დღეის მონაცემებით, მთავრდება მარცვლეულის თესვა. მოხნულია 5 000 ჰა-მდე და დათესილია 4 500 ჰა მიწის ფართობი. მოხნული ფართობის 90% დათესილია. თუმცა, არის ოჯახები, რომელთაც სასოფლო-სამეურნეო ბარათები დღემდე არ მიუღიათ _ მათი რიცხვი 780 შეადგენს.
გულნარა ჩიჩუა, აკეთის თემის რწმუნებული: “ქვემო აკეთშია 61 ბარათია ჩამოსასვლელი, ჭანჭათში _ 37, გაგურში _ 6, ზემო აკეთში _ 8. სულ 112 ბარათია მისაღები. ოთხჯერ გადავაგზავნეთ სიები. მოსახლეობას “ცხელ ხაზზე” დარეკვის შემდეგ ეუბნებიან, რომ მონაცემთა ბაზაში არ ხართო. რას ნიშნავს ეს, ვერ გავიგე. ამ დროს ნამდვილად ვიცი, რომ სიები გადაგზავნილია. ვფიქრობ, ეს არის “ცხელი ხაზის” დაუდევრობა და მეტი არაფერი, ყველას ერთი და იმავე პასუხს აძლევენ. მაგალითად, ერთი ასო აკლია სახელს _ მაგალითად, მახარაძე ზურაბ. თურმე, უნდა იყოს ზურაბი. ასეთი ელემენტარული რაღაცეების გულისთვის არის პრობლემები. როცა პირადი ნომერი ემთხვევა, რაღა საჭიროა “ი” იქნება თუ “ა”? დამატებითი სიები ამჯერადაც გადაგზავნილია. გამგეობის სოფლის მეურნეობის განყოფილებაში გვეუბნებიან, აუცილებლად ჩამოვა ბარათებიო.”
ვლადიმერ ნანაძე, ქალაქ ლანჩხუთის რწმუნებული: “დღესდღეობით 150 ბარათი არ არის ჩამოსული. თავდაპირველი მოთხოვნა იყო 2 067 ბარათი, ჩამოვიდა _ 1 204; მეორე ეტაპზე მოვითხოვეთ 1 300, ჩამოვიდა _ 491; მესამე ეტაპზე 519-დან 447 ჩამივიდა. ქალაქი ყველაზე მეტად დაიჩაგრა. არის სოფლები, სადაც ბარათები ჩამოვიდა დამატებითი სიის მიხედვითაც კი, ჩვენთან არ ჩამოსულა. იმედია ჩამოვა. მიუხედავად იმისა, რომ პროგრამა ახალი იყო, რაიონმა თავი კარგად გაართვა.”
ჩვენ ამ თემაზე გამგეობის სოფლის მეურნეობის სამსახურის ხელმძღვანელს, ნუგზარ ცინცაძეს ვესაუბრეთ. როგორც გაირკვა, დეკემბერში გაიგზავნა 11 687 ბენეფიციარის მონაცემები და ჩამოვიდა ბარათების თითქმის ნახევარი რაოდენობა: “ოთხჯერ მოხდა სიების დაზუსტება და გადაგზავნა. ესაა პრობლემური სიები. პრობლემური ნიშნავს, როდესაც ან გვარშია შეცდომა, ან სახელში. ფაქტობრივად, 12 493 კომბინირებული და 13 606 ნომინირებული ბარათია ჩამოსული. გარდა ამისა, პრობლემურებში კიდევ 780 ბარათია ჩამოსასვლელი. გაიგზავნა კიდევ დამატებითი სია, რომლის დაკმაყოფილებაზე სამინისტრომ გამგეობას უარი უთხრა.
ეს ახალი საქმეა, გამოუცდელი ხალხი აკეთებს. ტექნიკური ბაზა არ არსებობს, ვერ უზრუნველყვეს გაგზავნილი სიის დაბეჭდვა. რაც შეეხება ჩვენს შრომას, მოგვისწრო გვალვებმა, გაჭიანურდა მიწის დამუშავება, ტექნიკაც ჩვენს ნიადაგთან შეუსაბამოა. ძალიან დიდი შრომაა ჩადებული ხვნა-თესვის კამპანიაში გამგეობის მიერ, რწმუნებულები, საოცარი თავდადებით მუშაობდნენ, დამუშავდა ყამირი მიწები, რომელიც არ მუშავდებოდა… ეს საფუძველს მაძლევს ვთქვა, რომ დადებითად დამთავრდა აღნიშნული კამპანია. ერთადერთი პრობლემაა ჩამოუსვლელი ბართები. რაც შეეხება ტექნიკას, 40 ადგილობრივი ტრაქტორი მუშაობდა, 25-30 ტრაქტორი “მექანიზატორის” ტრაქტორი იყო. საბოლოო ჯამში შემიძლია ვთქვა, რომ პროექტი გახორციელდა წარმატებით.”
პაატა ურუშაძე გამგეობის სპეციალისტი: _ უამრავი ხარვეზი ახლავს პროექტს. 780 კაცი პატარა რიცხვი არ არის რაიონის მასშტაბით. ყოველ დღე აქ 10-15 კაცი მოდის ჯგუფ-ჯგუფად, არის ჩხუბი და დავიდარაბა. იმ ხალხის პოზიციაც გვესმის _ მათ ვაუჩერი სჭირდებათ, სახელმწიფო დაპირდა და ეკუთვნით კიდეც. სამწუხაროდ, უზარმაზარი პრობლემების გამო ეს ხალხი აღმოჩნდა პროექტს მიღმა _ ვერ უზრუნველყვეს გაგზავნილი სიების დაბეჭდვა. როცა “ცხელ ხაზზე” რეკავს მოსახლეობა, გაურკვეველ პასუხებს აძლევენ. ხარვეზები იყო ტექნიკასთან დაკავშირებითაც. როცა დაიწყო ხვნა-თესვის პროგრამა, აღმოჩნდა, რომ შპს “მექანიზატორს” არ გააჩნდა საკმარისი ტექნიკა, რამაც უზარმაზარი პრობლემები გაგვიჩინა. ვინაიდან ჩვენთან რთული კლიმატური პირობებია, გარკვეულ ვადებში უნდა მოხდეს მიწების დამუშავება.
_ გაქვთ თუ არა იმედი, რომ დარჩენილი პრობლემური ბარათები ჩამოვა?
_ კი, გვაქვს, თუმცა, დამატებითი სიების იმედი _ არა. რაც შეეხება მოსახლეობის ეჭვებს, რომ თითქოს ბარათების დარიგება პოლიტიკური ნიშნით მოხდა, სიცრუეა. ყველა სოფლის რწმუნებულმა მაქსიმალური ძალისხმევით გააკეთა ეს საქმე.
სტატია მომზადებულია ფონდის “ღია საზოგადოება _ საქართველოს” მიერ დაფინანსებული პროექტის _ “დათვალე საკუთარი ფული!”, ფარგლებში და მასში გამოთქმული მოსაზრება არ გამოხატავს ფონდის პოზიციას.
