(გურია ნიუსი, ლანჩხუთი) _ ლანჩხუთში ფაშიზმზე გამარჯვების 66-ე წლისთავი აღნიშნეს. ქალაქის ცენტრში ვეტერანებმა თავი 12 საათისთვის მოიყარეს. მათ გამარჯვების დღე მუნიციპალიტეტის ხელმძღვანელებმა პირებმა მიულოცეს. ქალაქის პარკში შეკრებილმა ვეტერანებმა ფრონტელი მეგობრები და ის დღეები გაიხსენეს, როცა ერთად იბრძოდნენ.
_ მაშინ 20-25 წლის ბიჭები ვიყავით. ბევრი დაიღუპა ფრონტის ხაზზე. ყველაზე მეტი ლანჩხუთელი ქერჩში დაეცა გმირულად. მათი მოგონება ჩვენ გულებში მუდამ იქნება, _ აღნიშნეს ვეტერანებმა.
ვეტერანებს მუნიციპალიტეტის გამგებელი გიორგი გოგუაძე და საკრებულოს თავმჯდომარე რევაზ ჩიტიძე შეხვდნენ და მათთან ერთად სამახსოვრო ფოტოები გადაიღეს.
ქალაქის ცენტრალურ პარკში შეკრებილები სტალინის ბიუსტის ყვავილებით შესამკობად გაემართნენ. გზად რამდენიმე ვეტერანმა საყვედურიც კი გამოთქვა სააკაშვილის მიმართ: “სააკაშვილი, მგონი, 9 მაისს _ გამარჯვების დღეს აუქმებს. დაიწყეს, 8 მაისია გამარჯვების დღეო. 66 წელია, 9 მაისს აღვნიშნავთ და ახლა რაღა მოუვიდათ?!” _ კითხულობდნენ ვეტერანები. მათ იქვე განუმარტეს, რომ 9 მაისის და გამარჯვების დღის გაუქმების თაობაზე გავრცელებული ინფორმაცია არასწორია.
ამასობაში სიმღერა _ “დენ პაბედი” გაისმა და ვეტერანებმა მსვლელობა წამით შეაჩერეს. მათ ცნობილმა სიმღერამ ძველი წლები გაახსენა, ზოგიერთის თვალზე ცრემლიც კი შევნიშნეთ. იქვე ერთ-ერთმა ჩინოსანმა შენიშნა, ეს რუსული სიმღერა რომ არ დავუკრათ, ქართული არ არისო? თუმცა ამ კითხვას თავადვე უპასუხა, ეს რუსული კი არა, გამარჯვების მაუწყებელი სიმღერააო.
ვეტერანები სტალინის ბიუსტთან გაჩერდნენ. სადაც პატარა გოგო-ბიჭები ყვავილებით მიეგებნენ და ვეტერანებს გმირობისა და თავდადებისათვის კიდევ ერთხელ გადაუხადეს მადლობა.
გიორგი გოგუაძე, მუნიციპალიტეტის გამგებელი: “მინდა მოგილოცოთ გამარჯვების დღე. თქვენ გმირები ხართ და მუდამ ვიამაყებ იმით, რომ დიდი წვლილი მიგიძღვით ფაშისტური გერმანიის დამარცხებაში. გისურვებთ დიდხანს სიცოცხლეს და ჯანმრთელობას.”
რევაზ ჩიტიძე, საკრებულოს თავმჯდომარე: “ნამდვილად საამაყოა, როცა თქვენს გვერდით ვართ და ასეთი მნიშვნელოვან თარიღს აღვნიშნავთ. ღმერთმა ჯანმრთელობა მოგცეთ და დღეგრძელობა!”
შემდეგ ვეტერანები ბანკეტზე მიიპატიჟეს, რომელიც კაფე-ბარ “სამეფოში” გაიმართა.
_ მინდა ყველა ვეტერანს მივულოცო ეს ღირსშესანიშნავი დღე. ჩვენ ძალიან ბევრნი ვიყავით, მაგრამ წლებს თავისი მიაქვს _ 3500 დავბრუნდით ფრონტიდან და დღეს 70-ღა დავრჩით. არ დარჩენილა, ალბათ, ოჯახი, რომელმაც მსხვერპლი არ გაიღო მაშინ. საბჭოთა კავშირის 7 გმირი ჰყავს ჩვენს რაიონს. კიდევ ერთი ადამიანი იყო წარდგენილი გმირობაზე, მაგრამ სამწუხაროდ, მაშინ დოკუმენტაცია არ აღმოჩნდა მწყობრში და არ მიენიჭა გმირის წოდება. დღეს ხელისუფლებამ ლამაზი დღე გვაჩუქა. გიორგი გოგუაძის და რევაზ ჩიტიძის მხარდაჭერას მუდამ ვგრძნობთ. 87 წლის ვარ უკვე, თუმცა, მაინც ვცდილობ მედგრად ვიყო. ჩვენი გმირობის ამბავი მომავალ თაობებს აუცილებლად შემორჩებათ, _ თქვა ვეტერანთა საქმეების რაიონული ორგანიზაციის ხელმძღვანელმა, გიგლა ქანთარიამ.
