ამის შესახებ ჟურნალისტებს გიორგი ვაშაძემ განუცხადა. მისი თქმით, უმცირესობა ცდილობდა კონსულტაციები ეწარმოებინა უმრავლესობის წევრებთან და შეთანხმება მომხდარიყო.
ვაშაძე კანდიდატურებზე არშეთანხმების საკითხს პოლიტიკურად მოტივირებულს უწოდებს. უმცირესობის გადაწყვეტილების შედეგად, იუსტიციის უმაღლესი საბჭოს 2 წევრის ადგილი კვლავ ვაკანტური იქნება, რაც საბჭოს საბოლოო დაკომპლექტებას შეუშლის ხელს.
“ჩვენ ვართ სამწუხარო რეალობის წინაშე _ წინა კენჭისყრაზე შევთავაზეთ 10 კანდიდატურა და ამ ათიდან ნებისმიერი ორი აერჩიათ, ჩვენ კი მზად ვიყავით მხარი დაგვეჭირა. მიუხედავად ამისა, მათ მეორე ტურში გაიყვანეს 12 ადამიანი. ავარჩიეთ მათ მიერ მეორე ტურში გაყვანილი ადამიანები, რომლებისთვისაც ასევე მზად ვიყავით მხარი დაგვეჭირა. მთელი დღის მანძილზე ვცდილობთ, კონსულტაციების საფუძველზე შეჯერდეს ამ კანდიდატურებთან დაკავშირებით რამე, მაგრამ, სამწუხაროდ უმრავლესობამ უარი თქვა საკითხის შეჯერებაზე და კონსულტაციებზე. მე არ ვისაუბრებ კანდიდატურებზე, მაგრამ თქვენ რომ გადახედოთ მათ ბიოგრაფიებს, ნახავთ, რომ ეს გადაწყვეტილება პოლიტიკურად მოტივირებულია. ჩვენ არ მივიღებთ კენჭისყრაში მონაწილეობას, რითაც იუსტიციის უმაღლეს საბჭოში ორი ადგილი ვაკანტური დარჩება. ამის მიზეზია ის, რომ უმრავლესობას არ სურს თანამშრომლობა და შეთანხმება. საბოლოო ჯამში, ჩვენ სამწუხარო რეალობის წინაშე ვართ _ ვერ მივიღებთ კენჭისყრაში მონაწილეობას,” _ განაცხადა საპარლამენტო უმცირესობის წევრმა გიორგი ვაშაძემ.
შეგახსენებთ, რომ საკანონმდებლო ორგანომ იუსტიციის საბჭოს წევრობის 35 კანდიდატიდან წინა სესიაზე მეორე ტურში 12 კანდიდატი გადაიყვანა.
ამ წუთებში ფარული კენჭისყრა ექვსი წევრის ასარჩევად უმცირესობის გარეშე მიმდინარეობს.
