აქციაზე იყვნენ ბაჩო ახალაიას ოჯახის წევრები, მეგობრები, სამხედროები, სამეგრელო-ზემო სვანეთის გუბერნატორი, ზუგდიდის საკრებულოს თავმჯდომარე, საკრებულოს წევრები. ბაჩო ახალაიას მხარდასაჭერად განმუხურში ჩავიდნენ საპარლამენტო უმცირესობის წარმომადგენლებიც.
იქ მისულ ადამიანებს სიტყვით როლანდ ახალაიამ მიმართა: “მე ვხედავ, რომ ჩვენ მარტონი არ ვართ. ჩვენი ოჯახდან ერთი ციხეშია და მეორე _ დევნილია, მათ არ შეუძლიათ თქვენთვის მადლობის გადახდა, მაგრამ, სამაგიეროდ, აქ მოვიდნენ მათი შვილები: პატარა დათა ახალაია და კესო ახალაია, რომელსაც მამა ციხეში ჰყავს და 7 თვე არ უნახავს. უსამართლობა ვერ გაიმარჯვებს ვერასდროს, მე დარწმუნებული ვარ ამაში. სამართალი ურმით დადის, ურმები დაიძრა დღეს და სამართალი თავის გზას იპოვის. 9 წლის განმავლობაში ჩვენს ოჯახს შავი პიარით ხატავდნენ, ადამიანთა მჭამელებად სახავდნენ, რომ ყველაფერი ჩემი შვილისთვის გადაებრალებინათ და შეეწმინდათ ხელები. სულ მალე გეტყვით ყველაფერს, სულ მალე ყველაფერს ფარდა აეხდება და ყველაფერს თავისი სახელი დაერქმევა. მე არ ვარ მიჩვეული ვილაპარაკო ჭორების დონეზე, შესწავლილი მაქვს რაღაცები და სულ მალე ვამცნობ საზოგადოებას.”
ამფითეატრის სცენიდან საპარლამენტო უმცირესობის წევრმა ნუგზარ წიკლაურმა თქვა, რომ დღეს “სამეგრელომ დაამტკიცა _ ბაჩო მარტო არაა!” და თავისი გამოსვლა საქართველოს პრემიერ-მინისტრისადმი მიმართვით დაასრულა: “მე მინდა ვუთხრა საქართველოს პრემიერ-მინისტრ ბიძინა ივანიშვილს, იმ ადამიანს, ვინც ჩემი ძმა დააპატიმრა _ გონს მოეგოს!”
აქცია ბაჩანა ახალაიას მეუღლის ანი ნადარეიშვილის ორგანიზებული იყო. მან ამის შესახებ ჯერ კიდევ ერთი კვირის წინ დააანონსა. ანი ნადარეიშვილის თქმით, სწორედ ეს ადამიანები აძლევენ ძალას სიმართლის ბოლომდე დასამტკიცებლად.
აქციაზე შეიარაღებული ძალების ყოფილმა გენერალმა გიგი კალანდაძემ იქ მყოფ საზოგადოებას უახლესი ინფორმაცია მიაწოდა და უთხრა, რომ ყოფილი სამხედროები არასამთავრობო ორგანიზაცია “დიდგორს”ქმნიან, რომლის პრეზენტაციას მოკლე დროში იქნება.
აქციის პარალელურად განმუხურის ამფითეატრში ბაჩო ახალაიას თავდაცვის მინისტრობის დროინდელი ფოტოებიც გამოიფინა. აქციაზე მისულ მხარდამჭერებს ეცვათ მაისურები წარწერით: “ბაჩო, მე შენთან ვარ!”
ღონისძიების დასასრულს ბაჩო ახალაიას მინისტრობის პერიოდში შექმნილი ფილმის ჩვენებაც გაიმართა, რომელიც ქართული შეიარაღებული ძალების შესახებ იყო გადაღებული.
