_ მე ძალიან მშურს ამ ბავშვების. მე ვსწავლობდი ძველი ტიპის სკოლებში. ნახეთ როგორი კომფორტია. აქ სულ სხვანაირი ბავშვები გაიზრდებიან, უფრო ჯანსაღი თაობა, _ აღნიშნა სკოლის გახსნისას ქვეყნის პირველმა პირმა.
იმავე დღეს, "გურია ნიუსთან" ექსკლუზიურ ინტერვიუში სააკაშვილმა განაცხადა, რომ საქართველოს ყველა სოფელში გზა გაკეთდებოდა. ეს პროცესი კი 2008 წელს უნდა დაწყებულიყო. პრეზიდენტის განმარტებით რაონის ხელმძღვანელობა შიდა გზებზე აუცილებლად იზრუნებდა, წინააღმდეგ შემთხვევაში კი მათ სხვანაირად დაელაპარაკებოდა.
მას შემდეგ რამდენიმე წელი გავიდა… სააკაშვილის თქმით "ძალიან კარგი გუბერნატორი" მიხეილ სვიმონიშვილი, რომელსაც გურულებისთვის ბევრი რამ უნდა გაეკეთებინა, ამ ინტერვიუდან ერთ წელიწადში მოხსნესა. შესაბამიდან თანამდებობების დატოვება რაიონის იმ დროინდელ ხელმძღვანელობასაც მოუწია, რომლებსაც თანამდებობაზე ყოფნის თუნდაც იმ ერთი წლის განმავლობაში "სხვანაირად" არავინ დალაპარაკებია.
გურიის ხელისუფლებას ქვეყნის პირველი პირი არც შემდგომში დალაპარაკებია "სხვანაირად" მიუხედავად იმისა, რომ 2007 წლიდან დღემდე არანაირი ცვლილება სოფლებისთვის არ ყოფილა.
მართალია, მთავრობამ სოფლის განვითარებისთვის პროგრამა შეიმუშავა და ყოველწლიურად სოლიდური თანხებიც გამოყო, მაგრამ უმრავლეს შემთხვევაში თანხები არამიზნობრივად არის დახარჯული. ამას "გურია ნიუსის" მონიტორინგიც მოწმობს. თითქმის ყველა სოფელში, ბოლო სამი წლის განმავლობაში შესრულებული პროექტები უხარისხოა. მიღება-ჩაბარების აქტებიც, რომლებიც გამგეობიდან გვაქვს გამოთხოვილი სავარაუდოდ ზეპირადაა შედგენილი. წინააღმდეგ შემთხვევაში, იმ ობიექტების მნახველი, რომლებიც "გურია ნიუსმა" გადაამოწმა და შესაბამისი ფოტო და ვიდეო მასალით გამოაქვეყნა, ოფიციალურ დოკუმენტში არ აღნიშნავდა, რომ სამუშაოები კარგად იყო შესრულებული.
მსგავსი დოკუმენტაცია სოფელ ზემოხეთში განხორციელებულ პროექტებზეც არის შედგენილი. სოფელში, რომლის თემშიც სამი სოფელი _თხილაგანი, განთიადი და გოგოური შედის, 2010 წელს 14 933 ათასი ლარი დაიხარჯა. სამივე სოფელში შიდა გზები შეაკეთეს _ თხილაგანში 4689 ლარი დახარჯეს განთიადში 5393, გოგოურში კი 4851 ლარი.
სოლიდური თანხები გზების შესაკეთებლად 2011-2012 წლებშიც დაიხარჯა.
მიუხედავად ამისა, ზემოხეთელების მთავარ პრობლემად, დღემდე უგზოობა რჩება.
ეს სოფელი გურიის რეგიონის ერთ-ერთ ყველაზე ღარიბ დასახლებად ითვლება _ აქაური მოსახლეობის უმრავლესობა სიღარიბის ზღვარს ქვემოთ მყოფია.
მასალა მომზადებულია ფონდის "ღია საზოგადოება _ საქართველოს" მიერ დაფინანსებული პროექტის _ "დათვალე საკუთარი ფული!",
ფარგლებში და მასში გამოთქმული მოსაზრება არ გამოხატავს ფონდის პოზიციას.
