითის” სამედიცინო დირექტორისგან, ნიკოლოზ ფრუიძისგან მიგვეღო.
_ ბატონო ნიკოლოზ, რამდენი აქვს “ადითის” დავალიანება სადაზღვევო კომპანიებს?
_ თანხობრივად, დღევანდელ დღეს, სადაზღვევო კომპანიებს ფირმა “ადითის” მიმართ საერთო დავალიანება 780 000 ლარი აქვთ. ზოგ კომპანიას ფული არ გადაუხდია ივნისის თვიდან ზოგს _ დეკემბერი, იანვარი, თებერვლიდან. ერთადერთი სადაზღვევო კომპანია, რომელიც პირნათლად ასრულებს ვალდებულებებს, “ალდაგია”.
_ რატომ ხდება ხელფასების დაგვიანება ან საერთოდ გაუცემლობა მაშინ, ის მიზერულ თანხას შეადგენს?
_ ვერ დაგეთანხმებით იმაში რომ ეს მიზერული თანხებია, იმდენად რამდენადაც სახელფასო ფონდი ოფიციალურია და შეუძლია ყველას ნახოს. ამ საავადმყოფოებში არის შემოსავლის 44 %
_ არის საავადმყოფოები, სადაც მედპერსონალის ხელფასი 15 -20 ლარს შეადგენს თვეში და ისიც რამდენიმე თვის დაგვიანებით ეძლევათ…
_ თუ ვერ გავეცით ხელფასი, ეს იმიტომ, რომ რამდენიმე პროგრამა მუშაობს საქართველოში, ეს არის უმწეოების და პენსიონერების დაზღვევა. ეს იყო სახელმწიფო სტანდარტი. შემოვიდა ახლა საყოველთაო დაზღვევა. ამ დაზღვევამდე მუშაობდა ორი ძირითადი პროექტი და ამ ორი პროექტიდან თანხის ძირითადი შემოსავალი ხელფასებისთვის იყო განკუთვნილი. აქედან გამომდინარე, ესენი იყვნენ გამომუშავებაზე. თუ არ მოხდა სადაზღვევოებიდან გადმორიცხვა, ისე ვერ გავცემთ ხელფასებს.
_ როდის მოხდება სახელფასო დავალიანების დაფარვა?
_ წინასწარი მოლაპარაკებებით ჩვენ ვთვლით, რომ ივნისის თვეში მარტის თვის დავალიანებამდე უნდა იყოს ყველაფერი დაფარული. _ განაცხადა “გურია ნიუსთან” საუბრისას ნიკოლოზ ფრუიძემ.
ჯანდაცვის კომიტეტში შეხვედრას ესწრებოდა “ადითის” უცხოელი აქციონერების წარმომადგენელი ილიანა ლევინი, რომლის მოსაზრებათ დაახლოებით ისეთივე იყო, როგორიც ნიკოლოზ ფრუიძის.
ის “ადითის” მფლობელობაში მყოფ 8 რაიონულ საავადმყოფოში არსებულ მდგომარეობაზე სრულ პასუხისმგებლობას სადაზღვევო კომპანიების არასწორ პოლიტიკას და გადანაწილებას აკისრებს.
როგორც ლევინი აცხადებს, 2008 წელს აგვისტოს ომამდე მიიღეს ტენდერში მონაწილეობა და გაიმარჯვეს. მერე ომიდან გამომდინარე შეჩერდა, იმიტომ რომ რეალური აღარ იყო ტენდერის შედეგები. შემდეგ, 2010 წელს ისევ გამოცხადდა ტენდერი და ისევ მიიღეს მონაწილეობა და მხოლოდ 8 რაიონის საავადმყოფო დარჩა სატენდერო წინადადებაში და რვაზევე მიიღეს ტენდერში მონაწილეობა.
_ ადასტურებთ თუ არა იმ ინფორმაციას, რომ კომპანია ოფშორულ ზონაშია დარეგისტრირებული?
_ სრული აბსურდია, რომ კომპანია, რომელიც 8 საავადმყოფოს ფლობს, ოფშორულ ზონებში დარეგისტრირებული. ეს კომპანია საქართველოშია დარეგისტრირებული, ქართული კომპანიაა, უბრალოდ დამფუძნებელი არის ამერიკული კომპანია. ხოლო ქართული კომპანია ოპერირებს დღეს ამ საავადმყოფოებს.
_ იცოდით თუ არა რა სიტუაცია იყო საავადმყოფოებში და მოულოდნელი ხომ არ აღმოჩნდა ის, რაც აქ მოისმინეთ?
_ პრობლემები, რომელიც სამედიცინო დაწესებულებებშია, შევისწავლეთ და შესაბამისი ანალიზიც გავაკეთეთ. ასე რომ, არ ყოფილა ეს მოულოდნელი ჩვენთვის. სრული მოულოდნელობა იყო სადაზღვევო კომპანიების გადანაწილება და მათი პოლიტიკა, რომელიც განახორციელეს რეგიონებში. ეს არა მარტო ჩვენ გვიშლის ხელს მუშაობაში, არამედ პაციენტსაც, რომ თვითონ შეარჩიოს ის სადაზღვევო კომპანია, რომელიც მას ურჩევნია. ასევე დისკომფორტს უქმნის ექიმებსაც ის გარემოება, რომ სადაზღვევო კომპანიები თანხას დროულად არ იხდიან.
_ გაქვთ თუ ,არა სურვილი ისევ გააგრძელოთ ხელშეკრულება?
_ სურვილი გვაქვს და განვიხილავთ კომპანიაში, თუ როგორ შეიძლება გაგრძელდეს ბიზნესი. მაგრამ ყველაზე დიდი პრობლემა არის სადაზღვევო კომპანიების მხრიდან თანხების გადარიცხვაში შესრულებულ სამუშაოებზე. თუ ეს არ დარეგულირდა, შეუძლებელია აქ ბიზნესის წარმოება” _ განაცხადა ილიანა ლევინმა .
“ადითის” ისტორია და ექიმების პრობლემები გაცილებით ადრე დაიწყო, ვიდრე დავით სერგეენკო ჯანდაცვის მინისტრი გახდებოდა…
“მოგესალმებით ჩემს მიწაზე!” _ “აიჰოპი” საქართველოში…
ყველაფერი დაიწყო იმით, რომ 2008 წელს ისრაელის სამედიცინო კომპანია “აიჰოპი” საქართველოში შემოვიდა.
“მოგესალმებით ჩემს მიწაზე!” _ ასე შეხვდა თავის დროზე კომპანიის მენეჯერი გურულ ექიმებს. “თავიანთ მიწაზე” “ადითმა” საკუთარი წესები შემოიღო: გაზარდა ფასები, შეამცირა შტატები და ხელფასები, მედპერსონალი გადაიყვანა გამომუშავებაზე და 15 ლარიდან მათთვის მხოლოდ 2,5 ლარს იმეტებდა. ამას კი საავადმყოფოებიდან პროფესიონალების გადინება, ინფრასტრუქტურის მხრივ სავალალო მდგომარეობა და საეჭვო მომავალი მოჰყვა.
მაშინდელი პრემიერ მინისტრის, ნიკა გილაურის განმარტებით, კომპანიას საქართველოს 27 რაიონში, “100 ახალი საავადმყოფოს” პროექტის ფარგლებში, ახალი საავადმყოფოები უნდა აეშენებინა.
“ეს არის ახალი ხელშეკრულება, რომლის მიხედვითაც კომპანიას უძრავი ქონება მხოლოდ აუდიტორულად დამოწმებული წინასწარ განსაზღვრული ინვესტიციის გახორციელების შემდეგ გადაეცემა”, _ განაცხადა მაშინ ნიკა გილაურმა. თუმცა, “აიჰოპმა” აღებული ვალდებულებები ვერ შეასრულა და 2010 წლის ივლისში, კომპანია “100 ახალი საავადმყოფოს” პროექტს, საქართველოს მთავრობის გადაწყვეტილებით, ჩამოაშორეს. ამის შესახებ, იმდროინდელმა შრომის, ჯანმრთელობისა და სოციალური დაცვის მინისტრმა ალექსანდრე კვიტაშვილმა პარლამენტის ჯანმრთელობის დაცვისა და სოციალურ საკითხთა კომიტეტის სხდომაზე განაცხადა:
_ “აიჰოპს” სახელმწიფოს წინაშე ნაკისრი ყველა ვალდებულება გაუუქმდა. თუმცა, თუ კომპანია დაფინანსების წყაროს მოიძიებს და პროექტის გახორციელებაში მონაწილეობის სურვილს გამოთქვამს, მთავრობა მასთან თანამშრომლობისთვის მზად იქნება, _ აღნიშნა კვიტაშვილმა.
სწორედ ამ განცხადების შემდეგ გახდა ცნობილი, რომ მთავრობას “100 ახალი საავადმყოფოს” პროექტი ჩავარდა და საზოგადოებას ჯანდაცვის სისტემის დასარეგულირებლად ახალი პროექტი შესთავაზეს. გამოაცხადეს ტენდერი, რომლის თანახმად, გამარჯვებულ სადაზღვევო კომპანიებს ახალი ობიექტების მშენებლობა დაევალათ. ტენდერში გამარჯვებული ფირმებიდან, ერთ-ერთი იყო შპს “ადითი”, რომელიც, მთავრობის მიერ გაკრიტიკებული “აიჰოპის” შვილობილი კომპანიაა. “ადითმა” მოახერხა და საავადმყოფოები საქართველოს 9 ქალაქში შეიძინა _ მათ შორის, ჩოხატაურსა და ლანჩხუთში. უცნობია, რა გადაიხადა ებრაულმა კომპანიამ საავადმყოფოებში და რა ვალდებულებები აქვს აღებული მას სახელმწიფოს წინაშე.
“ადითმა” საავადმყოფოებში შესვლისთანავე მედპერსონალს ხელფასები გაუნახევრა; ბოლოს კი კადრებიც მინიმუმამდე დაიყვანა. 2011 წლის 31 დეკემბერს, შპს “ადითმა” ჩოხატაურის საავადმყოფოდან 25 თანამშრომელი გაუშვა, დარჩენილებს კი ხელშეკრულებები შეუცვალა.
პ. ს. როგორ დასრულდება მოლაპარაკებები და რა პირობები დაიდება სახელმწიფოსა და “ადითის” მხრიდან საავადმყოფოებში არსებული უმძიმესი მდგომარეობის გამოსასწორებლად, ცნობილი დაახლოებით ერთ კვირაში გახდება.
