თანხის უმეტესი ნაწილი ხელფასებს ხმარდება. ამ დრომდე, ყველა აიპ-ის ხელმძღვანელს ერთნაირი ხელფასი _ 470 ლარი ჰქონდა. თუმცა, როგორც ოფიციალურად გამოთხოვილი დოკუმენტებიდან ირკვევა, გამონაკლისი მხოლოდ ერთი აიპ-ის _ კომპლექსური სასპორტო სკოლის ხელმძღვანელზე, გოჩა ჯიქიაზე დაუშვეს, რომელიც თანამდებობაზე არჩევნების შემდეგ დაინიშნა (ჯიქია კოალიცია “ქართული ოცნების” საარჩევნო შტაბის ხელმძღვანელი იყო ავტ.) _ მისი ხელფასი 700 ლარს შეადგენს.
ჩოხატაურის მუნიციპალიტეტის გამგეობის საფინანსო სამსახურის უფროსის, ზურაბ ჩანტლაძის თქმით, ჯიქიას ხელფასი გამგებელთან შეთანხმებით დაენიშნა:
_ ხელფასებს აიპ-ების ხელმძღვანელები თავად განსაზღვრავენ. თუ მათ ბიუჯეტში ამის საშუალება აქვთ, 1 000 ლარიც შეუძლია დაინიშნოს, _ გვითხრა ჩანტლაძემ.
ჩოხატაურის მუნიციპალიტეტის გამგებლის მოვალეობის შემსრულებელი, თამაზ ჯინჭარაძე ამბობს, რომ ამ საქმეს საკრებულო კურირებს:
_ საკრებულოს შექმნილია ყველა აიპი. მე მათ ხელმძღვანელებს არც ვნიშნავ და არც ვათავისუფლებ. ზურაბ ჩანტლაძის და ჩემი გადასაწყვეტი არაა აიპ-ში ვის რა ხელფასი ექნება. ამ საქმეს საკრებულო კურირებს, _ გვითხრა ჯინჭარაძემ.
საკრებულოს თავმჯდომარის, ანტონ ხუნდაძის თქმით, აიპებ-ის დებულების თანახმად, ხელფასების საკითხში საკრებულო არ ერევა:
_ ჩვენ არაფერ შუაში ვართ. ეს გამგეობასთან გაარკვიეთ.
_ გამგეობამ თქვენთან გადაგვამისამართა…
_ შეცდომით მოუციათ მისამართი. მართალია, ჩვენი დაფუძნებულია ყველა აიპი და ჩვენ ვკურირებთ, თუმცა, ფინანსური საკითხები ჩვენ არ გვეხება და ვინც ამას ამბობს, ვურჩევ, დებულება წაიკითხოს, _ აღნიშნა ჩვენთან საუბრისას ხუნდაძემ.
მისივე თქმით, იმ დროს, როცა ჯიქიას 700 ლარი დაენიშნა, შვებულებაში იმყოფებოდა და შესაბამისად, ამის შესახებ არანაირ ინფორმაციას არ ფლობს.
თავად ჯიქია ამბობს, რომ 700-ლარიანი ხელფასი მისვლისთანავე დახვდა, თუმცა, ოფიციალური დოკუმენტის თანახმად, მის წინამორბედს 470 ლარი ჰქონდა.
გოჩა ჯიქიას განმარტებით, ის არაა გამონაკლისია, რადგან სპორტის განვითარების ცენტრის ხელმძღვანელს, ზურაბ ჯინჭარაძესაც 700 ლარი აქვს ხელფასი.
_ თქვენ გქონიათ არასწორი ინფორმაცია. მე მაქვს დოკუმენტი ნანახი, სადაც წერია, რომ ზურაბ ჯინჭარაძეს 700 ლარი აქვს ხელფასი. რაც შეეხება ჩემს ხელფასს, ეს, როგორც ვიცი, კანონის დარღვევა არ არის. თანაც, იგი მისლისთანავე დამხვდა. გარდა ამისა, ყველაფერს ვაკეთებ იმისთვის, რომ ხელფასები ჩემს თანამშრომლებსაც მოემატოთ. სხვათა შორის, ჩემს მოადგილეს, რომელიც სულაც არაა “ქართული ოცნების” წევრი, იგივე ხელფასი დარჩა, რაც დირექტორობისას ჰქონდა. ამას ემატება მისი, როგორც მწვრთნელის ანაზღაურება და თითქმის 700 ლარი გამოდის, _ გვითხრა ჯიქიამ.
საკრებულოს მიერ მოწოდებულ დოკუმენტაციაში, დედანთან დამოწმებულ ასლში კი, რომელიც 16 მაისს მივიღეთ, აღნიშნულია, რომ ზურაბ ჯინჭარაძეს ხელფასი 470 ლარი აქვს, მის მოადგილეს, რომან მამალაძეს კი 420 ლარი.
ჯიქიას კომენტარის შემდეგ, სიტუაციაში გარკვევა ვცადეთ. როგორც ანტონ ხუნდაძემ გვითხრა, 17 მაისს (ჯიქიასთან საუბრიდან რამდენიმე წუთში) მასთან სპორტის განვითარების ცენტრის ხელმძღვანელის წერილი შევიდა, სადაც აღნიშნულია, რომ ინფორმაცია შეცდომით მოგვაწოდა:
_ როდესაც თქვენ საჯარო ინფორმაცია მოითხოვეთ, სადაც აიპ-ბის საშტატო განრიგს და სხვა ინფორმაციას ითხოვდით, კანონის შესაბამისად, აიპ-ის ხელმძღვანელებს დაევალათ ინფორმაციის მოწოდება. ჩვენც მათ მიერ მოწოდებული ინფორმაციის დედანთან დამოწმებული ასლები გამოგიგზავნეთ. დღეს კი წერილი შემოვიდა, სადაც აღნიშნულია, რომ შეცდომას ჰქონდა ადგილი, _ გვითხრა ხუნდაძემ და წერილიც გამოგვიგზავნა.
“ბატონო ანტონ, 2013 წლის 30 აპრილს თქვენი #1/12-127 წერილობით საფუძველზე წარმოდგენილი ინფორმაცია ააიპ სპორტის განვითარების ცენტრში დასაქმებულ მუშაკთა საშტატო განრიგისა და ხელფასის ფონდის შესახებ წარმოდგენილ ინფორმაციაში გაიპარა შეცდომა. კერძოდ: მონაცემთა საინფორმაციო ბაზიდან მუშაკის მიერ ამოღებული იქნა საშტატო განრიგისა და სახელფასო ფონდის შესახებ ძველი მასალა. შეცდომის გასწორების მიზნით, წარმოგიდგენთ ამჟამად მოქმედი საშტატო განრიგისა და სახელფასო ფონდის შესახებ ინფორმაციას,” _ ვკითხულობთ ზურაბ ჯინჭარაძის წერილში.
თანდართული ინფორმაციით კი ირკვევა, რომ ჯინჭარაძის ხელფასი მართლაც 700 ლარს შეადგენს, ხოლო მისი მოადგილის, რომან მამალაძის _ 600 ლარს.
რომან მამალაძე ჩოხატაურის გამგებლის მოვალეობის შემსრულებლის, თამაზ ჯინჭარაძის სიმამრია. კითხვაზე, თუ რატომ მოუმატა ხელფასი სიმამრს, ჯინჭარაძეს გვპასუხობს, რომ ამის გასარკვევად ზურაბ ჯინჭარაძეს უნდა მივმართოთ.
ზურაბ ჯინჭარაძეს ამ კითხვაზე დაზუსტებული პასუხი არ აქვს:
_ არ დაგიმალავთ არაფერს. როცა ინფორმაცია გამოაგზავნეს, მე არ ვიყავი და შეცდომა მოხდა.
_ დოკუმენტზე თქვენი ხელმოწერაა. სხვა აწერს ხელს თქვენს მაგივრად?
– არა, სხვა არ აწერს. იმ დღეს ჩამოვედი თბილისიდან და არ დავაკვირდი ყურადღებით.
_ ბატონო ზურაბ, რას ნიშნავს, არ დააკვირდით ყურადღებით? ხელფასები გაგიზრდიათ, თქვენ კი ძველ საშტატო განრიგს გვაწვდით… ამას ინფორმაციის დამალვა ჰქვია…
_ არა, ეგ არ იფიქროთ, გთხოვთ… სიმართლეს გეტყვით _ როცა ჯიქია მოვიდა სპორტსკოლაში მე გამომიშვა.
_ და აქ გადმოყვანით და 700-ლარიანი ხელფასით კომპენსაცია გაგიკეთათ?
_ ნუ, რა ვიცი! ხელფასი ცოტათი ბუღალტერსაც მოემატა. ისე, სხვა აიპ-ების ხელმძღვანელები ნამდვილად ჩემზე მეტ საქმეს აკეთებენ, რა არის ამაში დასამალი? _ გვითხრა ჯინჭარაძემ და საუბარი ისე დასრულდა, ვერ გავიგეთ, რა დამსახურების მიხედვით მოემატა ხელფასი ზურაბ ჯინჭარაძეს და გამგებლის სიმამრს, რომან მამალაძეს.
სტატიები მომზადებულია ფონდის”ღია საზოგადოება _ საქართველოს” მიერ დაფინანსებული პროექტის _ “დათვალე საკუთარი ფული!”, ფარგლებში და მასში გამოთქმული მოსაზრება არ გამოხატავს ფონდის პოზიციას
