აქედან 917 ტრაქტორი ეკუთვნის 109 სატრაქტორო კომპანიას, ინდმეწარმეს და ამხანაგობას, ხოლო 814 ერთეული ტრაქტორი _ შპს “მექანიზატორს”.
13 მაისის მდგომარეობით, პროექტის ფარგლებში სულ მოხნულია 131 ათასი ჰექტარი მიწა.
როგორც გავარკვიეთ, ჩოხატაურში ბარათებით 1 268 ჰექტარი მიწა უნდა დაიხნას. ნაწილი უკვე დახნულია, თუმცა, რიგ სოფლებში ტრაქტორი ჯერაც არ შესულა.
სწორედ ამ საკითხებზე ესაუბრა გასულ კვირას, ჩოხატაურის სოფლის მეურნეობის სამსახურის უფროსი, მანანა მინდაძე ჩოხატაურის საკრებულოს ფრაქციების წარმომადგენლებს.
მინდაძის თქმით, ხვნის პროცესში არსებულ შეფერხებებში საბოტაჟის ნიშნები იკვეთება. მანვე, დეპუტატებს მოუწოდა, უფრო მეტად ჩაერთონ ამ საკითხში და მათთან ერთად უფრო მეტი იმუშაონ.
დეპუტატებმა მინდაძის შენიშვნა მიიღეს და დასძინეს, რომ შექმნილი სიტუაციით აუცილებლად დაინტერესდებიან.
ფრაქცია “ქართული ოცნება _ დემოკრატიული საქართველოს” თავმჯდომარის, დავით შარაშიძის თქმით, ის და მისი ფრაქციის წევრები ადგილებზე გაეცნობიან სიტუაციებს და ყველა პრობლემით სიღრმისეულად დაინტერესდებიან.
მანანა მინდაძის თქმით, ფრაქციების წარმომადგენლებთან მკაცრი საუბარი შედეგიანი აღმოჩნდა:
_ ძალიან კარგი რამ გავაკეთე იმ შეხვედრით. ეს რომ არ გვექნა, საჭამიასერი დაგვრჩებოდა, ფაქტობრივად…
_ საჭამისერი ხომ საკრებულოს თავმჯდომარის სოფელია?
_ ეს იყო ყველაზე მეტად ჩემთვის გულდასაწყვეტი. იქაც ვთქვი და ახლაც გავიმეორებ _ ჩამოვიდნენ ტრაქტორისტები საჭამიასერიდან, მეორე დღეს ათ საათზე უნდა წასულიყვნენ თბილისში ხელშეკრულების გასაფორმებლად და დილით უარი გვითხრეს. რაღაც მოხდა და რა მოხდა, არ ვიცი. ერთადერთი, ვინც საკრებულოდან დაინტერესდა დავით შარაშიძე იყო. ინდივიდუალურ საუბარში მოვუყევი, რაც ხდებოდა. ამის შემდეგ დაინიშნა ფრაქციის სხდომა. მეორე დღეს, დავით შარაშიძე, შეზღუდული შესაძლებლობების მქონე კაცი ავიდა საჭამიასერში და მთელი დღე ელაპარაკა ამ ტრაქტორისტებს. შედეგად კი მოვიდა ორი ბიჭი და ხელშეკრულება გააფორმა.
სოფლის მეურნეობის სამსახურში იმედოვნებენ, რომ ხვნის პროცესს თვის ბოლომდე მორჩებიან და გართულებებს ადგილი არ ექნება.
_ ქალბატონო მანანა, დღეს “გურია ნიუსმა” რამდენიმე სოფელი გადაამოწმა… ბევრგან არ არის ხვნა დაწყებული, მაგალითად, ვანზომლეთში… შესაბამისად, ხალხი უკმაყოფილებას გამოთქვამს…
_ ჩვენ შევიყვანეთ ტრაქტორები ვანზომლეთში და უკან გამოვიყვანეთ. გვალვიანი მიწაა და სანამ არ გაწვიმდება, დახვნა ვერ დაიწყება.
_ ხომ არ გვიანდება?
_ არა. სხვათაშორის, ჩოხატაურში ივნისშიც იყო ხვნები და მერე თესავდნენ სიმინდს. ახლა, ხალხს ვაუჩერი რომ უჭირავს ხელში, დროულად უნდათ. მე მესმის და აბსოლუტურად სწორია, მაგრამ ჩვენზეც არ არის დამოკიდებული. ჩვენ ჩამოვედით 20 აპრილს და 23-ში რომ მოვიკითხეთ, ჩოხატაურში მუშაობდა 2 ტრაქტორი. გრაფიკი ასე იყო შედგენილი. მერე გავერკვიეთ, ავმუშავდით. თბილიდან ორჯერ იყო ჯგუფი ჩამოსული. ამჟამად, 14 ტრაქტორით ვმუშაობთ. 15 გვაწერია, მაგრამ ერთი ქარხნული დაზიანებითაა. გარდა ამისა, ადგილობრივი ტექნიკაც ჩავრთეთ.
_ ამ ეტაპზე რამდენი ჰექტარი მიწაა დაუხნავი?
_ ზუსტად ვერ გეტყვით. 1 296 ჰექტარი გვაწერია ხვნის ვაუჩერებით. მაგრამ არის ასეთი რამე _ დავუშვათ არსებობს 5-ჰექტრიანი მასივი, ამ მასივში ხვნის ვაუჩერი აქვს მხოლოდ სამ ადამიანს. ამიტომ, გამოსცეს დამატებითი დებულება, რომ შპს “მექანიზატორი” უხნავს იმ დანარჩენს. არ გამოვა 5-ჰექტრიანში ორი ზოლი დახნას და დანარჩენი დატოვოს. ეს გამონაკლისი მაღალმთიან რეგიონებზე დაუშვეს. ამან გაზარდა დასახნავი მიწის რაოდენობა. მაინც, შევჩერდეთ იმაზე, რომ 1300 ჰექტარია დასახნავი. 14 მაისის მონაცემებით, 600 უკვე დახნული გვაქვს, რაც ცუდი მონაცემო არ არის. ერთი კვირის წინ 80 ჰექტარი იყო დახნული, _ ამბობს მინდაძე.
მისივე თქმით, კიდევ ერთი პრობლემა ჩვენი რელიეფია: _ სპეციფიკური ტრაქტორები ნაკლებად არის ჩართული. არის 5-გუთნიანი, 6-გუთნიანი. წარმადობით დიდი, მაგრამ სფეციფიკური. ჭალებში იმუშავა ძალიან კარგად, მაგრამ კოხნარში და სხვა მაღალმთიან სოფლებში გაუჭირდა. ეს არის ჩვენთვის ძალიან მტკივნეული. ჩვენ კი გყავს 14 ერთეული, მაგრამ დღეს ერთი გაფუჭდა. ჩოხატაურის ტიპის რაიონებისთვის უნდა იკითხონ, რას ყიდულობენ ან რას აგზავნიან. საჭიროა”დეტე”, ორხიდიანი, “ბელარუსი”. ამ დროს მიდის დიდგუთნიანი ტრაქტორი, რომელსაც უჭირს ჩვენს პირობებში მუშაობა, _ დასძინა მინდაძემ.
