საკუთარი სურვილით თანხა პატარა გიორგის სიცოცხლის გადასარჩენად ფინანსთა სამინისტროს თოთოეული დეპარტამენტის, აგრეთვე სამინისტროს სიპების თანამშრომლებმა გაიღეს, რომელიც ფონდის წარმომადგენლებს გადაეცათ.
“საქართველოს ფინანსთა სამინისტროს თანამშრომლებმა ეს თანხა გავიღეთ, რათა გადავარჩინოთ პატარა გიორგის სიცოცხლე. სამინისტრო პირველი იყო, ვინც მ.იაშვილის სახელობის ბავშვთა ცენტრალურ საავადმყოფოსთან არსებულ “სისხლის ბანკთან” გააფორმა მემორანდუმი. სამინისტროს თანამშრომლები პერმანენტულად გაიღებენ სისხლს, რათა გადავარჩინოთ ლეიკემიით დაავადებული ბავშვები. საქველმოქმედო აქციებში პირადად აქტიურადაა ჩართული ფინანსთა მინისტრი ნოდარ ხადური, რომელიც კოლეგებთან ერთად მუშაობს, რათა უახლოეს მომავალში საქართველოში გაიხსნას ტრანსპლანტაციის ცენტრი, რათა რაც შეიძლება მეტი ბავშვის სიცოცხლე გადავარჩინოთ ჩვენს ქვეყანაში,” _ განაცხადა ფინანსთა სამინისტროს საზოგადოებასთან ურთიერთობის მიმართულების ხელმძღვანელმა ხათუნა ივანიშვილმა.
საქართველოს ფინანსთა მინისტრი ნოდარ ხადური დიმიტრი ცინცაძის სახელობის ფონდის წევრებსაც შეხვდა. როგორც ცნობილია, ფონდი ლეიკემიითა და სოლიდური სიმსივნეებით დაავადებულ პატარებს ეხმარება.
ჟურნალისტებმა ფინანსთა მინისტრის დეტალურად გააცნეს ფონდის საქმიანობა, იმ ბავშვების მდგომარეობა, რომელთა სიცოცხლის გადასარჩენად გადაუდებელი დახმარებაა საჭირო. შეხვედრაზე ისაუბრეს სახელმწიფოს მხრიდან მხარდაჭერის აუცილებლობაზე და იმ მექანიზმებზე, რომლის საშუალებითაც, შესაძლებელი იქნება ბავშვთა ლეიკემიურ დაავადებებთან ბრძოლის გააქტიურება.
“პრობლემა, რომელზედაც დღეს გვქონდა საუბარი, ზოგადსახელმწიფოებრივი პრობლემაა. სამწუხაროდ, რესურსები, რომელიც გაგვაჩნია, არაა საკმარისი იმისათვის, რომ ყველა ეს პრობლემა გადავჭრათ, თუმცა საზოგადოების ფართო ჩართულობა ამ პრობლემის გადაწყვეტის ერთ-ერთი გზაა. ამ ჩართულობას, ბუნებრივია, სახელმწიფოს მხრიდან მხარდაჭერა სჭირდება. ჩვენ მზად ვართ განვიხილოთ წინადადებები იმისათვის, რათა წავახალისოთ საზოგადოების მხრიდან ამგვარი აქტივობა, დავეხმაროთ მათ პრობლემების მოგვარებაში და ღრმად ვარ დარწმუნებული, ერთად ბევრი ადამიანის სიცოცხლის და ჯანმრთელობის გადარჩენა იქნება შესაძლებელი,” – განაცხადა ფინანსთა მინისტრმა ნოდარ ხადურმა.
ფინანსთა მინისტრმა ფონდის წევრებს კიდევ ერთხელ დაუდასტურა სახელმწიფოს მხრიდან სრული მხარდაჭერა და აღნიშნა, რომ სამინისტრო მზადაა, შრომის, ჯანმრთელობისა და სოციალური დაცვის სამინისტროსთან ერთად აქტიურად იმუშაოს როგორც სახელმწიფო პროგრამის დაფინანსების გაზრდის, ისე საქართველოში ტრანსპლანტაციის ცენტრის დაფუძნების მიმართულებით.
