ცნობილია, სტუდენტური საინიციატივო ჯგუფი “ანტიპოდები” (რომლის ხელმძღვანელები ბერდი ბერიძე და თორნიკე ჩიქოვანი არიან), ითხოვს, 2013 წელსაც გახორციელდეს საზაფხულო დასაქმების პროგრამა. მათ კიდევ ერთხელ მიმართეს 10 000-ხელმოწერიანი პეტიციით განათლების სამინისტროს, მაგრამ ვერც ამჯერად მიიღეს პასუხი. სწორედ ამიტომ სტუდენტები განათლების სამინისტროს წინ 4 ივნისს აქციის გამართვას გეგმავენ.
ჩვენ კიდევ ერთხელ დაგვიკავშირდნენ საინიციატივო ჯგუფის ხელმძღვანელები.
თორნიკე ჩიქოვანი: “განათლების სამინისტრო აცხადებს, რომ სტუდენტური დასაქმების პროექტი იყო ერთჯერადი და წელს ბიუჯეტი არ იძლევა ამ პროექტის გახორციელების საშუალებას. მაგრამ ჩვენს მიერ მოპოვებული ინფორმაციით პროექტი არ იყო ერთჯერადი და გაწერილიც იყო 2013 წლის ბიუჯეტში, თუმცა, შემდეგ ბიუჯეტის პრიორიტეტების ცვლილებისას მისი ამოღება მოხდა. სწორედ ამიტომ, სტუდენტები განათლების სამინისტროსთან აქციას გავმართავთ. აქცია გაიმართება სამშაბათს 4 ივნისს, 14:00 საათზე. ვინაიდან სტუდენტები აქტიურობენ და, შესაბამისად, მოსული სტუდენტთა რაოდენობის გამო მოგვიწევს გზის გადაკეტვა. საინიციატიპო ჯგუფი “ანტიპოდები” უახლოეს მომავალში განცხადებით მიმართავს თბილისის მერიას სანქციის მისაღებად. აქცია იქნება სანქცირებული და მშვიდობიანი, ყველა იურიდიული ნიუანსის დაცვით.”
ბერდი ბერიძე: “წინა წელს არსებული პროექტის გახორციელებისას ხარვეზები ორგანიზებაში დაშვებული შეცდომის ბრალი იყო. ეს არ ნიშნავს, რომ ხარვეზები გამოუსწორებადია, ძირითადი ხარვეზი იყო არათანაბარი სამუშაო, ნაწილმა ფაქტობრივად უმუშევრად მიიღო ანაზღაურება, ეს ყველაფერი კარგი კონტროლის შედეგად იოლად გამოსწორებადია, ასევე, შესაძლებელია პროექტის რებრენდინგი, თუ პროექტის ლოგო და დასახელება ვინმესთვის მიუღებელია. ზაფხულის განმავლობაში ამ პროგრამით აღებული ხელფასი დიდ შეღავათს აძლევდა სტუდენტების ოჯახებს. იმედი გვაქვს, 4 ივნისის აქცია შედეგს გამოიღებს და პროექტი აღდგება.”
“გურია ნიუსისთვის” ცნობილი გახდა, რომ თბილისში 4 ივნისის აქციაზე სხვა ქალაქების სტუდენტური ჯგუფებიც აპირებენ ჩასვლას.
