პარლამენტის პრესსამსახურის ინფორმაციით, საფინანსო–საბიუჯეტო კომიტეტთან თანამშრომლობითა და გაეროს განვითარების პროგრამის (UNDP) მხარდაჭერით შემდგარი სამუშაო შეხვედრა პარლამენტისათვის კონსტიტუციით მინიჭებული საზედამხედველო ფუნქციის ფარგლებში გაიმართა და ორგანიზატორები იმედოვნებენ, რომ იგი ხელს შეუწყობს პარლამენტის საბიუჯეტო პროცესის ეფექტიანად წარმართვას.
სოფლის მეურნეობის სამინისტროს საფინანსო–ეკონომიკური დეპარტამენტის უფროსმა, ოთარ შამუგიამ განსახილველად საქართველოს სოფლის მეურნეობის სამინისტროს 2014–2017 წლების საშუალოვადიანი სამოქმედო გეგმა და პრიორიტეტები წარმოადგინა და დეტალურად ისაუბრა მათზე. სოფლის მეურნეობის განვითარების პროგრამის ფარგლებში განსახორციელებელ ღონისძიებებზე საუბრისას, მომხსენებელმა იმ პროექტებზე გაამახვილა ყურადღება, რომლებიც ეხება ახალი ჯიშებისა და ჰიბრიდების გამოყვანას, სამელიორაციო სისტემების მოდერნიზაციას, კვებისა და გადამამუშავებელი მრეწველობის ხელშეწყობის ღონისძიებებს, სასოფლო–სამეურნეო კოოპერატივების ხელშეწყობის ღონისძიებებს, ნიადაგური საფარის ინვენტარიზაციას და სხვა.
სოფლის მეურნეობის სამინისტროს საშუალოვადიანი სამოქმედო გეგმა ასევე ითვალისწინებს სურსათის უვნებლობის, ეპიზოოტიურ კეთილსაიმედოობას და მცენარეთა დაცვის უზრუნველყოფას, მევენახეობა–მეღვინეობის განვითარებას.
სამუშაო შეხვედრაზე პარლამენტის წევრების გარდა, მოწვეული იყვნენ საქართველოს მთავრობის, სახელმწიფო აუდიტის სამსახურის, შესაბამის სფეროში მოქმედი არასამთავრობო და საერთაშორისო ორგანიზაციების წარმომადგენლები. მათი მონაწილეობით გაიმართა საქმიანი დისკუსია, როგორც სოფლის მეურნეობის, ასევე სურსათის უვნებლობისა და მევენახეობა–მეღვინეობის მიმართულებით განსახორციელებელი პროგრამების მიზანშეწონილობის თაობაზე, ასევე პროექტების სახელმწიფო ბიუჯეტიდან დაფინანსების საკითხებზე. გამოითქვა შენიშვნები და წინადადებები იმის თაობაზე, თუ რამდენად აქტუალურია ქვეყნისათვის ზოგიერთი პროგრამის სახელმწიფო დაფინანსებით უზრუნველყოფა.
გამოითქვა მოსაზრება, რომ ბიუჯეტის განხილვის ადრეულ ეტაპზე საზოგადოების ჩართულობას დიდი მნიშვნელობა აქვს პრიორიტეტების განსაზღვრისათვის. საკანონმდებლო და აღმასრულებელი ხელისუფლებების, სამოქალაქო საზოგადოების წარმომადგენელთა თანამშრომლობა ბიუჯეტის ფორმირების ადრეულ ეტაპზე იმის გარანტიას იძლევა, რომ პროგრამულ დაფინანსებაში მოხვდება ყველა ის პრიორიტეტი, რომელიც დღეს ქვეყანას აქვს.
„ასეთი აქტიური მოსმენები და ჩართულობა ბიუჯეტის განხილვის ადრეულ ეტაპზე ადრე არ ყოფილა. თითოეული უწყების, სამინისტროს ბიუჯეტი ფართო საზოგადოების, არასამთავრობო ორგანიზაციების ჩართულობით უნდა ხდებოდეს და ეს ტრადიციად უნდა ჩამოყალიბდეს. ახლანდელი დებატები იმის საფუძველს გვაძლევს, რომ მსგავს პროცესს პარლამენტი უფრო ადრე უნდა იწყებდეს, აპრილში თუ არა, მაისში მაინც“, – განაცხადა საფინანსო–საბიუჯეტო კომიტეტის თავმჯდომარემ, დავით ონოფრიშვილმა, რომელმაც თავის გამოსვლაში ყურადღება საბიუჯეტო პროცესსა და საბიუჯეტო ზედამხედველობის უზრუნველყოფაში პარლამენტის როლზე გაამახვილა.
მისივე თქმით, პარლამენტის ერთი ფუნქცია თუ კანონშემოქმედებაა, მეორე უმნიშვნელოვანესი ფუნქცია ზედამხედველობაა, რომელიც პარლამენტს თითქმის ათი წელია დაკარგული აქვს. დავით ონოფრიშვილის თქმით, წინა ხელისუფლებამ საზედამხედველო ფუნქცია საერთოდ დაავიწყა პარლამენტსაც და ხალხსაც და კანონპროექტები უაპელაციოდ მტკიცდებოდა. მისი თქმით, მომავალ წლებში პარლამენტის ერთ–ერთი ამოცანა ზედამხედველობის გააქტიურება იქნება. კომიტეტებმა შესაბამისი პროფილის სამინისტროების მიერ განხორციელებული პროგრამების შესრულების მიმდინარეობაზე კონტროლი უნდა მოახდინონ, რადგან ზედამხედველობა აუცილებელია, რომ პროგრამები კარგად და დაბალანსებულად განხორციელდეს. დავით ონოფრიშვილის შეფასებით, ასეთი სამუშაო შეხვედრები, როდესაც პარლამენტარები ადრეული სტადიიდან ჩაერთვებიან ბიუჯეტის პარამეტრების განხილვაში, უდავოდ ხელს შეუწყობს საბიუჯეტო პროცესის ეფექტიანად წარმართვას, რაც თავის მხრივ იმის გარანტია იქნება, რომ უმაღლესი საკანონმდებლო ორგანო უკვე საშემოდგომო სესიაზე, რეალურ ინფორმაციაზე დაყრდნობით, მიიღებს გადაწყვეტილებას სახელმწიფო ბიუჯეტის შესახებ კანონპროექტის თაობაზე.
აგრარულ საკითხთა კომიტეტის თავმჯდომარემ, გიგლა აგულაშვილმა შეხვედრის ორგანიზატორებს მადლობა გადაუხადა საინტერესო და სასარგებლო შეხვედრისათვის და იმედი გამოთქვა, რომ ასეთი შეხვედრები მომავალშიც შედგება. მისი შეფასებით, პარლამენტის, როგორც მაკონტროლებლის როლი კიდევ უფრო მეტად უნდა გაიზარდოს.
„საკმაოდ ბევრი კრიტიკული შენიშვნა გამოითქვა პროგრამასთან, მის დეტალიზაციასთან დაკავშირებით. ჩემთვის ეს იყო დამაფიქრებელი. როგორც ჩანს, კომიტეტს სოფლის მეურნეობის სამინისტროსთან ერთად, გაცილებით მეტი სამუშაო გველოდება იმისათვის, რომ ეს პროცესი გაუმჯობესდეს და ჩვენს მიერ აღებული ვალდებულებები შევასრულოთ. თითოეულმა მომხმარებელმა, თითოეულმა მოქალაქემ, თითოეულმა ამომრჩეველმა ყოველდღიურად თუ არა, დინამიკაში მაინც უნდა დაინახოს, რომ ის, რასაც ჩვენ ვამბობთ, ის რასაც ჩვენ მათ ვპირდებით, ცხოვრებაში რეალურად ხორციელდება“, – განაცხადა გიგლა აგულაშვილმა.
როგორც გიგლა აგულაშვილმა განაცხადა, კომიტეტი მზადაა თანამშრომლობისათვის როგორც სამინისტროსთან, ასევე სამოქალაქო საზოგადოების, არასამთავრობო ორგანიზაციების წარმომადგენლებთან და ყველაფერს გააკეთებს იმისათვის, რომ მოქალაქეებმა რეალურად დაინახონ ის სასიკეთო ძვრები, რასაც ახალი ხელისუფლება ჰპირდებოდა მათ.
