“თავისუფალი დემოკრატების” ოზურგეთის რაიონული ორგანიზაცია განათლების სისტემაში არსებულ პრობლემებზე ალაპარაკდა. პარტიის გამგეობის წევრის, ნინო ლომჯარიას თქმით, პედაგოგთა შრომითი უფლებები დაუცველია და განათლების რეფორმა ვერ უზრუნველყოფს მომავალი თაობისთვის თანამედროვე განათლების მიცემას და პედაგოგთა დახელოვნებას.
_ სამსახურიდან გათავისუფლების შიში ქმნის ხელსაყრელ პირობებს პედაგოგებზე სხვადასხვა ფორმით ძალადობისა და ზეწოლის გახორციელებისთვის. ამ ხელისუფლების პირობებში მთლიანად დაუცველია პედაგოგი და მისი სამსახურიდან გათავისუფლება ყოველგვარი ახსნა-განმარტების გარეშეა შესაძლებელი. ამას ემატება სოციალური პრობლემები, დაბალი ხელფასები, რომელიც კიდევ გაუნახევრდათ პედაგოგებს, საათების შემცირების გამო.
ეროვნული გამოცდები და მასწავლებელთა ტესტირება ვერ უზრუნველყოფს სწავლების დონის ამაღლებას. აუცილებელია, ისეთი პროგრამების შემუშავება, რომლებიც ხელს შეუწყობენ სწავლის ხარისხის ამაღლებას და მასწავლებელთა დახელოვნებას, რადგანაც მიგვაჩნია, რომ ტესტირება პედაგოგს, როგორც დარგის სპეციალისტს, არ აძლევს პროფესიული განვითარების საშუალებას.
ამიტომაც, მკვეთრად უნდა ამაღლდეს მასწავლებლის სოციალური სტატუსი, რათა მან სათანადო, გამორჩეული ადგილი დაიკავოს საზოგადოებაში. არსებულმა კანონმდებლობამ პრაქტიკულად შეუძლებელი გახადა პედაგოგთა ახალი კადრების მომზადება. დღეს არსებული მდგომარეობით, თუ საგანგებო ზომები არ იქნა მიღებული, პედაგოგთა დეფიციტი გარდაუვალია. პირველ რიგში, იგულისხმება პედაგოგის სპეციალობის დაუფლების წახალისება სახელმწიფოს მხრიდან. მკვეთრად უნდა გაიზარდოს მასწავლებელთა ხელფასები. სახელმწიფოს ზრუნვა უნდა გამოიხატებოდეს როგორც პედაგოგთა ხელფასის ოდენობაში, ასევე, მათ სათანადო მომზადებასა და კვალიფიკაციის მუდმივი ამაღლების შესაძლებლობაში, _ თქვეს გასულ კვირას გამართულ პრესკონფერენციაზე “გურიის თავისუფალი დემოკრატების” ლიდერებმა.
ნინო ლომჯარიას თქმით, თავისუფალი დემოკრატების ოზურგეთის რაიონულმა ორგანიზაციამ შეისწავლა განათლების სფეროში არსებული პრობლემები:
_ რატომღაც საქართველოში ე.წ. გარდამავალი პერიოდი გაჭიანურდა. იქმნება შთაბეჭდილება, რომ ბნელში ხელის ცეცებით მივდივართ. ამის ნათელი მაგალითია განათლების რეფორმა. აღმოჩნდა, რომ ის, რაც წარმატებულად ითვლებოდა ორი ან სამი წლის წინ, თურმე, დიდი შეცდომა ყოფილა.
რატომ გახდა პედაგოგობა ასეთი მიუღებელი პროფესია? ბევრის აზრით, ამის მიზეზი ის არის, რომ პედაგოგობა რთული, საპასუხისმგებლო პროფესიაა და დიდი ნებისყოფა სჭირდება, ახალგაზრდები კი ამ პასუხისმგებლობას გაურბიან. მეორე ნაწილი მიიჩნევს, რომ დღეს ქვეყანაში მასწავლებლის შრომა დაუფასებელია _ უცხოეთიდან ჩამოსულ ე.წ. Мპედაგოგებს” 500 ლარი აქვთ ხელფასი, სარგებლობენ ყოველგვარი “სიკეთით”, ჩვენი პედაგოგები კი მათხოვრულ ხელფასს იღებენ. პრეზიდენტმა თქვა, რომ თუ სერტიფიცირებული პედაგოგი ჩააბარებს გამოცდას ინგლისურ ენაში, ამ გამოცდაზე გამოამჟღავნებს ენისა და კომპიუტერის ცოდნას, გაეზრდება ხელფასი.
უცხო ენის და კომპიუტერის ცოდნა კარგია, მაგრამ რა დააშავეს მათ, ვისაც არც სკოლაში, არც უმაღლეს სასწავლებელში არ უსწავლიათ ინგლისური და იციან, მაგალითად, ფრანგული ან გერმანული ენა? საკუთარი მწირი ხელფასით შეძლებენ მასწავლებლის დაქირავებას, ან რომც დაიქირავონ, სხვა არაფერი სჭირდებათ?
რაც შეეხება საატესტატო გამოცდებს, ამბობენ, რომ მოსწავლეებისგან მოითხოვენ მინიმალურ ცოდნას, მაგრამ საბუნებისმეტყველო საგნებში მისცეს კი მათ ეს ცოდნა?! ქიმია და ფიზიკა ხომ სემესტრულად ისწავლებოდა? წინააღმდეგი არავინ არის, რომ მოსწავლემ გამოცდა ჩააბაროს, მაგრამ თუ ცოდნა არ მივეცით, რაღას ვითხოვთ მათგან? რა გააკეთონ, სად წავიდნენ უატესტატოდ დარჩენილმა ე.წ. Мრეფორმის მსხვერპლმა” ახალგაზრდებმა?! _ თქვა ნინო ლომჯარიამ.
