_ ასე დაიწყო “გურია ნიუსთან” თავისი ამბის მოყოლა ოზურგეთის მუნიციპალიტეტის სოფელ ბაილეთის მცხოვრებმა თენგიზ ჩხარტიშვილმა.
_ დაახლოებით 15 წლის წინ, სოფელ ბაილეთში დარიგდა მიწის ნაკვეთები. აქედან მეც მომაკუთვნეს 1 ჰექტარი ნაკვეთი. იგი 4 ნაწილადაა გაყოფილი, სადაც 2 ათასი კვ. მეტრი არის ჩაი, 500 კვ. მეტრი ციტრუსი, დანარჩენი კი _ სახლი და ეზო. ამ მიწის მიღება-ჩაბარების აქტი მაქვს. ისე გამიყიდეს 2 000კვ. მეტრი მიწის ნაკვეთი, რომ არავითარი შეთანხმება არ ყოფილა. 500 კვ. მეტრი მიწის ნაკვეთი კი, სადაც ციტრუსია გაშენებული, გაიყიდა ბაილეთელი თამაზ ცერცვაძის მეგობარზე. ეს ის მიწებია, სადაც ახლა სატელევიზიო ანძაა დადგმული.
თამაზ ცერცვაძე, მოგეხსენებათ, ახლა ოზურგეთის მუნიციპალიტეტის გამგეობაში, ქონების მართვის სამსახურში სპეციალისტად მუშაობს. 25 წელი ეს კაცი მუშაობს ოზურგეთის გამგეობაში და ბოლო წლებში არის გურიის გუბერნატორის ვალერი ჩიტაიშვილის იდეების განმახორციელებელი და მისი მარჯვენა ხელი, როგორც არჩევნებში, ისე სხვა საქმეებში. თამაზ ცერცვაძის დროს რაც მიწა გაიყიდა ან გასხვისება მოხდა, თვითონ ცერცვაძე აკონტროლებს. ჩვენი სოფელი მდიდარი იყო. გააჩნდა ტრაქტორები, მანქანები და გარაჟი, რომელიც მიწასთანაა გასწორებული. ასევე ორსართულიანი კლუბი, რომელიც 600 კაცს იტევდა. გაიყიდა, მიწასთან გაასწორეს მეცხოველეობის კომპლექსი, სოფელს გააჩნდა გამგეობის კარგი შენობა, ახლა ნახეთ, რა დღეშია. არც კარი გააჩნია და არც ფანჯრები, საღორედაა გადაქცეული. 9 წლის მანძილზე სოფელში ნგრევის მეტი არაფერი გაუკეთებიათ. უამრავი ფაქტი არსებობს, როგორ გაასხვისეს ლეკიანის მიწები, სახნავ-სათესი ფართობები. ჩემი თხოვნაა, გააშუქეთ და გამოიძიეთ ასეთი ფაქტები, _ გვითხრა თენგიზ ჩხარტიშვილმა.
ოზურგეთის მუნიციპალიტეტის სოფელი ბაილეთი ოზურგეთის ცენტრიდან 10 კილომეტრით არის დაშორებული. იქ 1 250 ადამიანი ცხოვრობს, 370 ძირითადი კომლია. მრავალ პრობლემას შორის, უპირველესი უმუშევრობაა. მოუგვარებელია გამრიცხველიანების საკითხი; მდინარე სუფსის კალაპოტი მოუწესრიგებელია, რის გამოც ხალხს ხელიდან ეცლება საყანე ფართობები _ მიწა წყალს მიაქვს, მოსავალთან ერთად!
ბაილეთის მცხოვრებლები “გურია ნიუსთან” ასევე იმ მძიმე სოციალური ფონის შესახებ საუბრობენ, რომელიც მეტ-ნაკლებად ოზურგეთის მუნიციპალიტეტის ყველა სოფელშია.
მათი განცხადებით, უპირველესი პრობლემა კვლავ უმუშევრობაა. როგორც სოფელში ამბობენ, დიდი ხანია, ითხოვენ საყანე ფართობებთან ნაპირსამაგრი სამუშაოების ჩატარებას, თუმცა, როგორც თვითონ ამბობენ, ხელისუფლება მათ ამ პრობლემის დახმარებაში არ დაეხმარა:
_ ამდენი წელია, ვითხოვთ დახმარებას, მაგრამ არაფერს აკეთებენ, ამბობენ, ძალიან დიდი თანხაა ამისთვის საჭიროო და ვართ ასე. ჩვენი ძირითადი შემოსავალი, თითქმის, წყალს მიაქვს. ასევე, გვაქვს შიდა გზების პრობლემა, _ აცხადებენ ბაილეთელები.
თამაზ ცერცვაძე, ოზურგეთის მუნიციპალიტეტის გამგეობის ქონების მართვის სამსახურის სპეციალისტი:
_ თენგიზ ჩხარტიშვილს უნდოდა იჯარით მიწის აღება, სადაც ახლა არის ტყე და ბუჩქნარი, მაშინ კი გაშენებული იყო ტყის მასივი და იმ პერიოდში იჯარით არ იცემოდა. მიემართა მაშინდელი საიჯარო კომისიის თავმჯდომარისთვის, მოადგილისთვის. არ შეიძლებოდა იმ ფართობის გაცემა მაშინ და თითს ჩემკენ რატომ იშვერს, არ ვიცი, მე რატომ მაბრალებს?
_ ბატონო თამაზ, იგი აცხადებს, რომ ეს მიწის ფართობები უკვე ჰქონდა აღებული იჯარით, რისი დამამტკიცებელი საბუთები, როგორც თავად აცხადებს, აქვს…
_ ეს არის ყველაფერი ტყუილი. მისთვის არავის არაფერი წაურთმევია, არანაირი დოკუმენტები მას არ გააჩნია, რას ჰქვია, მიწა წავართვი? ან მაგი მიწას შეარჩენს ვინმეს, მისთვის რომ წაერთმიათ?
_ ბატონო თამაზ, ის ასევე აცხადებს, რომ თქვენ ფლობთ ძალიან დიდი რაოდენობის მიწებს და აკონტროლებთ ბაილეთს, ხართ გუბერნატორის მარჯვენა ხელი…
_ სიცრუეა ეს ყველაფერი. იტყუება… კი, ბატონო, მზად ვარ, ვესაუბრო თქვენთან ერთად და მითხრას, რა წავართვი.
ოზურგეთის მუნიციპალიტეტის სოფელ ბაილეთის რწმუნებული სპარტაკ მამულაიშვილი “გურია ნიუსთან” აცხადებს, რომ საყანე ფართობების პრობლემა მოგვარებულია: _ საყანე ფართობების პრობლემა არჩევნების შემდეგ მოვაგვარეთ, დავამატეთ 5 ჰექტარი პირიქით, გუშინ დამთავრდა დათესვა. გამრცხველიანებისა და სხვა პრობლემები ნამდვილად არსებობს სოფელში, _ გვითხრა მამულაიშვილმა.
სტატია მომზადებულია ფონდის”ღია საზოგადოება _ საქართველოს” მიერ დაფინანსებული პროექტის _ “დათვალე საკუთარი ფული!”, ფარგლებში და მასში გამოთქმული მოსაზრება არ გამოხატავს ფონდის პოზიციას.
