(გურია ნიუსი, ლანჩხუთი) _ პარასკევს, ლანჩხუთის მუნიციპალიტეტის საკრებულოს მორიგი სესია გაიმართა და 14 საკითხის შესახებ იმსჯელეს. დღის წესრიგის განხილვამდე, საკრებულოს თავმჯდომარემ რევაზ ჩიტიძემ აღდგომის ბრწყინვალე დღესასწაული მიულოცა დამსწრე საზოგადოებას.
როგორც სხდომაზე გაირკვა, ამიერიდან გამგეობის სახანძრო დაცვის სამსახურს ახალი სახელი ექნება _ ლანჩხუთის მუნიციპალიტეტის გამგეობის სახანძრო-სამაშველო დაცვის სამსახური. ცვლილება შედის ინფრასტრუქტურის სამსახურის სტრუქტურაში _ მას საპროექტო სამსახურიც დაემატება.
ლანჩხუთის საფინანსო სამსახურის უფროსის, როლანდ ლაშხიას გამოსვლას, რომელიც ბიუჯეტში დამატებითი ცვლილებების შეტანას ითვალისწინებდა, გვარიანი ხმაური მოჰყვა: _ მთავრობის დადგენილებებით, სოფლის მეურნეობის პროგრამების დაფინასებისთვის დამატებით 685 546 ლარი იქნა გამოყოფილი, ხოლო ინფრასტრუქტურისთვის _ 500 ათასი ლარი. შესაბამისად, ბიუჯეტი მილიონ ლარზე მეტით იზრდება, რაც შესაძლებლობას მოგვცემს დამატებითი პროექტები განვახორციელოთ. როცა ეს თანხა ასახული იქნება ბიუჯეტში, შემდეგ მოხდება პროექტების გაწერა და ზუსტად გვეცოდინება, თუ რაში რას დავხარჯავთ, _ გთქვა ლაშხიამ.
საკრებულოს უმრავლესობის წევრი ამირან გიგინეიშვილი დაინტერესდა, თუ რატომ ხდება ინფრასტრუქტურისთვის გამოყოფილი თანხის დახარჯვა მხოლოდ ქალაქზე და არა სოფლების მიხედვით: _ საინტერესოა, ვინ დაადგინა ეს პრიორიტეტი?! მთავრობა გვაძლევს ფულს. საკრებულომ უნდა განსაზღვროს პრიორიტეტები, 500 ათასი ლარი რომ ქალაქს მოხმარდება, სოფლებმა რა დააშავეს?! მე ჩემს ამომრჩეველს დავპირდი სხვადასხვა პროექტის გახორციელება, მაგრამ გამოდის, რომ ასე არ იქნება. ყველა დუმხართ. ეტყობა მაჟორიტარები კმაყოფილები ხართ, _ თქვა უმრავლესობის წევრმა.
ამას საკრებულოს უმრავლესობის კიდევ ერთი წევრის _ მერაბ წილოსანის რეპლიკა მოჰყვა და გვარიანი კამათიც დაიწყო.
საკრებულოს თავმჯდომარემ “მსაჯის” ფუნქციით, ბრძანა: “2010 წლის დეკემბერში ჩვენ დავამტკიცეთ იმ პრიორიტეტების გეგმა, რომელთა გახორციელებას ვაპირებთ.”
ეს განცხადება და მერაბ წილოსანის გამოხმაურება გიგინეიშვილს აშკარად არ მოეწონა და ნაწყენმა იკითხა, ოპოზიციონერი ხომ არ გგონივართო.
ამჯერად, ტერმინის _ “ოპოზიციონერის” გამოყენება ამ კონტექსტში საკრებულოს ოპოზიციონერმა წევრმა, მაკა კვირკველიამ გააპროტესტა _ “ოპოზიცია” სალანძღავი სიტყვა არ არისო და იქვე დაამატა, რომ საკრებულო უნდა ყოფილიყო ამ საქმეში ჩართული და ერთპიროვნულად არ უნდა ხდებოდეს პრიორიტეტების განსაზღვრა.
ამის შემდეგ, გამგეობის სოციალური სამსახურის ხელმძღვანელმა მაკა გოგიჩაიშვილმა დეპუტატებს სოციალური პაკეტის ცვლილებები გააცნო; ეს ცვლილებები შესაბამის დადგენილებაში წინა დღეებში აისახა.
ამიერიდან, მოსახლეობისათვის ერთჯერადი ფინანსური დახმარების _ არა უმეტეს 100 ლარის გაცემა შემდეგი სახით მოხდება: სარეიტინგო ქულების რაოდენობა არ უნდა აღემატებოდეს 150 ათასს, მედიკამენტების შესაძენი თანხის რაოდენობა განისაზღვრება ღირებულების 50%-ით, მაგრამ არა უმეტეს 100 ლარისა, შესაბამისი დოკუმენტაციის წარმოდგენის საფუძველზე. სოციალური პროგრამა ასევე ითვალისწინებს სტიქიის შედეგად დაზარალებული და უსახლკაროდ დარჩენილი ოჯახებისთვის დახმარების აღმოჩენას _ თავშესაფრით უზრუნველყოფას. სტიქიით დაზარალებული და უსახლკაროდ დარჩენილი ოჯახი განცხადებით მიმართავს ლანჩხუთის მუნიციპალიტეტის ხელმძღვანელს. თავშესაფრის შესაძენი თანხის ოდენობა არ უნდა აღემატებოდეს 7 ათას ლარს, თავშესაფრის დასაქირავებელი თანხის ოდენობა კი განისაზღვრება თვეში 50 ლარის ოდენობით.
ამის შემდეგ, სხდომაზე სოფლის რწმუნებულები შემოვიდნენ და ტრიბუნასთან მუნიციპალიტეტის გამგებელი გიორგი გოგუაძე მივიდა, რომელმაც გასული, 2010 წლის განმავლობაში გაწეული მუშაობის შესახებ ანგარიში წარმოადგინა.
_ 2010 წელს გაკეთებული საქმეები უკვე 2 თვეა, საჯარო განხილვის საგანია. საკრებულოს ყველა კომისიაში მოხდა მისი შესწავლა. ყველა დაინტერესებულ პირს საშუალება ჰქონდა გაცნობოდა ანგარიშს ჩვენი ვებ-გვერდის საშუალებით, _ თქვა გოგუაძემ. მისი თქმით, 2010 წელს ბიუჯეტმა 7-ჯერ განიცადა ცვლილება, აქედან 4-ჯერ _ შემოსავლების ზრდის გამო: _ პირველი ცვლილება 9 თებერვალს გახორციელდა, როდესაც ცენტრალური ბიუჯეტიდან 3,9 მილიონი ლარი გადმოგვერიცხა სოფლის მეურნეობის, ინფრასტრუქტურის და სხვა პრიორიტეტული ღონისძიებებისთვის. გასულ წელს ჩვენ შევძელით ადგილობრივი შემოსავლების 600 ათას ლარზე მეტით გაზრდა. მხოლოდ ერთ, დასუფთავების მოსაკრებლის მუხლში გვქონდა ჩავარდნა. სწორმა მუშაობამ გამოიწვია ის რომ, 819 ათასი ლარით დავგეგმეთ ადგილობრივი შემოსავლები. გვინდა ყველა სოციალური პაკეტი იყოს დაფინანსებული, მაგრამ ჯერჯერობით ამის შესაძლებლობა არ გვაქვს. ჩემთვის მიუღებელია ის სიტუაცია, რაც ჯანდაცვაში ხდება. იქ არ არის ტექნიკური პირობები და გვინდა ეს შევცვალოთ.
მინდა შევეხო ჩვენი მუნიციპალიტეტის ყველაზე წარმატებულ პროექტს _ საბავშვო ბაღებს (მკითხველს შევახსენებთ, რომ ლანჩხუთის მუნიციპალიტეტში ბოლო დრომდე საბავშვო ბაღები უფასო იყო. რედ.). 2007 წლის შემდეგ ამ სფეროს დაფინანსება საკმაოდ გაიზარდა და 615 ათასი ლარი შეადგინა. ჩვენ მივიღეთ გადაწყვეტილება და ბაღებში სწავლება ნაწილობრივ ფასიანი გავხადეთ, თუმცა აქაც ავამოქმედეთ გარკვეული სოციალური დაცვის მექანიზმი. ვფიქრობ, გადასახადის შემოღება კარგი ნაბიჯი გახლდათ. საქმე იმაშია, რომ როცა მშობელი იხდის ფულს, ის უფროა დაინტერესებული ბავშვის ბაღში სწავლით, კვებით და ა.შ. მართალია, ჩვენ მიერაც ხდებოდა ბაღებზე კონტროლი, მაგრამ ახლა უფრო მეტია კონტროლი. რადგან მშობელი ფულს იხდის, ეს იმას ნიშნავს, რომ მოსახლეობას დღეს უკეთესად შეუძლია ცხოვრება, ვიდრე ცხოვრობდა გუშინ, _ აღნიშნა გამგებელმა.
ამ განცხადებას მოგვიანებით დეპუტატი მაკა კვირკველია გამოეხმაურა: _ ჩვენი მოსახლეობის 99%-ი ძალიან შეჭირვებულად ცხოვრობს. არა მგონია, ბატონ გამგებელს გულში იმის სჯეროდეს, რაც თქვა, მაგრამ “ასეა საჭირო” და ამიტომ განაცხადა, უკეთესი ცხოვრება არისო. მშობელს დღეს ბაღში ფულის გადახდა იმიტომ ურჩევნია, რომ სახლში ბავშვის გამოკვება უფრო მეტი უჯდება.
_ იგივე შემიძლია გითხრათ მრავალსართულიანი ბინების შემთხვევაშიც, _ თქვა გამგებელმა, _ ჩამოვაყალიბეთ ამხანაგობები და ვუთხარით, რომ ჩვენ დავუფინანსებდით სამუშაოს 70%-ს, ხოლო დანარჩენი 30% მათივე თანადაფინანსებით უნდა შესრულებულიყო. ამან უფრო მეტი ყურადღება და ინტერესი გამოიწვია, მოსახლეობის ფართო ფენაა ჩართული ამ საქმეში. სამუსიკო სკოლას 50 წლის მანძილზე არ ჰქონდა საკუთარი შენობა, დღეს ეს საკითხი მოგვარებულია. სამხატვრო სკოლაში დღეს 140 ბავშვი დადის, ესეც წარმატებაა. ბავშვთა საფეხბურთო სკოლის შექმნამ კარგი შედეგი მოგვცა. 500-მდე ბავშვია ჩართული ამ პროცესში. ცალკე უნდა ვთქვა “აგრობიზნესცენტრ ლანჩხუთის” კარგ საქმიანობაზე _ უკრაინის ხერსონის ოლქის 1,8 მილიონ ადამიანთან დამეგობრება დიდი საქმეა. მალე იქედან საქმიანი წინადადებებით 10-კაციანი დელეგაცია ჩამოვა. ეს სამსახური საკმაოდ აქტიურად არის ჩართული სიმინდის სახელმწიფო პროგრამაში და ბევრ საინტერესო სიახლეებს გვპირდება. 2010 წლის განმავლობაში 500-მდე ადამიანის დასაქმება შევძელით დროებით მაინც. ვფიქრობთ, უნდა დავიწყოთ სოფლებში არსებული ადმინისტრაციული შენობების მოწესრიგება. მალე ალბათ, დაიწყება 2012 წლის ბიუჯეტზე მუშაობა. იქ ცალკე მუხლებად ჩავწერთ ლელოს და “ლანჩხუთელობის” აღნიშვნას, _ თქვა გოგუაძემ და საკრებულოს სხდომაზე პრიორიტეტების განსაზღვრის შესახებ წამოჭრილი კამათიც “შეაჯამა”: _ აქ იყო საუბარი ინფრასტრუქტურისათვის გამოყოფილი თანხების თაობაზე. 500 ათასი ლარი რატომ მარტო ქალაქზეო, იკითხა ერთმა დეპუტატმა. ეს თანხა ქალაქისათვის არც ისე დიდია. ყველა სოფელზე რომ თანაბრად გაგვეყო, თითოს დაახლოებით 30-30 ათასი შეხვდებოდა. ამით მცირე პრობლემა მოგვარდებოდა, მაგრამ დღეს უფრო დიდი პრობლემები არსებობს, რომელთა გადაჭრას 200-300 ათასი ლარი სჭირდება. ჩვენს ქალაქში არის 52 კმ. ქუჩა. 1 კმ. რომ თანამედროვედ მოაწყო: ასფალტით, სადრენაჟე არხებით _ 450 ათასი ლარია საჭირო. შესაბამისად, მხოლოდ ქალაქის ქუჩების რეაბილიტაციას 25 მილიონი ლარი დასჭირდება.
დასასრულ, უმრავლესობის წევრმა, მერაბ წილოსანმა იკითხა _ გავიგეთ გუშინ ფეხბურთის ფედერაციის პრეზიდენტი იყო ჩამოსული და რაიმე ახალი ხომ არ უთქვამსო. პასუხად, დეპუტატს გამგებელმა მკაცრად მოუჭრა _ ახლა მე 2010 წელზე ვლაპარაკობ და 2011-ის ჯერი ჯერ არ დამდგარაო! მან არ ისურვა დეპუტატებისთვის სიჭინავასთან დახურული შეხვედრის დეტალები გაეცნო.
გამგებლის მიერ საკრებულოს იგნორირებას კამათი აღარ გამოუწვევია.
