“მიუხედავად მოლოდინისა, საკრებულოს თავმჯდომარე მოულოდნელად გადადგა”

_ ბატონო ავთანდილ, საკრებულოს სხდომაზე არა ერთხელ ითქვა, რომ მამეშვილი უნდა გადამდგარიყო თანამდებობიდან. საპასუხოდ ისმოდა, რომ ეს მომენტი არ დადგებოდა, მაგრამ საპირისპირო მოხდა.

_ სიმართლე გითხრათ, მე იმ ადამიანთა რიგებში ვარ, რომელიც არ ელოდებოდა ალეკო მამეშვილის გადადგომას. რაღაც გარკვეული მოსაზრებები ამ თემასთან დაკავშირებით მქონდა და საკმაოდ რთული სიტუაცია იყო. წინასწარი მონახაზი ჰქონდა ამ ყველაფერს, რომ ალეკო მამეშვილი გადამდგარიყო. საკრებულოს სხდომებზე ეს კარგად ჩანდა და არა მარტო საკრებულოს სხდომებზე. ალეკო აცხადებდა, რომ ის არ აპირებდა გადადგომას და აქედან გამომდინარე, არ ველოდებოდი მისგან ამ ნაბიჯის გადადგმას. მით უმეტეს, ამ მოწვევის საკრებულოს დიდი დრო არ აქვს დარჩენილი უფლებამოსილების ამოწურვამდე. ალეკო მამეშვილი პარასკევს მესაუბრა გადადგომის შესახებ და იმავე დღეს გააკეთა განცხადება.

_ რა გითხრათ, რატომ ტოვებდა თანამდებობას?

_ მე მითხრა ის, რაც დაწერა თავის განცხადებაში.

_ იქ საუბარია ზეწოლაზე, მაგრამ კონკრეტული ფაქტების შესახებ არ საუბრობს.

_ რაღაც ინფორმაციები, რა თქმა უნდა, მქონდა, რომ გარკვეული ჯგუფები ალეკოს ურჩევდნენ თანამდებობის დატოვებას. ზეწოლის შესახებ ინფორმაცია ჩემთვისაც კულუარული იყო. უხერხულია, სერიოზული გაზეთის ჟურნალისტთან ვისაუბრო კულუარულ ინფორმაციაზე. რაღაც ინფორმაციები მომდიოდა ჭორის დონეზე, დანარჩენ ამბებს საკრებულოს სხდომაზე ვხედავდი და მესმოდა. რადგან განცხადებაში ისაუბრა ზეწოლის შესახებ ე. ი. იყო ზეწოლა. რაც შეეხება წერილობით განცხადებას, მხოლოდ მარტივად წერია: “გთხოვთ, გამათავისუფლოთ დაკავებული თანამდებობიდან”, სხვა არაფერი .

_ რამდენად ადეკვატურად შეიძლება მიიღოს ალეკო მამეშვილის ამომრჩეველმა ასეთი მოულოდნელი განცხადება?

_ ასეთი ტიპის განცხადება არ ითხოვს, ავტორმა მაინც და მაინც მოტივი ჩადოს შიგ. შეიძლება, მოტივი უამრავი არსებობდეს, მაგრამ არ მინდა, გავუმხილო საზოგადოებას.

_ ის ვალდებულია, განუმარტოს ამომრჩეველს, რატომ მიიღო ასეთი მოულოდნელი გადაწყვეტილება.

_ გასაგებია, მაგრამ მან ჩათვალა, ასეთი ტიპის განცხადება გაეკეთებინა, ინტერნეტში უფრო ვრცლად ისაუბრა წასვლის მიზეზებზე.

_ თქვენი აზრით, იქონია თუ არა გავლენა ჩაშლილმა ბიუროს სხდომამ, ალეკო მამეშვილს ეს გადაწყვეტილება მიეღო?

_ ის, რომ ბიუროს სხდომა არ შედგა, მეც ვფიქრობ, ცუდი ფაქტია. ეს კარგი ფაქტი არ არის არც საკრებულოსთვის, არც ბიუროსთვის და არც არავისთვის. ბუნებრივია, არც ყოფილი თავმჯდომარისთვის, ალეკო მამეშვილისთვის. საკრებულოს წევრები გაფრთხილებული იყვნენ ამ სხდომისთვის და ისინი არ მივიდნენ, თუმცა, მინდა გითხრათ ერთი რამ _ ბიუროს სხდომა დაგეგმილი იყო 12 საათზე და ცოტათი ადრე მოხდა გადადება საკრებულოს თავმჯდომარის მიერ. დარწმუნდა, ალბათ, რომ სხდომას ბიუროს წევრები არ დაესწრებოდნენ. ამ ბიუროს სხდომის ჩაშლამაც გარკვეული როლი ითამაშა, შეიძლება, რამდენიმე თვე ფიქრობდა, მაგრამ მისი წასვლა დაემთხვა ამ ბიუროს.

_ თქვენც არ იყავით ბიუროს სხდომაზე…

_ ნამდვილად არ ვიყავი ამ დღეს, საკმაოდ ობიექტური მიზეზის გამო. სიმართლე გითხრათ, ამის შესახებ, მეც ვთვლი, რომ უნდა შემეტყობინებინა თავმჯდომარისთვის. სამსახურში აღვნიშნე, მაგრამ მისთვის არ მითქვამს. ვფიქრობდი, ორივეს მოვასწრებდი _ ბიუროზეც მისვლას და შვილის დაბადების დღის აღნიშვნას, რადგან ჩვენ ტრადიცია გვაქვს _ დაბადების დღეებზე ისტორიულ ძეგლებს ვნახულობთ, არ გვაქვს ორიენტაცია ოჯახურ წვეულებაზე. ეს, ვფიქრობ, ჩემი მხრიდანაც არ იყო სწორი ნაბიჯი. უნდა გადამედო დაბადების დღის ღონისძიება და მივსულიყავი, თუმცა, ჩემი მისვლაც არ წყვეტდა არაფერს. ბევრი დეპუტატი აკლდა, როგორც ვიცი, ისინიც დაკავებულები იყვნენ.