ენერგეტიკის მინისტრმა კახა კალაძემ და საქართველოს ნავთობისა და გაზის კორპორაციის გენერალურმა დირექტორმა დავით თვალაბეიშვილმა, აშშ-ს განვითარების სააგენტოს (USAID) წარმომადგენლებთან ერთად “ქუთაისი-აბაშის” მაგისტრალური გაზსადენის მონაკვეთზე მიმდინარე სამუშაოები დაათვალიერეს.
კახა კალაძეს გაცხადებით, მდინარის ქვეშ მილის გატარება განვითარებულ ქვეყნებში გამოიყენება. “ჩვენ ვიმყოფებით აბაშის რაიონში, სადაც ახალი მეთოდით მიმდინარეობს ცენტრალური მილსადენის მშენებლობა, რომელიც განვითარებულ ქვეყნებში გამოიყენება. ამ მეთოდის გამოყენება საქართველოში პირველად ხდება. კერძოდ, მილების გატარება მდინარე რიონის ქვეშ 15 მეტრის სიღრმეზე მოხდება. თუ ადრე საჰაერო გადატარება ხდებოდა, ამ პროექტში შესაძლებელია გამოვიყენოთ ეს მეთოდი, რომელიც, პირველ რიგში, დაზოგავს თანხებს. კორპორაციამ ამ სამუშაოების შესრულება, 2012 წლის ბოლოს დაიწყო. რომელიც 2013 წლის შემოდგომაზე დასრულდება. ცენტრალური მილსადენის მშენებლობის გარდა, ჩვენ დაწყებული გვაქვს მუშაობა რეგიონის გაზიფიკაციაზე „სოკართან“ ერთად. 2014 წლის ბოლოს, 80 000 აბონენტის გაზიფიცირება იგეგმება. 2015 წლის ბოლოს კი მთელი ქვეყნის მასშტაბით გაზიფიცირების პროექტი დასრულდება.”
დავით თვალაბეიშვილი: “2012 წლის ოქტომბერში დავიწყეთ “სენაკი-ქუთაისის” გაზსადენის მშენებლობა, რომლის სიგრძე 77 კილომეტრია. პროექტის ღირებულება 40 000 000 აშშ დოლარია, რომელსაც საქართველოს ნავთობისა და გაზის კორპორაცია იხდის. ეს არის სტრატეგიის ნაწილი, რომელიც საქართველოში მაღალი წნევის გაზსადენის გამოცვლას, რეაბილიტაციას და მაღალი წნევის გაზსადენი სისტემის წესრიგში მოყვანას გულისხმობს. რომელიც დაახლოებით 30-40 წლის წინ იყო აშენებული და სერიოზულ რეაბილიტაციას მოითხოვს. ეს მონაკვეთი განსაკუთრებულია, რადგან მდინარის გადაკვეთისთვის გამოყენება ახალი ტექნოლოგია, რომელიც საქართველოში არ ყოფილა გამოყენებული. მდინარის გადაკვეთა არა ზევიდან, არამედ გაბურღვის საშუალებით მოხდება მიწის ქვეშ. მილი არ გამოჩნდება. ახალი მეთოდით გაყვანილი მილი უსაფრთხოების გარანტიას იძლევა, რადგან ოპერირების დროს ნაკლებია დივერსიის მოხდენის შესაძლებლობა.
პროექტი “სენაკი-ქუთაისის” მილსადენის გაზის მილის მშენებლობა დაახლოებით 5 თვეში დასრულდება.”
